نۇر وتاننىڭ پرايمەريزىنە قانشا قارجى جۇمسالدى؟

پارلامەنت سايلاۋى قارساڭىندا بويىنا قان جۇگىرگەن بيلىك پارتياسى نۇر وتاننىڭ پرايمەريزىن وتكىزۋگە قانشا قاراجات جۇمسالدى؟ قارجى قايدان الىندى؟ ساياسي ناۋقانعا ساراپشىلار قانداي باعا بەردى؟

6 قازاندا ورتالىق كوممۋنيكاتسيالار قىزمەتىندە وتكەن بريفينگتە بيلىك پارتياسىنىڭ ىشكى ىرىكتەۋ قورىتىندىسىنا جاۋاپتى حاتشىسى ارمان قىرىقباەۆ QT تىلشىسىنە پرايمەريز بيۋدجەتىنىڭ ەسەبىن بەرۋگە ۋادە بەرگەن. پارتيانىڭ قوعاممەن بايلانىس دەپارتامەنتىنىڭ وكىلى شالباەۆ بيكەجان ايدارۇلى ۇسىنعان جاۋاپقا قاراعاندا، پرايمەريزگە 230 ميلليوننان استام تەڭگە قارجى جۇمسالعان.

«ەلىمىزدىڭ بارلىق وڭىرلەرىندە پارتيانىڭ اۋقىمدى ۇيىمداستىرۋشىلىق-اقپاراتتىق بازاسى بويىنشا 247 فيليالى بولعاندىقتان، پرايمەريز سياقتى اۋقىمدى ءىس-شارانى وتكىزۋگە بار-جوعى 230,2 ملنتەڭگە قاراجات جۇمسالدى»، – دەلىنگەن پارتيانىڭ ءباسپاسوز قىزمەتى جولداعان جاۋاپتا.

3 مىڭداي ساعاتقا سوزىلعان جاريا پىكىرسايىستاردى وتكىزۋگە جۇمسالعان قاراجات كولەمى قانشالىقتى قيسىندى ەكەنى بەلگىسىز. رەسمي اقپاراتقا سايكەس قارجىنىڭ جۇمسالۋ رەتى مىناداي:

• ونلاين ترانسلياتسيانى قامتاماسىز ەتۋگە ارنالعان قاجەتتى جابدىقتار، دەباتتار وتكىزىلەتىن ورىنداردى جانە داۋىس بەرۋ ۋچاسكەلەرىن دايىنداۋعا، سونداي-اق وپەراتورلاردىڭ قىزمەتتەرى – 45,4 ملن تەڭگە;
• «پرايمەريز» اقپاراتتىق جۇيەسى جانە ونىڭ موبيلدىك قوسىمشاسى – 40,6 ملن تەڭگە;
• «پرايمەريز» اقپاراتتىق جۇيەسى ارقىلى تىركەۋ جانە داۋىس بەرۋ تۋرالى پارتيا مۇشەلەرىنە حابارلاما جىبەرۋ قىزمەتى – 29,9 ملن تەڭگە;
• «قازاقتەلەكوم» اق عيماراتتاردا سەرۆەرلەردى جالعا بەرۋ قىزمەتى (نەگىزگى جانە رەزەرۆتىك Data-ورتالىقتار) – 29,3 ملن تەڭگە;
• «پرايمەريز» اقپاراتتىق جۇيەسىنە ارنالعان كەڭ اۋقىمدى ينتەرنەت ارناسىنىڭ قىزمەتى – 4,5 ملن تەڭگە;
• پارتيانىڭ وڭىرلىك فيليالدارىنىڭ پرايمەريز وتكىزۋدى ۇيىمداستىرۋ بويىنشا شىعىندارى (بيۋللەتەندەر، عيماراتتاردى جالعا الۋ، كەڭسە تاۋارلارى، پوليگرافيالىق قىزمەتتەر، باننەرلەر جانە ت.ب.) – 80,4 ملن تەڭگە.

پرايمەريزگە جۇمسالعان قاراجات «پارتيانىڭ ءوز ەسەبىنەن» دەلىنگەن. پارتيا قۇرامىندا 786 805 ادام مۇشەلىكتە. پرەزيدەنت توقاەۆ، سەنات پەن ءماجىلىس توراعالارى، ۇكىمەت قۇرامىنان باستاپ اكىمدىك قىزمەتكەرلەرى، مۇعالىمدەرگە دەيىن تۇگەل دەرلىگى وسىندا. جارعى بويىنشا ەڭبەككە جارامدى مۇشەلەر كىرۋگە ارنالعان جانە اي سايىنعى جارنا تولەۋى ءتيىس. بۇل «ەڭ تومەنگى جالاقى مولشەرىنىڭ 0,7% جانە پارتيا مۇشەسىنىڭ قالاۋى بويىنشا ودان دا جوعارى». دەمەك 42,5 مىڭ تەڭگەنىڭ 0,7%-ى، 297,5 تەڭگە.

