بەكشين: الماتىدا جاڭا شتامم بار ما؟ لوكداۋن قاشان ەنگىزىلەدى؟

الماتى قالاسىنىڭ باس سانيتار-دارىگەرى جانداربەك بەكشين تاۋلىگىنە 500 ادامنان كوروناۆيرۋس انىقتالعان جاعدايدا قالا تۇگەلدەي جابىلاتىنىن مالىمدەدى.

بەكشيننىڭ سوزىنە قاراعاندا، جەرگىلىكتى بيلىك الداعى شەكتەۋ شارالارىن تالقىلاپ جاتىر. قىزىل ايماقتان شىقپايىنشا، ءار سەنبى-جەكسەنبى قوعامدىق كولىك جۇمىسى توقتاماق. الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتار دارىگەرى قوعامدىق كولىكتەردىڭ قوزعالىسىن شەكتەۋدى – ينفەكتسيانىڭ جۇعۋ تىزبەگىن توقتاتۋدا نەگىزگى امال دەپ سانايدى. ونىڭ ايتۋىنشا، ەگەر سوڭعى جەتى تاۋلىكتە 100 مىڭ تۇرعىنعا شاققاندا ناۋقاستار سانى 50-دەن جانە R كورسەتكىشى ء(بىر ناۋقاستىڭ وزگە ساۋ ادامدارعا جۇقتىرۋ ىقتيمالدىعى – QT) 1-دەن اساتىن بولسا، وندا قىزىل ايماققا وتەدى.

سىرقاتتاردىڭ 17%-ى قوعامدىق كولىكتە جۇقتىرعانىن ايتادى، الايدا ول جۇمىس جانە دەمالىس كۇندەرى ناقتى قانشا الماتىلىق اۋرۋ جۇقتىرعانى جونىندە جاۋاپ بەرە المادى.

«اۋرۋشاڭدىق ءوسىمى 3 ناۋرىزدان بايقالا باستادى. 3 ناۋرىز – 121, ال 12 ناۋرىز – 360 جاعداي تىركەلدى. وسى سەبەپتى وتكەن دۇيسەنبىدە قابىلدانعان №10 قاۋلىداعى شەكتەۋلەر ارقاسىندا سەنبى-جەكسەنبى كۇندەرى كورسەتكىش ءبىرشاما كەمىدى»، – دەدى

ونىڭ ايتۋىنشا، شەكتەۋ شاراسى جالعاسۋى قاجەت.

«قازىرگى تاڭدا جۇكتەمەسى 40%-دان اسپايتىن 3400 توسەك-ورنىمىز بار. قوسىمشا 7 مىڭ ورىن دايىندالعان. ەگەر تاۋلىگىنە 500 جاعداي تىركەلەر بولسا، وندا جاي شەكتەپ قانا قويماي، بىرقاتار سالالاردىڭ جۇمىسىن تولىق توقتاتۋعا تۋرا كەلەدى. ءبىزدىڭ مىندەتىمىز – بۇعان دەيىن جەتكىزبەۋ، ءالى كەش ەمەس»، – دەيدى ول.

ايتا كەتەرلىك جايت، شەكتەۋ تالابىن مىنا جاعدايلاردا كۇشەيەدى: تاۋلىكتىك كورسەتكىش 300-گە جەتسە، ءىشىنارا شەكتەۋ ەنگىزىلەدى دە قالا ىشىندە لوكداۋنعا جابىلادى، بىراق حالىقتىڭ ءجۇرىپ-تۇرۋىنا شەكتەۋ قويىلمايدى; ال 500 ناۋقاس انىقتالعان جاعدايدا، بلوك-بەكەتتەر ورناتىلىپ، قوزعالىس توقتايدى.

قازاقستان ۇكىمەتىنىڭ جانىنان قۇرىلعان ۆەدومستۆوارالىق كوميسسيانىڭ رەسمي مالىمەتىنشە, ناۋرىز ايىنىڭ 1-14 كۇندەرى ارالىعىندا الماتى قالاسىنا حالىقارالىق باعىتتا 177 اۋە رەيسىمەن 27 770 جولاۋشى كەلگەن. ونىڭ 3202-سىندە پتر انىقتاماسى بولماعان. رەداكتسيا ءتىلشىسىنىڭ ناۋرىزداعى ءوسىمنىڭ بىردەن-ءبىر سەبەبى شەتەلدەن كەلگەن جاڭا شتامم بولۋى مۇمكىن بە دەگەن ساۋالعا باس سانيتار «قازاقستاندا ازىرگە باسقا شتامم تىركەلمەدى، مەنىڭشە، ەكى اپتاعا سوزىلاتىن زەردەلەۋ جۇمىسىنان كەيىن ايتامىز» دەدى.

– ءبىر اپتادان سوڭ استانادان «سەكۆيناتور» دەگەن ارنايى قۇرىلعى جەتكىزىلەدى. سونىڭ كومەگىمەن جاڭا شتامداردىڭ بار-جوعى زەرتتەلەدى. ونىڭ باستى ماقساتى – وزگەرگەن شتامداردى انىقتاۋ. ءبىز جاڭا شتامداردى انىقتاۋ ءۇشىن ارنايى جۇيە قۇردىق. زەرتتەۋ ناتيجەلەرى تۋرالى كەم دەگەندە ەكى اپتادان كەيىن عانا ايتا الامىز. بۇگىنگى كۇنگە دەيىن پتر تەستتەرىنىڭ ناتيجەلەرى بويىنشا كوروناۆيرۋستىڭ 145 تۇرلەندىرىلگەن ءتۇرى انىقتالدى. بىراق، پاتوگەندىك وزگەرىستەر انىقتالعان جوق، – دەيدى بەكشين.

دۇنيەجۇزىندە كوروناۆيرۋستىڭ جۇعۋ جانە ءولىم كورسەتكىشى جاعىنان الدەقايدا قاتەرلىرەك بريتاندىق، وڭتۇستىك افريكالىق، برازياليالىق جانە امەريكالىق بىرنەشە شتامم انىقتالعان.

جەكسەنبى كۇنى قازاقستاندا پتر تەستى ارقىلى انىقتالعان ناۋقاستاردىڭ ۇشتەن ءبىرى الماتىدان. قالادا ناۋرىز ايىنىڭ العاشقى دەكاداسىندا تاۋلىگىنە جۇزدەن كەم ەمەس دەڭگەيدە، 11-ىنەن بەرى ەسەلەپ وسۋدە. كەيىنگى ەكى اپتادا قالادا 2,5 مىڭنان استام ناۋقاس تىركەلىپ ۇلگەردى. سونداي-اق، سىرقاتتار كوبەيگەن ايماقتار قاتارىندا استانا (1536) جانە پاۆلودار (916), اقمولا (897) وبلىستارى بار.