Foto: capital.ua

2017 jılğı şildede halıq netto-negizde 196,5 mlrd teñge somağa qolma-qol şetel valyutasın (AQŞ dolları, Resey rubli, euro)  satıp alğan. Bwl turalı QR Wlttıq bankiniñ baspasöz qızmeti habarladı.

Qarjınıñ negizgi kölemi AQŞ dolların satıp aluğa (69%) jwmsaldı, Resey rubliniñ jäne euronıñ ülesi tiisinşe 22% jäne 9% bolğan jäne aldıñğı aymen salıstırğanda bwl şığıstar 12%-ğa wlğaydı.

"AQŞ dolların jäne euronı satıp alu şığıstarı teñbe-teñ – ärbir
valyuta boyınşa 34%-ğa wlğaydı, Resey rublin satıp alu şığıstarı 29%-ğa tömendedi", - delingen baspasöz habarlamasında.

Bas banktiñ aqparatınşa, osı jılğı qañtar-şildede qolma-qol şetel valyutasın satıp aluğa(netto) 1,0 trln teñge (AQŞ dollarına – 57%, Resey rubline – 31%, euroğa – 12%) jwmsalğan.

Al 2016 jılğı qañtar-şildede qolma-qol şetel valyutasın netto-satıp alu 150 mlrd teñgeni qwradı, bwl depozitterdiñ dollarsızdanuı jäne teñgeniñ nığayuı ayasında oğan degen swranıstıñ tömendeuine baylanıstı boldı.

Wlttıq banktiñ mälimetinşe, şetel valyutalarına swranıs käsipkerler tarapınan, şetelge turistik saparlar kezinde, şetelge aqşa audaruda, sonday-aq, eñbek migranttarınıñ äketuine baylanıstı payda bolğan.

Ayta keteyik, şilde ayında jäne tamız ayınıñ basında dollar birden qımbattap ketken bolatın. Mwnıñ sebebin narıqtağılar AQŞ-tıñ Reseyge salğan sankciyasınıñ Qazaqstanğa da äser etuimen tüsindirdi.

“The Qazaq Times”