Foto: radiotochka.kz

Qazaqstan täuelsizdik alğalı el biligine kimder kelip, kimder ketpedi. Aqordanıñ eski qwramı jüz ret orının auıstı. «Bolaşaqpen» şet elde oqıp kelgender de memlekettik kompaniyalarğa, ministrlikterge, oblıs, qala äkimdikterine kele bastadı. Aldı jemqorlıqpen qamauğa da alınıp ülgerdi. Osınıñ barlığınan köñili qalğandıqtan ba, älde tığırıqtan şığudıñ jalğız jolı osı bolğandıqtan ba belgisiz?. Äyteuir, soñğı uaqıtta Aqorda memlekettik qızmetke qazaq wltşıldarın tarta bastadı.

Bwdan qanday nätije şığadı? El işinde qanday özgerister boladı? Qazaq wltşıldarı keñes ükimetiniñ tepkisin körgen qazirgi bilikpen birigip jwmıs jasay ala ma? Bügin biz osı jäne özgede swraqtarğa jauap izdep köruge tırıstıq.

Qazaqstan egemendi el atanğalı el biliginde jıl sayın auıs-tüyis nauqanı jürip twratını belgili. Biri kelip, biri ketip jatqan twraqtı Qazaqstan biligindegi twraqsız orın almasularğa köz üyrenip ketkeli qaşan. Biraq osı jolı Aqorda tarapınan jasalıp jatqan qadamdarğa nazar audarmasqa bolmas. Öytkeni el, Erlan Qarinniñ Qazaqstan TRK basşısı bolıp saylanuın, Aydos Sarımnıñ Wlttıq kitaphana basşısınıñ keñesşisi bolıp tağayındaluın Aqorda memlekettik qızmetke wltşıldardı tartıp jatır dep tüsinip jür.

Bwl jayında QR mädeniet qayratkeri, jazuşı  Quandıq Şamahaywlı: Siz atağan jigitter bilik dälizinde bwrınnan jürgen azamattar edi ğoy. Olardı memlekettik qızmetke endi tartıp jatır deuge keliñkiremeytin siyaqtı. Aydos Sarım bälkim, birşama uaqıttıq üzilisten keyin qayta oralıp jatqan şığar, eger, qanday ükimettik apparatqa qızmetke ornalasqan bolsa. Al, Wlttıq kitaphanağa keñesşi bolu - memlekettik qızmet emes. Erlan Qarin memlekettik qızmette, bilik partiyasınıñ apparatında lauazımdı qızmetter atqarğan twlğa. Kerisinşe, qazirgi tañda memlekettik qızmetten ketip, şığarmaşılıq wjımdı basqaruğa keldi. BAQ - memlekettik qızmet emes. Olay bolsa, wltşıldardı tartıp jatqan Aqorda qayda?

Qoğamda Aqorda qazaq wltşıldarın memlekettik qızmetke tartıp jatır degen pikir qalıptastıru kimge tiimdi ekeni belgili jayt. Biraq özderin wltşılmın dep jürgen azamattar qazaq qoğamında osınday oy, pikir qalıptasuına belgili bir därejede üles qosıp jatqandığın bile me, bilmey me ol jağı bizge beymälim.

Osı twrğıda belgili jurnalist Asılhan Mamaşwlı bılay deydi: Alğaş sayasattanuşı retinde tanılğan Erlan Qarin «Nwr-Otannıñ» da, oğan jwtılğan «Asar» partiyasınıñ da basşılığında boldı. Prezident janındağı strategiyalıq zertteuler institutın basqardı. Bwl twrğıdan kelgende onıñ wltşıldığı memlekettik qızmet rwqsat etiletin deñgeyde deuge bolar. Ol bwrınnan basşılıq qızmette kele jatqandıqtan bilikke jañadan tartılğandar qatarına äste qosa almaysız. Ädette jwrtşılıq qoğammen baylanısı jaqın, jemqorlıqpen baylanısı bayqalmağan, wlttıq müdde turalı özine berilgen mümkindik şeginde aytıp jürgenderdi jatqızadı. Erlan Qarindi osı topqa jatqızatının bayqaymın. Biraq, ol özin wltşıl patriotpın dep sanay ma, sonı anıqtau kerek şığar. Öytkeni, bilikte jürgender olay aytudan türli sebeptermen tartınadı dep oylaymın. Al belgili sayasattanuşı Aydos Sarımnıñ wlttıq kitaphana keñesşiligine tağayındaluınan sensaciya izdep keregi joq. Öytkeni, kitaphana direktorınıñ keñesşiligi memlekettik qızmet emes, tipti qoğamdıq jwmısqa jaqın deuge bolatın şığar. Sondıqtan wltşıldardı bilikke tartıp jatır degen pikirmen kelispeymin.

Qorıta kelgende, Qazaqstannıñ qazirgi jağdayında bilik özine qarsı pikir aytatın özgeşe oylaytın azamattardı öz qatarına qospaytını belgili. Joğarıda atı atalğan azamattardıñ el işinde qoğamdıq oy, pikir qalıptastıruda alatın orındarı erekşe ekendigin eskersek, Aqorda osı arqılı halıq arasında özine jağımdı pikir qalıptastırğısı kelgendey äser qaldıradı.

Äytpese, zayırlı Qazaqstan zañı boyınşa wlttıq partiya qwruğa bolmaytın elde memlekettik qızmetke wltşıldardı jwmısqa tartıp, qatarın köbeyitpese kerek edi...

“The Qazaq Times”