Foto: Kazinform

Qazaqstan Ükimeti Äzerbayjannıñ Halıqaralıq bankine salınğan qazaqstandıqtardıñ zeynetaqı aktivterin qwrılımdaudıñ üş nwsqasın qaraydı. Bwl turalı Qarjı ministri Baqıt Swltanov ükimet otırısında mälimdedi.

«Mäsele Äzerbayjan halıqaralıq bankiniñ obligaciyalarına salınğan BJZQ qarjısına qatıstı. Bwl swraq qoğamda ünemi talqılanıp jatır. Endi otırısta osı mäselege toqtalsaq", - dedi prem'er-ministr Baqıtjan Sağıntaev.

Onıñ sözinşe, "QR zeynetaqımen qamsızdandıru turalı" zañına säykes, "BJZQ" AQ-ğa ükimet ielik etedi, sondıqtan memleket mindetti zeynetaqı jarnalarınıñ saqtaluına kepildik beredi.

Öz kezeginde Qarjı ministri Baqıt Swltanov 2014 jıldıñ qazanında  BJZQ zeynetaqı aktivteriniñ portfeline qwnı 250 mln dollardı qwraytın Äzerbayjan halıqaralıq bankiniñ borıştıq bağalı qağazdarı 10 jıl öteu merzimimen  jäne 8,25% kupondıq mölşerlememen ornalastırılğanın atap ötti. Al Wlttıq banktiñ mälimetinşe, 2014 jıldan beri atalğan banktegi qarjınıñ 52 mln dolları (15 mlrd teñge) sıyaqı retinde BJZQ-ğa qaytarılğan.

«Sizdiñ tapsırmañızben men Äzerbayjandağı qarjı ministrimen söylestim jäne olarmen ünemi baylanıstamın. Onıñ tüsindiruinşe, Äzerbayjannıñ wlttıq valyutası daval'vaciyağa wşırağan soñ, Äzerbayjan halıqaralıq banki kreditorlar aldındağı öziniñ mindetterin orındaudı toqtatqan. Äriptesterim "Äzerbayjan ükimeti bank kreditorlarınıñ mäselelerin retteu üşin bar küşimizdi saladı" dep otır", - dedi Swltanov prem'er-ministrge.

Ayta keteyik, 23 mamır küniÄzerbayjan banki kreditorlar aldındağı borıştı qwrılımdaudıñ üş nwsqasın wsınğan. Olar wsınğan üş nwsqa tömendegidey:

Birinşisi - ÄHB-tiñ 250 mln dollar qarızın Äzirbayjan Respublikasınıñ memlekettik qwndı qağazdarı türinde 200 mln AQŞ dollar etip, 12 jılda 5,125 payız mölşerlememen qaytaru.

Ekinşisi - 250 mln dollar qarızdı Äzirbayjan Respublikasınıñ memlekettik qwndı qağazdarı retinde 15 jılda 3,5 payızdıq mölşerlememen qaytaru.

Üşinşisi - 250 mln AQŞ dolların Äzirbayjan Respublikasınıñ memlekettik qwndı qağazdarı retinde 7 jılda 3,5 payızdıq üstememen 250 mln AQŞ dollar etip qaytaru.

Sonday-aq, Baqıt Swltanov Ükimet otırısında osı jıldıñ şilde ayında banktiñ qwrılımdau boyınşa wsınğan nwsqaları boyınşa kreditorlardıñ jinalısı bolatının atap ötti. Eger qwrılımdauğa qatıstı kreditorlar tarapınan qoldau bolatın bolsa, onda odan keyingi şaralar qolğa alına bastaydı.

«Äzerbayjan tarapı mälimdegendey, bwl jwmıs osı jıldıñ küzinde ayaqtaluı mümkin. Sondıqtan sizdiñ tapsırmañız boyınşa barlığı baqılauda boladı jäne sizge barlıq aqparat uaqıtılı habarlanadı", - dedi Baqıt Swltanov prem'er Sağıntaevqa.

Eske salayıq, birneşe apta bwrın qazaqstandıq ekonomister tarapınan Äzerbayjan halıqaralıq bankine zeynetaqı qorınıñ 71,3 mlrd teñgesi investiciyalanğanı turalı aqparat tarağan edi. Endi qazaqstandıqtar "salınğan qarjı qaytpay qaluı mümkin" dep qauiptenip otır.  Degenmen Äzerbayjan biligi "qarajat qaytarıladı" deydi.

“The Qazaq Times”