فوتو: كازينفورم

قازاقستان ۇكىمەتى ازەربايجاننىڭ حالىقارالىق بانكىنە سالىنعان قازاقستاندىقتاردىڭ زەينەتاقى اكتيۆتەرىن قۇرىلىمداۋدىڭ ءۇش نۇسقاسىن قارايدى. بۇل تۋرالى قارجى ءمينيسترى باقىت سۇلتانوۆ ۇكىمەت وتىرىسىندا مالىمدەدى.

«ماسەلە ازەربايجان حالىقارالىق بانكىنىڭ وبليگاتسيالارىنا سالىنعان بجزق قارجىسىنا قاتىستى. بۇل سۇراق قوعامدا ۇنەمى تالقىلانىپ جاتىر. ەندى وتىرىستا وسى ماسەلەگە توقتالساق", - دەدى پرەمەر-مينيستر باقىتجان ساعىنتاەۆ.

ونىڭ سوزىنشە، "قر زەينەتاقىمەن قامسىزداندىرۋ تۋرالى" زاڭىنا سايكەس، "بجزق" اق-عا ۇكىمەت يەلىك ەتەدى، سوندىقتان مەملەكەت مىندەتتى زەينەتاقى جارنالارىنىڭ ساقتالۋىنا كەپىلدىك بەرەدى.

ءوز كەزەگىندە قارجى ءمينيسترى باقىت سۇلتانوۆ 2014 جىلدىڭ قازانىندا  بجزق زەينەتاقى اكتيۆتەرىنىڭ پورتفەلىنە قۇنى 250 ملن دوللاردى قۇرايتىن ازەربايجان حالىقارالىق بانكىنىڭ بورىشتىق باعالى قاعازدارى 10 جىل وتەۋ مەرزىمىمەن  جانە 8,25% كۋپوندىق مولشەرلەمەمەن ورنالاستىرىلعانىن اتاپ ءوتتى. ال ۇلتتىق بانكتىڭ مالىمەتىنشە، 2014 جىلدان بەرى اتالعان بانكتەگى قارجىنىڭ 52 ملن دوللارى (15 ملرد تەڭگە) سىياقى رەتىندە بجزق-عا قايتارىلعان.

«ءسىزدىڭ تاپسىرماڭىزبەن مەن ازەربايجانداعى قارجى مينيسترىمەن سويلەستىم جانە ولارمەن ۇنەمى بايلانىستامىن. ونىڭ تۇسىندىرۋىنشە، ازەربايجاننىڭ ۇلتتىق ۆاليۋتاسى داۆالۆاتسياعا ۇشىراعان سوڭ، ازەربايجان حالىقارالىق بانكى كرەديتورلار الدىنداعى ءوزىنىڭ مىندەتتەرىن ورىنداۋدى توقتاتقان. ارىپتەستەرىم "ازەربايجان ۇكىمەتى بانك كرەديتورلارىنىڭ ماسەلەلەرىن رەتتەۋ ءۇشىن بار كۇشىمىزدى سالادى" دەپ وتىر", - دەدى سۇلتانوۆ پرەمەر-مينيسترگە.

ايتا كەتەيىك، 23 مامىر كۇنىازەربايجان بانكى كرەديتورلار الدىنداعى بورىشتى قۇرىلىمداۋدىڭ ءۇش نۇسقاسىن ۇسىنعان. ولار ۇسىنعان ءۇش نۇسقا تومەندەگىدەي:

ءبىرىنشىسى - ءاحب-ءتىڭ 250 ملن دوللار قارىزىن ءازىربايجان رەسپۋبليكاسىنىڭ مەملەكەتتىك قۇندى قاعازدارى تۇرىندە 200 ملن اقش دوللار ەتىپ، 12 جىلدا 5,125 پايىز مولشەرلەمەمەن قايتارۋ.

ەكىنشىسى - 250 ملن دوللار قارىزدى ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 15 جىلدا 3,5 پايىزدىق مولشەرلەمەمەن قايتارۋ.

ءۇشىنشىسى - 250 ملن اقش دوللارىن ءازىربايجان رەسپۋبليكاسىنىڭ مەملەكەتتىك قۇندى قاعازدارى رەتىندە 7 جىلدا 3,5 پايىزدىق ۇستەمەمەن 250 ملن اقش دوللار ەتىپ قايتارۋ.

سونداي-اق، باقىت سۇلتانوۆ ۇكىمەت وتىرىسىندا وسى جىلدىڭ شىلدە ايىندا بانكتىڭ قۇرىلىمداۋ بويىنشا ۇسىنعان نۇسقالارى بويىنشا كرەديتورلاردىڭ جينالىسى بولاتىنىن اتاپ ءوتتى. ەگەر قۇرىلىمداۋعا قاتىستى كرەديتورلار تاراپىنان قولداۋ بولاتىن بولسا، وندا ودان كەيىنگى شارالار قولعا الىنا باستايدى.

«ازەربايجان تاراپى مالىمدەگەندەي، بۇل جۇمىس وسى جىلدىڭ كۇزىندە اياقتالۋى مۇمكىن. سوندىقتان ءسىزدىڭ تاپسىرماڭىز بويىنشا بارلىعى باقىلاۋدا بولادى جانە سىزگە بارلىق اقپارات ۋاقىتىلى حابارلانادى", - دەدى باقىت سۇلتانوۆ پرەمەر ساعىنتاەۆقا.

ەسكە سالايىق، بىرنەشە اپتا بۇرىن قازاقستاندىق ەكونوميستەر تاراپىنان ازەربايجان حالىقارالىق بانكىنە زەينەتاقى قورىنىڭ 71,3 ملرد تەڭگەسى ينۆەستيتسيالانعانى تۋرالى اقپارات تاراعان ەدى. ەندى قازاقستاندىقتار "سالىنعان قارجى قايتپاي قالۋى مۇمكىن" دەپ قاۋىپتەنىپ وتىر.  دەگەنمەن ازەربايجان بيلىگى "قاراجات قايتارىلادى" دەيدى.

“The Qazaq Times”