رودريگو دۋتەرتە پوليتسيا قولىنان قازا تاپقان مەكتەپ وقۋشىسىنىڭ اتا-اناسىمەن كەزدەستى

فيلليپيندە مەملەكەت باسشىسىنىڭ جاريالاۋىمەن ءجۇرىپ جاتقان "ەسىرتكىگە قارسى سوعىس" كامپانياسىنىڭ اياسىندا پوليتسيا قولىنان قازا تاپقان 17 جاستاعى كيان لويد دە سانتوستىڭ وقيعاسى بۇكىل ەلدى دۇرلىكتىرگەنى تۋرالى الدىن جازعان بولاتىنبىز. بۇگىن ءفيلليپيننىڭ پرەزيدەنتى رودريگو دۋتەرتە ەسىرتكىگە قارسى ساياساتتىڭ قۇربانى بولعان جاس جىگىتتىڭ وتباسىنا كوڭىل ايتتى. بۇل تۋرالى Reuters اقپاراتتىق اگەنتتىگى جازدى. 

ازا تۇتىپ وتىرعان اتا-انانى ءوزىنىڭ رەسمي قابىلداۋىنا شاقىرعان رودريگو دۋتەرتە ولارعا ادىلەتتىلىك ورناتىپ، جۋىق ارادا كىنالىلەردى جازالاۋعا ۋادە بەردى. كيان لويد دە سانتوستىڭ اناسى لورەنتسا پرەزيدەنتتىڭ سوزدەرى كوڭىلگە مەدەۋ بولعانىن ايتسا، اكەسى مەملەكەت باسشىسىنىڭ ءوزى تىكەلەي قولداۋ كورسەتىپ وتىرعاندا، ەشقانداي ادىلەتسىزدىكتەن قورىقپايتىنىن جەتكىزدى.

وسى ۋاقىتقا دەيىن مىڭداعان ادامدى سوتتىڭ شەشىمىن كۇتپەي-اق اباقتىعا جاۋىپ، وقيعا ورنىندا ولتىرۋگە رۇقسات بەرەتىن ناشاقورلىققا قارسى كۇرەس كامپانياسىنا اشىق نارازىلىق بولماعانىمەن، سەنبى كۇنى جاس بالانىڭ جەرلەۋ راسىمىنە جينالعان حالىق قالا كوشەلەرىنە قولدارىنا دۋتەرتەنىڭ ساياساتىنا قارسىلىق بىلدىرەتىن ماتىندەگى پاراقشالار ۇستاپ، شەرۋگە شىقتى.

رودريگو دۋتەرتە قۇقىق قورعاۋ قىزمەتكەرلەرىمەن كەزدەسۋ كەزىندە، بۇرىنعىشا ولارعا قولعا ءتۇسىرۋ وپەراتسياسىنا قارسىلىق تانىتقان ازاماتتارعا قارسى قارۋ قولدانۋعا رۇقسات بەرەتىنىن اشىپ ايتتى. "بىراق بارلىق وپەراتسيالار زاڭنىڭ تالاپتارىن ساقتاپ، ادىلەتسىزدىكتەرگە جول بەرىلمەسىن!", - دەپ ەسكەرتتى.

“The Qazaq Times”