ورتا ازيا ەلدەرى باسشىلارىنىڭ ءتورتىنشى كونسۋلتاتيۆتى كەزدەسۋى ءوز مارەسىنە جەتتى. بىرقاتار ماڭىزدى قۇجاتتارعا قول قويىلىپ، ورتاق مالىمدەمەلەر جاسادى. فوتو: قىرعىزستان پرەزيدەنتى اپپاراتۋراسى.

قىرعىزستاننىڭ چولپون-اتا قالاسىندا وتكەن ورتالىق ازيا ەلدەرىنىڭ باسشىلارىنىڭ ءتورتىنشى كونسۋلتاتيۆتى كەزدەسۋىندە تاراپتار بىرقاتار قۇجاتتاردى قابىلدادى جانە بىرلەسكەن مالىمدەمەسىن جاريالادى. قاتارىندا وڭىرلىك ىنتىماقتاستىقتى دامىتۋ بويىنشا 2022-2024 جىلدار ارالىعىنا ارنالعان جول كارتاسى دا بار.

اقوردانىڭ ءباسپاسوز قىزمەتى حابارىنا قاراعاندا، چولپون-اتادا قابىلدانعان قۇجاتتار قاتارىندا ورتالىق ازيا مەملەكەتتەرىنىڭ كوپجاقتى فورماتتار اياسىنداعى ءوزارا ءىس-قيمىلدارىنىڭ تۇجىرىمداماسى; ورتالىق ازياعا ارنالعان «جاسىل كۇن ءتارتىبى» اتتى ايماقتىق باعدارلامالار بار. سوڭعى اتالعان باعدارلاما اياسىندا ارالدىڭ ەكولوگيالىق جاعدايىن ايماقتىڭ ورتاق ماسەلەسىندە قاراستىرا وتىرىپ شەشۋ كوزدەلگەن.

ەڭ ماڭىزدىسى وا ءححى عاسىردا ايماقتى دامىتۋدى كوزدەيتىن دوستىق، تاتۋ كورشىلىك جانە ىنتىماقتاستىق تۋرالى شارتتى بەكىتتى. مالىمەتتەرگە قاراعاندا، بۇل ماڭىزدى شارتقا قازاقستان، وزبەكستان جانە قىرعىزستان پرەزيدەنتتەرى قول قويعان، ال تاجىكستان مەن تۇركىمەنستان باسشىلارى ءوز ەلىندەگى جولكارتالارى اياقتالعاننان كەيىن قول قوياتىنى ايتىلعان.

سونداي-اق، وا ەلدەرى پرەزيدەنتتەرى ارال تەڭىزىن قۇتقارۋ حالىقارالىق قورىنىڭ پرەزيدەنتى ەمومالي راحمونيدىڭ وكىلەتتى مەرزىمىن ۇزارتۋ بويىنشا كەلىسكەن.

ءتورت توڭىرەك كوز تىككەن ءوڭىر باسشىلارىنىڭ باس قوسۋىندا قابىلدانعان قۇجاتتار ايماقتىڭ ىنتىماقتاستىقتى تەرەڭدەتۋگە باعىتتالعانى ايقىن كورىنەدى. بۇل قابىلدانعان قۇجاتتار مەن باعدارلامالار ايماق ەلدەرىنىڭ ىشكى ينتەگراتسياسىن، سول ارقىلى جاھاندىق گەوساياسي قاۋىپتەر مەن سىن-قاتەرلەرگە قارسى ورتاق جۇمىلۋىنا جول اشادى دەپ ۇمىتتەنەمىز.

The Qazaq Times