سانكتسيا رەكورتى: رەسەي قۇيعا باتتىپ بارادى

كەشە، رەسەيگە قارسى جاڭا سانكتسيالار سالۋ تۋرالى ماسەلە تالقىلانا سالىسىمەن رۋبل تاريحتاعى ەڭ قۇنسىز شەگىنە بارىپ قايتتى. ماسكەۋ بيرجاسىنىڭ وزىندە اقش دوللارى 116 رۋبلگە جەتتى، دۇيسەنبىنىڭ كەشىنە قاراي باعا قايتا وڭالعانداي بولدى، سونىڭ وزىندە 105 رۋبلگە ءبىر اقش دوللارى تەڭ بولدى. رەسەي ءۇشىن رۋبل قۇنىن رەتتەۋدە ەڭ باستى قيىنشىلىعى ورتالىق بانكتىڭ دارمەنسىز كۇيدە قالۋى. ۇيتكەنى رەسەيلىك باس بانكتىڭ حالىقارالىق اكتيۆتەرى اقش پەن ەو تارابىنان مۇزداتىلىپ تاستالعان.

جاڭا سانكتسيا تارماقتارىندا رەسەيدىڭ گاز جانە نەفتي ەكسپورتتارىنا سانكتسيا سالۋ دا قارالۋى مۇمكىن. بۇل رەسەيگە تيەتىن ەڭ اۋىر سوققىنىڭ ءبىرى، سەبەبى ەل ەكونوميكاسى ءۇشىن ەنەرگيا ەكسپورتىنىڭ ماڭىزى وراسان زور. ەگەر باتىس ءبىر اۋىزدان بۇل سانكتسيا تۇرىنە كەلىسسە، وندا بۇل رەسەي جالپى ىشكى ءونىم قۇنىنىڭ تورتتەن ءبىر پايىزىن جوعالتىپ الادى.

شەتەلدىك ساراپشىلاردىڭ پىكىرىنشە، بۇنداي سوققى رەسەيدى بىردەن دەفولتتىق كۇيگە تۇسىرەدى. ول كەزدە ينفلياتسيا دەڭگەيى 30 پايىزعا جەتىپ، دوللار مەن رۋبل ايىرماسى 200-گە دەيىن جەتەدى، ءارى يمپورت كۇرت قىسقارادى. دەفولت جاعدايىندا رەسەيلىك بانكتەر مەن كومپانيالار ارت-ارتىنان بانكروت بولماق. مەملەكەتتىڭ باستى كىرىس كوزى بۋىلعاننان كەيىن بۇل كاسىپورىنداردى ساقتاپ قالۋعا شاماسى كەلمەيتىنىن بولجاۋعا بولادى.

جاھاندىق ەكونوميكاعا ىقپالى

باتىستىڭ رەسەي ەكونوميكاسىنا بەرگەن سوققىسى بەلگىلى دەڭگەيدە قايتا اينالىپ جاھاندىق ەكونوميكاعا دا سوققى بولىپ تيەدى. سەبەبى، قازىرگى نارىق الەم ءبىر-بىرىمەن شىرمالعان، رەسەيدىڭ مۇناي-گازىنا سالىنعان سانكتسيا ونىڭ جاھاندىق نارىقتاعى جولىن توسقانىمەن ەنەرگيا نارىعىندا ۇلكەن تولقۋلار بولادى. مۇناي مەن گاز باعاسىنىڭ ءوسۋى الەم ەلدەرىنىڭ ەكونوميكاسىنا دا ءوز اسەرىن تيگىزەدى. ايتالىق، Capital Economics كومپانياسىنىڭ قورىتىندىسى بويىنشا، رەسەي نەفتي-گازىنا تولىق شەكتەۋ قويىلسا، نارىقتاعى نەفتي-گازدىڭ باعاسى باررەلىنە 160 دوللارعا جەتەدى، ءارى بۇل ۇزاق ۋاقىتقا ساقتالىپ تۇرۋى مۇمكىن. دەمەك، بۇل ەۋروپا عانا ەمەس، اقش-تاعى جىلۋ بەرۋدىڭ قۇنى ارتادى دەگەندى كورسەتەدى.

