Qoğamdıq kölikterge köptep ilingen kovid turalı körneki plakat. 20 qazan 2021 jıl. Almatı qalası. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 1,8 mıñğa artıp, jalpı esebi 1 millionnan astı. Qazan ayınıñ eki onkündiginde 38 mıñ nauqas anıqtalıp, 730-dan asa adam köz jwmğan. Bwl salıstırmalı türde bıltırğıdan aytarlıqtay joğarı.

Densaulıq saqtau ministrliginiñ resmi mälimetinşe, elde 20 qazanda koronavirus (KVI+) jwqqan 1844 adam, al 19-ı küni  koronavirus pnevmoniyasına (KVI-) şaldıqqan 154 adam tirkeldi. Sonday-aq, seysenbide 41 qazaqstandıq aurudan qaytıs boldı. Osılayşa, särsenbidegi epidkörsetkiş aldıñğı künge qarağanda 161 jağdayğa arttı. Degenmen bıltır däl osı uaqıtta resmi statistikada täuligine köp degende 300-ge deyin nauqas jäne 10-ğa jeter-jetpes ölim jağdayı tirkeletin, stacionarlarda jatqan sırqattar sanı 3,5 mıñnan aspağan edi. Qazir bwl körsetkiş eselep ösip otır, büginde elde 51 mıñ adam (KVI+ boyınşa 45 mıñday, KVI- boyınşa 6 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 18,5%-ı ädettegidey joğarı dinamikada twrğan bir ğana Almatı (309) qalasına tiesili. Bir künde tirkelgen nauqastardıñ üşten birinen astamı astana jäne Almatı qalası men oblısına jatadı. Auruşañdıq ŞQO (83) öñirinen özge barlıq aymaqta: astana (185), Pavlodar (186), SQO (151), Qostanay (123), Atırau (48), BQO (61), Türkistan (33), Qızılorda (35), Jambıl (31), Aqmola (146), Almatı oblısı (158), Şımkent (52), Mañğıstau (14) oblıstarında türli deñgeyde öskeni bayqaladı. Qarağandı (150) jäne Aqtöbe (43) öñirlerinde azdap kemigen. Särsenbide aurudan ayıqqan 1984 adam üyine şığarılğan. 19 qazanda jiını 32 adam qaytıs bolğan.

#COVID_pnevmoniyası Qazannıñ 19-ı aqparatı bir täulikke keşigip beriletin koronavirus pnevmoniyasına şaldıqqan 151 nauqas esepke alındı. Vedomstvo dereginşe, bwl küni ŞQO (30), Almatı (23), Şımkent (16), Jambıl (16), Almatı qalasında (10) köptep anıqtalğan. Sonımen qosa, 221 adam ayığıp şıqqan, tağı 9 adam köz jwmğan.

#Jalpı  DenMin deregine qarağanda, emdelip jatqan 51 mıñ nauqastıñ 9 mıñğa juığı auruhanada, 42 mıñı ambulatorlıq baqılauda. 634 nauqastıñ jağdayı naşar, ondağı 165 adamnıñ häli öte auır. Bwdan özge 103 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Şımkent, Türkistan, Aqtöbe, Mañğıstau, BQO, Qızılorda jäne Jambıl oblıstarınan basqa Qarağandı, ŞQO, Atırau oblıstarı «sarı aymaqqa» ötken. Basqa 7 aymaq (astana, Almatı oblısı men qalası, Qostanay, Pavlodar, Aqmola, SQO) twtastay «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 38 mıñ auru jäne 738 ölim jağdayı tirkelgen.

Bıltır 13 naurızdan beri COVID-19 infekciyasın jwqtırğandar qatarı 923 mıñnan, 1 tamızdan bergi koronavirus pnevmoniyası 78 mıñnan asqan. DDSW derekqorı men Wlttıq statistikada Qazaqstanda auırğandar sanı 1 mln 1 mıñnan astı. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 20 ayında jalpı virus jwqqandardan 19,9 mıñ adam (KVI+ / U07.1 – 11 847, KVI- / U07.2 – 4988, ilespe aurulardan – 3123) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,2 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8,1 mln-nan asadı. Densaulıq saqtau ministri Aleksey Coy qaraşa ayınıñ üşinşi onkündiginen bastap vakcina alğanına jartı jıl ötkender üşin revakciyanaciya nauqanı jürgiziletinin mälimdedi.

The Qazaq Times