Resey men Qıtaydıñ şekara saudasınıñ kölemi artuda. foto: China Briefing

Reseyge qarsı salınğan sankciya äseri turalı türli aqparattarğa qaramastan, Resey-Qıtay arasındağı sauda qatınası qalıptı damıp kele jatqanı bayqaladı. Aytalıq, Qıtaydıñ Keden qızmeti jariyalağan resmi mälimetterde naurız ayındağı ekijaqtı sauda qatınası bıltırğı jılmen salıstırğanda 12 payızğa joğarlağan.

Resmi mälimetter körsetkendey, aqpan ayındağı Resey-Qıtay sauda qatınası bıltırğımen salıstırğanda azayğan, oğan Reseydiñ Ukrainağa basıp kiruine baylanıstı türli kedergiler sebep bolğanın boljauğa boladı. Alayda, naurız ayında eki eldiñ şekaralıq sauda baylanıstarı qayta jandanıp, tipti bıltırğı deñgeyden asıp tüsken.

Nazar audararlığı, Qıtay-Resey sauda qatınasınıñ ösu deñgeyi Qıtaydıñ jalpı sırtqı import-eksportınıñ ösu körsetkişinen älde qayda joğarı.

Beyjiñniñ Ukraina mäselesi boyınşa wstanımı köpten beri talqı taqırıbı. Aytalıq, resmi Beyjiñ Ukraina jağdayınıñ tezirek beybit kelissözdermen bituin qalaytının aytadı, biraq halıqaralıq qauımdastıqta Batıstıñ Reseyge jasağan sankciyalıq qısımdarın sınaydı.

Putin Ukrainağa qarsı «arnayı äskeri operaciya» bastaudan bwrın Beyjiñge saparlay barıp, Qıtay-Resey arasındağı strategiyalıq ıntımaqtastıq joğarı deñgeyde degen bağa berip qaytqan.

Qıtay Reseyden mwnay, tabiği gaz, kömir jäne auıl şaruaşılığı önimderin köbirek importtaydı. Bwnday önimder qazirşe Batıstıñ Reseyge qarsı sankciya tizimine enbegen.

Batıs elderi Reseyge qarsı sankciya salıp, onı Mäskeudiñ agressivti äreketin toqtatudıñ önimdi qwralı retinde nasihattap jatqanı belgili. Olardıñ esebinşe biıl Resey ekonomikası 10 payızğa deyin qwldıraydı. Biraq, süyte twra Batıs elderi Qıtaydıñ Reseyge qoldau körsetuinen qattı alañdaydı. Sebebi, Qıtay sankciyalarğa qaramastan Reseyden kiretin importtı joğarı deñgeyde wstasa, bwl Reseydi sankciya arqılı tizgindeudi közdegen batıstıq qwlşınıstı selge ketirui de ğajap emes.

The Qazaq Times