"اۋعانستان بولاشاعى". فوتو: اشىق دەرەككوزدەردەن.

اۋعانستاندا شەكارا ايماقتار مەن ءىرى قالالاردى بىرىنەن كەيىن ءبىرىن وزىنە قاراتقان تالىپتەر ورتالىق قالا كابۋلعا شابۋىل قويدى. قالاعا كىرەتىن ماڭىزدى جول وتكەلدەرى قىسقا عانا شابۋىلداردان كەيىن "تاليباننىڭ" باقىلاۋىنا ءوتتى. ەلدە بيلىك الماساتىنى ايدان انىق بولدى. ءتىپتى، پرەزيدەنت اشراف عانيدىڭ ەلدەن شىعىپ كەتكەنى تۋرالى دا اقپارات تارادى. 

اشراف عانيدىڭ پرەزيدەنت سارايىن تاستاپ كەتكەنى تۋرالى اقپاراتتى رەسەيدىڭ اۋعانستانداعى ەلشىلىگى حابارلاعان. وزگە دە بىرنەشە اقپارات قۇرالدارى بۇل تۋرالى ءوز اقپارات كوزدەرىنە سۇيەنە وتىرىپ حابارلادى. دەگەنمەن، پرەزيدەنت عانيدىڭ ءوزىنىڭ ەلدەن شىعىپ كەتكەنى تۋرالى رەسمي مالىمەت بەرگەن جوق.

تالىپتەردىڭ قارۋلى كۇشتەرى كابۋلعا لاپ قويعاندا ورتالىق قالادا ابىر-سابىر باستالىپ كەتتى. ەلدەن شىعىپ كەتۋگە مۇمكىندىگى بولماعاندار باس قالانى تاستاپ جان-جاققا اعىلىپ جاتقانى تۋرالى اقپاراتتار بۇگىن تۇستەن بۇرىن بىرقاتار شەتەلدىك اقپارات قۇرالدارىندا تاراعان ەدى.

وسى تۇستا "تاليبان" ۇيىمىنىڭ رەسمي وكىلى يالدا حاكيم رەسمي مالىمدەمە تاراتىپ،  ەشقانداي "كەك الۋ" ارەكەتى بولمايتىنىن ايتىپ اۋعانستاندىقتاردى، كابۋل تۇرعىندارىن ابىگەرگە تۇسپەۋگە شاقىرعان. ء"بىز اۋعان حالقىن، ونىڭ ىشىندە كابۋل جۇرتىنىنىڭ باس اماندىعى مەن مال-مۇلكىنىڭ اماندىعىنا كەپىلدىك بەرەتىنىمىزدى ايتقىمىز كەلەدى. ەشكىمنەن ءوش المايمىز", – دەگەن ول مالىمدەمەسىندە. سونداي-اق "تاليبان" وكىلى: "جەتەكشىلەرىمىز قارۋلى كۇشتەرگە قالاعا كىرمەي كابۋىلدىڭ سىرتىندا تۇرۋدى بۇيىردى. ءبىز بيلىكتىڭ تىنىشتىقپەن وتكەرىلىپ بەرىلۋىن قالايمىز", – دەگەن.

اۋعانستان ىشكى ىستەر مينيسترلىگىنىڭ رەسمي مالىمدەمەسىندە دە بيلىكتىڭ تىنىش وتكەرىلىپ بەرىلەتىنى ايتىلىپ قويدى. سونىمەن، اۋعانستاندا جاڭا ۇكىمەت بيلىككە كەلمەك. بۇل ەلدى شاريعات جولىمەن باسقارىپ، يسلامدىق مەملەكەت قۇرعىسى كەلەتىن "تاليبان يسلام قوزعالىسىنان" قۇرىلادى.

اۋعانستانداعى بۇل وزگەرىس ادداعى ۋاقىتتا ورتا ازياداعى گەوساياسي جاعدايدى تۇبەگەيلى وزگەرتىپ جىبەرۋى دە عاجاپ ەمەس. ستسەناريدىڭ بۇلاي دامۋى ءوڭىردىڭ تىنىشتىعى مەن قاۋىپسىزدىگىنە ۇلكەن قورقىنىشتاردى دا، سونداي-اق جاڭا مۇمكىندىكتەردى دە الىپ كەلۋى مۇمكىن.

The Qazaq Times