سانكتسيا جانە سوعىس شىعىنى

رەسەي قازىر سالىنعان سانكتسيالار سانى جاعىنان دا الەمدەگى ءبىرىنشى ورىندا تۇر. بۇعان دەيىن باتىس تارابىنان سولتۇستىك كورەيا مەن يرانعا دا قىرۋار سانكتسيا سالىنعانى بەلىگىلى، بىراق بۇل جولى رەسەيگە سالىنعان سانكتسيا سانى ولاردان ەسەلەپ اسىپ ءتۇستى. ايتالىق، Castellum.Ai سانكتسيالار جونىندەگى مالىمەت قورىنىڭ دەرەگىنشە ۋكرايناعا قارسى سوعىس اشۋعا دەيىن رەسەيگە قاراتا 2754 ءتۇرلى سانكتسيا سالىنعان ەكەن. ال، قازىر رەسەيگە سالىنعان سانكتسيا سانى 5530-عا جەتتى.

ال، ۋكراينانىڭ رەسەي كۇشتەرىنە قارسى كۇرەسى تاباندى جالعاسۋدا. بۇل رەسەيدىڭ سوعىس شىعىندارىن كۇن ساناپ كوبەيتىپ كەلەدى. رەسەي تارابى سوعىس شىعىندارى تۋرالى تولىق مالىمەت بەرمەگەنىمەن، ۋكراينا جانە وزگە دە تاۋەلسىز اقپارات كوزدەرى تارابىنان سوعىس شىعىندارىنىڭ جوعارى ەكەنىن بىلۋگە بولادى.

ءبىر عانا اۋە كۇشتەرىنىڭ وزىنەن 52 ۇشاق، 69 تىكۇشاق جوعالتقانىن ۋكراينانىڭ قورعانىس مينيسترلىگى مالىمدەدى. رەسەي جاعى بۇل مالىمەتتى راستاعان جوق. بۇدان تىس 300-گە جۋىق تانك پەن مىڭنان استام ساۋىتتى اسكەري كولىك پەن اسكەري تەحنيكالار بار. كەيبىر دەرەككوزدەر، سوعىستا كوز جۇمعان رەسەيلىك جاۋنگەرلەر سانى 10 مىڭنان اسىپ كەتكەنىن ايتادى.

ۋكرايناعا قارجىلاي كومەك

ءبىر عانا دۇنيەجۇزىلىك بانكتىڭ ۋكرايناعا باعىتتالعان قارجىلاي كومەككولەمى قازىرگە دەيىن 3 ملرد اقش دوللارىنا جەتپەك. بۇگىننىڭ وزىندە ۋرايناعا 500 ملن دوللارعا جۋىق قارجى اۋدارىلماق.

بۇلاردى قورىتا كەلە، سوعىس ۇزاققا سوزىلعان سايىن رەسەيدىڭ بارعان سايىن تەرەڭ باتپاققا باتىپ بارا جاتقانىن كورە الامىز. بۇگىن رەسەيدىڭ ۆيتسە-پرەمەرى باتىس جاڭا سانكتسيا سالسا گاز ەكسپورتىن تولىقتاي توقتاتاتىنىن مالىمدەدى، ءارى بۇل قادام باتىس ەلدەرى ءۇشىن دە اۋىر سوققى بولاتىنىن قوسىمشالادى. تاراپتار اراسىنداعى بۇل قايشىلىق بارىنشا تەز جانە بەيبىت جولمەن شەشىم تاپپاعان جاعدايدا ءبارىنىڭ سوڭى جاھاندىق سوعىسقا اپارىپ تىرەيتىنى انىق.

The Qazaq Times