ال 106 مىڭداي مۇشەسى بار Jas Otan-دا كىرۋ جارناسى الىنبايدى دەسەدى. بىراق ستۋدەنتتەر – ەڭ تومەنگى جالاقىنىڭ 0,07%-ى مولشەرىندە اي سايىن جارنا تولەيدى.

پارتياباسى، ەكس-پرەزيدەنت نازارباەۆتىڭ سەنىمدى وكىلى ءارى ساياسي شاكىرتى، №1 ورىنباسارى باۋىرجان بايبەك ساياسي ناۋقان بارىسىندا ونىڭ قاتارىنا «جاڭادان 42 مىڭ ادام قوسىلۋعا نيەت بىلدىرگەنىن، پارتياىشىلىك جارىسقا 10 مىڭنان اسا ۇمىتكەر قاتىسقانىن» سۇيىنشىلەي حابارلاعان. بۇل – ءبىرىنشى كەزەڭ.

بايبەكتىڭ بايانداۋىنشا, الداعى ۋاقىتتا ءالى ەكى كەزەڭ بار. ەكىنشى كەزەڭدە اۋداندىق جانە قالالىق كونفەرەنتسيالار ءوتىپ، وندا جاسىرىن داۋىس بەرۋ ارقىلى ءتيىستى ءماسليحاتتار سايلاۋلارىنا ارنالعان پارتيالىق تىزىمدەر بەكىتىلەدى. مۇندا ءۇش مەگاپوليستەن وزگە وڭىرلەردىڭ كانديداتتارى اۋداندىق جانە وبلىستىق پىكىرسايىسقا تۇسەدى. ءبىر قىزىعى – قازىرگى ءماجىلىس قۇرامىنداعى پارتيا دەپۋتاتتارى ءۇشىنشى دەڭگەيدەگى پارتياىشىلىك ىرىكتەۋگە قاتىساتىن كورىنەدى. كونفەرەنتسيا-پىكىرسايىستاردان وتكەندەر وبلىستىق ماسليحاتتارعا قورىتىندى ءتىزىم رەتىندە رەزەرۆكە الىنباق. ال ماجىلىسكە ارنالعان قورىتىندى ءتىزىم – «Nur Otan» سەزىندە بەكىتىلەدى ەكەن.

پرايمەريزگە قاتىسۋشىلار مەن باقىلاۋشىلار نۇر وتاننىڭ ساياسي ناۋقانىن «ءادىل وتپەدى»، «ۇمىتكەرلەرگە تەڭ مۇمكىندىك بەرمەدى» دەپ سىناعان. ساراپشىلار پرايمەريزدى «باسەكە يلليۋزياسىنا» بالايدى. ناقتىراق ايتقاندا، ساياساتتانۋشى دوسىم ساتپاەۆ مۇنى حالىققا ەمەس، «نازارباەۆ پەن ەليتانىڭ ماڭىزدى بولىگىنە «نۇر وتاننىڭ» ءالى دە قاۋقارى بارىن كورسەتۋ ءۇشىن ۇيىمداستىرىلعان يميتاتسيا» دەسە، ال  شالقار نۇرسەيىت «ساياسي قويىلىم»، بەلسەندى توعجان قوجاليەۆا «ونلاين سايلاۋ الدىنداعى رەپيتيتسيا» دەپ باعالادى.

1999 جىلى مەرزىمىنەن بۇرىن وتكەن پرەزيدەنت سايلاۋىنان كەيىن كانديدات نۇرسۇلتان نازارباەۆتىڭ سايلاۋ شتابىنىڭ نەگىزىندە قۇرىلعان پارتيا ءوزىن حالىقتىق، دەموكراتيالىق پارتيا رەتىندە دارىپتەيدى. ءاۋ باستا «وتان» پارتياسى دەپ اتالعان ول مەملەكەتتىك ءانۇران اۋىسقان 2006 جىلى نازارباەۆ ەسىمىنىڭ العاشقى بۋىنى قوسىلىپ، اتاۋى «نۇر وتان» دەپ وزگەردى.

"The Qazaq Times"