ميانما باسشىسى بۇۇ باس اسسامبلەياسىنىڭ جيىنىنا قاتىستىرىلمايدى

روحيندجا مۇسىلماندارىنا جاسالعان زورلىق-زومبىلىق ىستەرىنە بايلانىستى ميانما باسشىسى اۋن سان سۋ چيگە كوپتەگەن ەلدەردەن نارازىلىقتار كۇشەيە تۇسكەندىكتەن، ول بۇۇ باس اسسامبلەياسىنىڭ ىستەرىنە قاتىستىرىلمايتىن بولدى. بۇل تۋرالى BBC-ءدىڭ ونلاين قىزمەتى حابارلايدى.

بۇۇ قاۋىپسىزدىك كەڭەسى بۇگىن ميانماداعى قاندى قىرعىنعا قاتىستى كەزەكتەن تىس ءماجىلىس اشادى. حالىقارالىق قاۋىمداستىقتىڭ مالىمەتىنە قاراعاندا، روحيندجا مۇسىلماندارىنا قارسى اسكەري ارەكەتتەن 400-دەن استام ادام قازا بولىپ، 370 مىڭ حالىق بانگلادەشكە باس ساۋعالاپ قاشىپ بارعان.

اتالعان ايماقتا كەيبىر اۋىلدار تولىعىمەن ورتەلگەن. بۇۇ وسى ىستەرگە بايلانىستى ميانما ۇكىمەتىن ەتنيكالىق قىرعىنعا جول بەرگەنى ءۇشىن ايىپتاپ وتىر. ال ميانما ۇكىمەتى بولسا وزدەرىنىڭ روحيندجانىڭ بۇلىكشى كۇشتەرىمەن كۇرەسىپ جاتقانىن، قاراپايىم حالىقتىڭ زارداپ شەگىپ جاتپاعانىن ايتۋدا.

ميانما ۇكىمەتى نە دەسە دە، تۇرعىندارىنىڭ باسىم كوبى بۋدديستتەردەن تۇراتىن راكحاين شتاتىنداعى مۇسىلمان ازشىلىققا جاسالعان قىسىمدى جاسىرىپ قالا المايدى. ءارى روحينجا مۇسىلماندارى سان جىلدان بەرى ميانمادا جاساپ كەلە جاتقانىنا قاراماستان ميانما ۇكىمەتى ولاردى بوسقىندار قاتارىندا ساناپ كەلگەن.

الەمدىك قاۋىمداستىق جانە كوپتەگەن ەلدىڭ ۇكىمەتتەرى ميانما باسشىسىن "قىرعىندى توقتاتىپ، مۇسىلمان ازشىلىقتى قورعاپ قالۋعا ارەكەت ەتپەدى" دەپ ايىپتادى. ايتا كەتەلىك، اۋن سان سۋ چي وسىدان ەكى جىل بۇرىن بيلىك باسىنا كەلگەن. ودان بۇرىن دەموكراتيانى قولداۋداعى قىزۋ قاندى ارەكەتتەرى ءۇشىن 15 جىل ءۇي قاماعىندا بولعان. وسى ءۇشىن دە وعان بەيبىتشىلىك نوبەل سىيلىعى بەرىلگەن. بىراق سوڭعى قىرعىن ارەكەتىندەگى جاۋاپسىزدىعى ءۇشىن بۇۇ باس اسسامبلەياسى جينالىسقا قاتىستىرمايتىن بولدى.

“The Qazaq Times”