استانا سوتى قىتاي قاماۋىنداعى قازاقستاندىقتىڭ بوساتىلۋىن تالاپ ەتكەن تۋىسىن سوتتادى

استانا اكىمشىلىك سوتى قىتاي بيلىگى شەكارادا ۇستاعان قازاقستان ازاماتى سانالاتىن باۋىرىن ىزدەپ، ەلوداداعى قحر ەلشىلىگى الدىنا بارعان گاۋحار قۇرماناليەۆاعا 30 ايلىق ەسەپتىك كورسەتكىش (87,5 مىڭ تەڭگە نەمەسە 206 دوللار) كولەمىندە ايىپپۇل سالعانى حابارلاندى. ازاتتىق راديوسىنىڭ اقپاراتىنشا, ون شاقتى نارازى پوليتسيانىڭ قازاقستان ازاماتتارى مەن قانداستاردىڭ مۇددەسىنە بولىسۋدىڭ ورنىنا، كەرىسىنشە ءسوز ەركىندىگىن شەكتەۋىنە كەلىسپەيتىنىن ءبىلدىرىپ، تالاپتارىن ايتقان.

قالالىق سوتتىڭ ءباسپاسوز قىزمەتىنىڭ حابارلاۋىنشا، شىڭجاڭداعى تۋىستارىن قايتارۋدى تالاپ ەتىپ، ۇستالعان ون ادامنىڭ قالعانىنا ۇكىم بۇگىن شىعۋى مۇمكىن.

1,3 مىڭ كۇننەن بەرى باۋىرىن ىزدەپ، حابار-وشارىن بىلۋگە تالپىنعان كۇرەسىنەن ەش ناتيجە كورمەگەن گاۋحار قۇرماناليەۆاعا «بەيبىت جيىن وتكىزۋ ءتارتىبىن بۇزۋ» بابى (488-باپ، 6-ءبولىم) بويىنشا ايىپ تاعىلعان. ول بۇعان دەيىن اقپارات قۇرالدارىنا 4 جىل بۇرىن قازاقستان-قىتاي شەكاراسىنداعى «قورعاس» ارنايى ەكونوميكالىق ايماعىندا قىتاي بيلىك وكىلدەرىنىڭ باۋىرى، قازاقستان ازاماتى اسقار ازاتبەكتى ۇستاپ اكەتكەنىن ايتقان.

24 قىركۇيەكتە، جۇما كۇنى سوت ونلاين وتكەن. جاۋاپكەر وعان WhatsApp جەلىسى ارقىلى قاتىسقان. ءىستى سۋديا قانات يماناليەۆ جۇرگىزگەن.

23 قىركۇيەكتە پوليتسيا استاناداعى قىتاي ەلشىلىگى الدىندا تۋىستارىن ەلگە قايتارۋدى تالاپ ەتكەن ون ادامدى ۇستاپ، تۇنگى ساعات 12-گە قاراي بوساتقان. ولارعا پوليتسياعا شاقىرتۋ تاپسىرىلعان. جۇما كۇنى نارازىلار كۇندىز پوليتسيا عيماراتى الدىندا دا تالاپتارىن ايتتى.

شىڭجاڭداعى تۋىستارىن قايتارۋدى تالاپ ەتىپ جۇرگەندەر نارازىلىق اكتسيالارىن الماتى قالاسىندا باستاعان. ولار 220 كۇن بويى الماتىداعى قىتاي كونسۋلدىعىنا بارىپ، بەيجىڭنەن شىڭجاڭداعى تۋىستارىن قازاقستانعا جىبەرۋدى تالاپ ەتكەن. نارازىلار ءۇش اپتا كونسۋلدىق الدىندا تۇنەگەن ەدى. ولاردىڭ ايتۋىنشا، جەتى ايدان استام ۋاقىتقا سوزىلعان اكتسيا بارىسىندا قىتاي كونسۋلدىعىنان بىردە-ءبىر ادام شىعىپ، جاۋاپ بەرمەگەن. ولار بۇعان دەيىن الماتىدا دا اكىمشىلىك جاۋاپقا تارتىلعان.

بۇۇ ەسەبىنشە، قىتاي شىڭجاڭدا لاگەرلەر اشىپ ميلليونعا جۋىق ۇيعىر، قازاق جانە باسقا دا مۇسىلمانداردى جازىقسىز قاماعان. باتىس ەلدەرى بەيجىڭنىڭ شىڭجاڭداعى ارەكەتىن «گەنوتسيد» دەپ تانىعان. قىتاي بيلىگى بۇل ايىپتاردى جوققا شىعارىپ كەلەدى.

قازاقستان بيلىگى قىسىم-قۋدالاۋعا تۇسكەن قانداستاردىڭ جاعدايى تۋرالى تۋىستارىنىڭ (قازاقستان ازاماتى سانالاتىن – QT) جۇزدەگەن ارىزىنا قاراماستان مۇنى «قىتايدىڭ ىشكى شارۋاسى» دەپ سانايدى. تاۋەلسىز ساراپشىلار مۇنى «ەستيتىن ۇكىمەتتىڭ» (قازاقستاننىڭ – QT) ەكونوميكالىق-ينۆەستيتسيالىق مۇددەنى قانداستار ءومىر-قۇقىعىنان جوعارى قويعانىن اڭعارتادى دەپ توپشىلايدى.

The Qazaq Times