ميانما ارمياسى حالىققا وق اتۋدا: حالىقارالىق قاۋىمداستىقتىڭ ەسكەرتۋىن ەلەمەدى

ميانمانىڭ حالقى ەل بيلىگىن باسىپ العان اسكەريلەرگە قارسى نارازىلىق شاراسىن توقتاتقان جوق. سارسەنبى كۇنى اسكەري بيلىك نارازى جۇرتقا تاعى دا وق اتتى. الايدا، بۇل جولى شامامەن 40 ادام كوز جۇمىپ، اسكەري توڭكەرىستەن بەرگى ەڭ كوپ ادام شىعىنى تىركەلدى.

بىرىككەن ۇلتتار ۇيىمى ميانماداعى اسكەريلەردىڭ حالىققا وق اتۋىنا قاتاڭ نارازىلىعىن ءبىلدىردى. حالىقارالىق قاۋىمداستىقتىڭ ميانما ءىسى بويىنشا وكىلى كريستين شرانەردىڭ مالىمەتىنە قاراعاندا اسكەري بيلىككە قارسى نارازىلىق شەرۋلەرىندە كەمىندە 50 ادام كوز جۇعان.

نارازى جۇرت ارميادان ازاماتتىق بيلىكتى قايتارىپ بەرۋدى تالاپ ەتۋدە. ەلدىڭ ەڭ ءىرى قالالارىندا مىڭداعان، ون مىڭداعان ادام كوشەلەردى تولتىرىپ، ءوزىنىڭ نارازىلىعىن كورسەتۋدە. كەي قالالاردا قاۋىپسىزدىك كۇشتەرىمەن قاقتىعىستار ءجيى بولىپ جاتىر. ارميا ەسكەرتۋسىز وق اتىپ جاتسا دا جۇرتشىلىقتىڭ نارازىلىق شاراسىن توقتاتا المادى.

توڭكەرىستەن كەيىنگى زورلىق-زومبىلىق ارەكەتتەرى ارقىلى ميانما ارمياسى الەم ەلدەرى مەن حالىقارالىق قاۋىمداستىقتىڭ كۇشتى ايىپتاۋىنا ۇشىراپ جاتىر. الايدا، ارميا گەنەرالدارى ەسكەرتۋلەرگە كوڭىل اۋدارىپ جاتقانى بايقالمايدى. اقش مەملەكەتتىك دەپارتامەنتى كەشە ميانماعا قاتىستى قاتاڭ مالىمدەمە جاساپ، ءوز وداقتاستارىن ميانمانىڭ اسكەري بيلىگىن بىرلەسىپ اۋىزدىقتاۋعا شاقىردى.

دەرجاۆالاردىڭ ءوزى ميانماداعى وقيعاعا الاڭداپ وتىر. سەبەبى، ميانما جاعدايىنىڭ وڭىرلىك قاۋىپسىزدىككە كەرى اسەر ەتەتىن اۋقىمدى ماسەلەگە اينالىپ كەتۋىنەن قاۋىپتەنەدى. بىراق، ەل بيلىگىن باسىپ العان اسكەريلەر شەتەلدىك سىن-پىكىرلەرگە پىسقىرىپ تا قاراعان جوق. كەرىسىنشە، وزدەرىنىڭ ساياساتىن جالعاستىرۋدا بەلسەندىلىك تانىتۋدا.

ايتا كەتەيىك، ميانما ەلى 1962 جىلدان 2011 جىلعا دەيىن اسكەري رەجميدە باسقارىلىپ كەلگەن. وسى جىلدار ارالىعىندا ەلدە بىرنەشە رەت اسكەريلەرگە قارسى ەرەۋىلدەر بولعان. 1988 جىلعى نارازىلىق كەزىندە 3000 ادام كوز جۇمسا، 2007 جىلى 30 ادام قازا تاپقان. 2011 جىلى اۋن سان سۋ چي «دەموكراتيا ءۇشىن ۇلتتىق ليگا» پارتياسىن باستاپ بيلىككە جەتىپ، ەلدى دەموكراتيالىق جولعا سالۋعا ۋادە ەتكەن. ول بۇل نوبەلدىڭ «بەيبىتشىلىك سالاسىنداعى» سىيلىعىن دا العان. بيىل 1 اقپان كۇنى ەلدەگى اسكەريلەر توڭكەرىس جاساپ، بيلىكتى باسىپ الدى جانە اۋن سان سۋ چي باستاعان بيلىك پارتياسىنىڭ جەتەكشىلەرىن قاماۋعا الدى. ەلدە نارازىلىق جالعاسىپ جاتىر.

“The Qazaq Times”