رەسەيگە قارسى سالىنعان سانكتسيا اسەرى تۋرالى ءتۇرلى اقپاراتتارعا قاراماستان، رەسەي-قىتاي اراسىنداعى ساۋدا قاتىناسى قالىپتى دامىپ كەلە جاتقانى بايقالادى. ايتالىق، قىتايدىڭ كەدەن قىزمەتى جاريالاعان رەسمي مالىمەتتەردە ناۋرىز ايىنداعى ەكىجاقتى ساۋدا قاتىناسى بىلتىرعى جىلمەن سالىستىرعاندا 12 پايىزعا جوعارلاعان.

رەسمي مالىمەتتەر كورسەتكەندەي، اقپان ايىنداعى رەسەي-قىتاي ساۋدا قاتىناسى بىلتىرعىمەن سالىستىرعاندا ازايعان، وعان رەسەيدىڭ ۋكرايناعا باسىپ كىرۋىنە بايلانىستى ءتۇرلى كەدەرگىلەر سەبەپ بولعانىن بولجاۋعا بولادى. الايدا، ناۋرىز ايىندا ەكى ەلدىڭ شەكارالىق ساۋدا بايلانىستارى قايتا جاندانىپ، ءتىپتى بىلتىرعى دەڭگەيدەن اسىپ تۇسكەن.

نازار اۋدارارلىعى، قىتاي-رەسەي ساۋدا قاتىناسىنىڭ ءوسۋ دەڭگەيى قىتايدىڭ جالپى سىرتقى يمپورت-ەكسپورتىنىڭ ءوسۋ كورسەتكىشىنەن الدە قايدا جوعارى.

بەيجىڭنىڭ ۋكراينا ماسەلەسى بويىنشا ۇستانىمى كوپتەن بەرى تالقى تاقىرىبى. ايتالىق، رەسمي بەيجىڭ ۋكراينا جاعدايىنىڭ تەزىرەك بەيبىت كەلىسسوزدەرمەن ءبىتۋىن قالايتىنىن ايتادى، بىراق حالىقارالىق قاۋىمداستىقتا باتىستىڭ رەسەيگە جاساعان سانكتسيالىق قىسىمدارىن سىنايدى.

پۋتين ۋكرايناعا قارسى «ارنايى اسكەري وپەراتسيا» باستاۋدان بۇرىن بەيجىڭگە ساپارلاي بارىپ، قىتاي-رەسەي اراسىنداعى ستراتەگيالىق ىنتىماقتاستىق جوعارى دەڭگەيدە دەگەن باعا بەرىپ قايتقان.

قىتاي رەسەيدەن مۇناي، تابيعي گاز، كومىر جانە اۋىل شارۋاشىلىعى ونىمدەرىن كوبىرەك يمپورتتايدى. بۇنداي ونىمدەر قازىرشە باتىستىڭ رەسەيگە قارسى سانكتسيا تىزىمىنە ەنبەگەن.

باتىس ەلدەرى رەسەيگە قارسى سانكتسيا سالىپ، ونى ماسكەۋدىڭ اگرەسسيۆتى ارەكەتىن توقتاتۋدىڭ ءونىمدى قۇرالى رەتىندە ناسيحاتتاپ جاتقانى بەلگىلى. ولاردىڭ ەسەبىنشە بيىل رەسەي ەكونوميكاسى 10 پايىزعا دەيىن قۇلدىرايدى. بىراق، سۇيتە تۇرا باتىس ەلدەرى قىتايدىڭ رەسەيگە قولداۋ كورسەتۋىنەن قاتتى الاڭدايدى. سەبەبى، قىتاي سانكتسيالارعا قاراماستان رەسەيدەن كىرەتىن يمپورتتى جوعارى دەڭگەيدە ۇستاسا، بۇل رەسەيدى سانكتسيا ارقىلى تىزگىندەۋدى كوزدەگەن باتىستىق قۇلشىنىستى سەلگە كەتىرۋى دە عاجاپ ەمەس.

The Qazaq Times