Almatı-2 temirjol vokzalındağı kovid turalı körneki plakat ilingen taqtayşa. 19 qazan 2021 jıl. Almatı qalası. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 1,8 mıñğa artıp, jalpı esebi 1 millionğa juıqtadı. Qazan ayında 36 mıñ nauqas anıqtalıp, 700-dey adam köz jwmğan. Bwl salıstırmalı türde bıltırğıdan aytarlıqtay joğarı.

Densaulıq saqtau ministrliginiñ resmi mälimetinşe, elde 19 qazanda koronavirus (KVI+) jwqqan 1683 adam, al 18-i küni  koronavirus pnevmoniyasına (KVI-) şaldıqqan 154 adam tirkeldi. Sonday-aq, düysenbide 28 qazaqstandıq aurudan qaytıs boldı. Osılayşa, seysenbidegi epidkörsetkiş apta basına qarağanda 41 jağdayğa arttı. Degenmen bıltır däl osı uaqıtta resmi statistikada täuligine köp degende 300-ge deyin nauqas jäne 10-ğa jeter-jetpes ölim jağdayı tirkeletin, stacionarlarda jatqan sırqattar sanı 3,5 mıñnan aspağan edi. Qazir bwl körsetkiş eselep ösip otır, büginde elde 51,5 mıñ adam (KVI+ boyınşa 45 mıñ, KVI- boyınşa 6 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 18,5%-ı ädettegidey joğarı dinamikada twrğan bir ğana Almatı (312) qalasına tiesili. Bir künde tirkelgen nauqastardıñ üşten bir böligi astana men Almatı qalasına jatadı. Auruşañdıq ŞQO (83) öñirinen özge barlıq aymaqta: astana (180), Pavlodar (164), Qarağandı (154), SQO (139), Qostanay (117), Aqtöbe (54), Atırau (41), BQO (40), Türkistan (25), Qızılorda (31), Jambıl (30), Aqmola (129), Almatı oblısı (135), Şımkent (40), Mañğıstau (9) oblıstarında türli deñgeyde öskeni bayqaladı. Seysenbide aurudan ayıqqan 2228 adam üyine şığarılğan. 18 qazanda jiını 18 adam qaytıs bolğan.

#COVID_pnevmoniyası Qazannıñ 18-i aqparatı bir täulikke keşigip beriletin koronavirus pnevmoniyasına şaldıqqan 154 nauqas esepke alındı. Vedomstvo dereginşe, bwl küni Almatı (29), ŞQO (23), Şımkent (21), Qostanay (12), Almatı qalası (12), Qarağandı (8) oblıstarında köptep anıqtalğan. Sonımen qosa, 237 adam ayığıp şıqqan, tağı 10 adam köz jwmğan.

#Jalpı  DenMin deregine qarağanda, emdelip jatqan 51 mıñ nauqastıñ 9 mıñğa juığı auruhanada, 42 mıñı ambulatorlıq baqılauda. 633 nauqastıñ jağdayı naşar, ondağı 170 adamnıñ häli öte auır. Bwdan özge 100 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Şımkent, Türkistan, Aqtöbe, Mañğıstau, BQO jäne Jambıl oblıstarınan basqa Qarağandı, ŞQO, Qızılorda, Almatı, Atırau oblıstarı «sarı aymaqqa» ötken. Basqa 6 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 36 mıñ auru jäne 697 ölim jağdayı tirkelgen.

Bıltır 13 naurızdan beri COVID-19 infekciyasın jwqtırğandar qatarı 921 mıñnan, 1 tamızdan bergi koronavirus pnevmoniyası 78 mıñnan asqan. DDSW derekqorı men Wlttıq statistikada Qazaqstanda auırğandar sanı 1 millionğa jaqındadı. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 20 ayında jalpı virus jwqqandardan 19,9 mıñ adam (KVI+ / U07.1 – 11 815, KVI- / U07.2 – 4979, ilespe aurulardan – 3123) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,2 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8 mln-nan asadı. Densaulıq saqtau ministri Aleksey Coy qaraşa ayınıñ üşinşi onkündiginen bastap vakcina alğanına jartı jıl ötkender üşin revakciyanaciya nauqanı jürgiziletinin mälimdedi.

The Qazaq Times