بيىل ماۋسىمدا الماتى  قالاسى اۋەزوۆ اۋداندىق سوتىنىڭ ۇكىمىنە ساي "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەككە 950 مىڭ تەڭگە كولەمىندە ايپپۇل تولەۋگە مىندەتتەلگەن وپپوزيتسيا بەلسەندىسى جانبولات ماماي سوت مىندەتتەگەن اقشانى حالىقتان "بايبەككە ساداقا" دەگەن اكتسيا ارقىلى جينايتىنىن مالىمدەدى.  

ء"بىز بايبەككە ساداق جينايىق دەپ وتىرمىز. الماتىنىڭ كوشەلەرىندە جينايمىز، الەۋمەتتىك جەلىلەر ارقىلى جينايمىز. وسى قاراجاتتى بايبەككە جيناپ بەرۋدى دۇرىس دەپ ساناپ وتىرمىز. ويتكەنى بايبەك - حالىقتى سورىپ كەلە جاتقان شەنەۋنىك. بۇرىن ونىڭ ۇرلاپ جۇرگەنى جاسىرىن بولدى. ياعني، قۇپيا تۇردە، جابىق تۇردە ۇرلاپ جاتتى. ەشكىمگە كورسەتپەي. ەندى ءبىز حالىقتى قالاي توناپ جاتقاندىعىن ساداقا جيناۋ ارقىلى بۇكىل الەمگە پاش ەتكىمىز كەلىپ وتىر" دەدى جانبولات مايماي سەيسەنبى كۇنى الەۋمەتتىك جەلىگە جاريالاعان ۆيدەوسىندا.

ماۋسىمدا شىققان سوت شەشىمىنە ساي، ماماي مەن ايەلى ينگا يمانباي بايبەك جايلى ءفيلمدى ينتەرنەتتەن ءوشىرىپ، ونداعى دەرەكتى جوققا شىعارۋعا مىندەتتەلگەن. بىراق جانبولات ماماي الەۋمەتتىك جەلىگە جاريالانعان ۆيدەو وشىرىلمەيتىنىن جانە ونى تەرىسكە شىعارمايتىنىن مالىمدەدى.

بايبەك پەن ماماي اراسىنداعى داۋدىڭ تۋىنداۋىنا ءساۋىر ايىندا شىققان فيلم-زەرتتەۋ تۇرتكى بولعان. جانبولات ماماي ساۋىردە Youtube-تەگى "دەموكراتيالى قازاقستان/دەموكراتيچەسكي كازاحستان" ارناسىندا "باۋىرجان بايبەك: نازارباەۆ سىنىپتاسى بالاسىنىڭ جەمقور بيزنەس-يمپەرياسى" اتتى ۆيدەو جاريالاعان. دەرەكتى فيلم ستيلىندە تۇسىرىلگەن ۆيدەودا جانبولات ماماي الماتىنىڭ بۇرىنعى اكىمى باۋىرجان بايبەكتى "مەملەكەتتىك قىزمەتتە ءجۇرىپ ۇلكەن بيزنەس-يمپەريا قۇردى", "الماتى اكىمى بولعان 4 جىلدا 1 ميلليارد دوللار زاڭسىز اقشا تاپتى", "قۇرىلىسقا جانە كولىك تۇراعىنا" قالا اۋماعىنىڭ جانە ىلە-الاتاۋ ۇلتتىق پاركىنىڭ "جەرىن بەردى", "پارا الدى", "كومىر مافياسىن قۇردى" جانە الماتىداعى جەس-2-ءنى "گازعا كوشىرۋدى كەشەۋىلدەتتى", "ادام قۇقىقتارىن بۇزدى" دەپ ايىپتاعان. ال بايبەك "مامايدىڭ ايتقاندارى دالەلسىز" دەپ سوتقا شاعىمدانعان.

The Qazaq Times