فوتو: ratel.kz

جەزقازعان قالاسىنىڭ كءوپ سالالى اۋرۋحاناسىنىڭ قىزمەتكەرلەرى جالاقى جءانە ءوزگە ءالەۋمەتتىك تءولەمدەردىڭ ۋاقىتىندا بەرىلمەي وتىرعاندىعىنا نارازى. مەديتسينا قىزمەتكەرلەرىنىڭ سءوزىنە قاراعاندا، ولار 10 تامىزدا مەكەمە باسشىلىعىنا ارىز جازىپ تاپسىرعان. ءازىرگە جاۋاپ بولماعان, دەپ جازدى ازاتتىق راديوسى.

– جالاقىنى ءبولىپ-ءبولىپ بەرەدى، كەشىكتىرەدى. بىردە 70 مىڭ تەڭگە بەرسە، بىردە 90 مىڭ تەڭگە. 24 ساعات ىستەيمىز. كەلەسى كۇنى ءسال دەمالىپ قايتادان جۇمىسقا شىعامىز. 310 ساعاتقا 120 مىڭ تەڭگە تولەيدى. 310 ساعات بولۋ ءۇشىن نەشە ءتۇن، نەشە كۇن ىستەۋىڭ كەرەك. ءوزىڭىز ەسەپتەي بەرىڭىز. كۇندىزگى ساعاتىمىز 9 ساعاتپەن بەلگىلەنەدى، تۇنگى ساعاتىمىز 15 ساعاتپەن بەلگىلەنەدى. كەيدە "ادام جوق، ادام از" دەپ ءبىزدى 24 ساعاتقا دەيىن ىستەتىپ قويادى، – دەيدى اتى-ءجونىن اتاعىسى كەلمەگەن مەدبيكەلەردىڭ ءبىرى ازاتتىققا.

جۇمىسشىلاردىڭ سوزىنە قاراعاندا، 10 تامىزدا ولارعا 40 مىڭ تەڭگە جالاقى تۇسكەن. "قالعانى قاشان بەرىلەتىنىن بىلمەي وتىرمىز" دەيدى قىزمەتكەرلەر.

اۋرۋحانا قىزمەتكەرلەرى مىندەتتى الەۋمەتتىك مەديتسينالىق ساقتاندىرۋ، زەينەتاقى جارناسى دا ۋاقىتىندا تۇسپەي وتىرعانىن ايتتى.

"مەن مىسالى مامىر ايىندا دەمالىسقا شىقتىم. "وتپۋسكنوي" تەك جۇمىسقا ءبىر اپتا قالعان كەزدە عانا ءتۇستى. جولداسىم كورپوراتسيادا ىستەگەننەن كەيىن عانا اسا قاتتى قينالماي وتىرمىز. نەگىزى ءوزىمىزدىڭ ماڭداي تەرىمىزبەن ىستەگەن ەڭبەكاقىمىزدى الا الماي وتىرمىز. مەن نەگە ونى سۇراي المايمىن؟" دەيدى اۋرۋحانا قىزمەتكەرلەرىنىڭ ءبىرى.

"مەنىڭ مەديتسينا سالاسىندا جۇرگەنىمە 11 جىل بولدى. جاعداي ۋشىعىپ كەتكەنى سونشالىقتى مەنىڭ بۇل سالادا ىستەگىم كەلمەيدى" دەدى ول.

ونىڭ ايتۋىنشا،مەكەمە باسشىلىعى اۋرۋحاناعا ادام از كەلگەندىكتەن تابىس از تۇسەتىنىن، كەتكەن شىعىندى اقتالمايتىنىن العا تارتقان.

مەديتسينا قىزمەتكەرلەردىڭ بارلىعى-دەرلىك اتى-جوندەرىن ازاتتىققا ايتقانمەن جاڭالىقتا كورسەتپەۋدى ءوتىندى. "باسشىلىق قىسىم جاسايدى، جۇمىستان قۋادى، جينالىسقا سالادى" دەيدى ولار.

ازاتتىق ءتىلشىسى 11 تامىزدا جەزقازعان كوپسالالى اۋرۋحاناسىنىڭ بىرنەشە تەلەفونىنا حابارلاسىپ كورگەن ەدى. الايدا تەلەفون تۇتقاسىن ەشكىم كوتەرمەدى. مەكەمە باستىعى مۇراتبەك مالدىبەكۇلى دا ۇيالى تەلەفونىنا جاۋاپ بەرمەدى.

ۇلىتاۋ وبلىسىنىڭ ورتالىعى جەزقازعان كوپسالالى اۋرۋحاناسىنىڭ رەسمي سايتىنداعى مالىمەت بويىنشا، مەكەمەدە 500-دەن استام ادام جۇمىس ىستەيدى. اۋرۋحانا جەزقازعان، ساتپاەۆ قالالارى، جايرەم مەن قاراجال اۋىلدارى تۇرعىندارىنا قىزمەت كورسەتەدى.