Almatı qalası sanitariyalıq-epidemiologiyalıq baqılau departamentiniñ jetekşisi äri bas sanitar Jandarbek Bekşin. Foto: Azattyq-Ruhy

Almatı qalasınıñ bas sanitar-därigeri Jandarbek Bekşin täuligine 500 adamnan koronavirus anıqtalğan jağdayda qala tügeldey jabılatının mälimdedi.

Bekşinniñ sözine qarağanda, jergilikti bilik aldağı şekteu şaraların talqılap jatır. Qızıl aymaqtan şıqpayınşa, är senbi-jeksenbi qoğamdıq kölik jwmısı toqtamaq. Almatı qalası sanitariyalıq-epidemiologiyalıq baqılau departamentiniñ basşısı, qalanıñ bas memlekettik sanitar därigeri qoğamdıq kölikterdiñ qozğalısın şekteudi – infekciyanıñ jwğu tizbegin toqtatuda negizgi amal dep sanaydı. Onıñ aytuınşa, eger soñğı jeti täulikte 100 mıñ twrğınğa şaqqanda nauqastar sanı 50-den jäne R körsetkişi (bir nauqastıñ özge sau adamdarğa jwqtıru ıqtimaldığı – QT) 1-den asatın bolsa, onda qızıl aymaqqa ötedi.

Sırqattardıñ 17%-ı qoğamdıq kölikte jwqtırğanın aytadı, alayda ol jwmıs jäne demalıs künderi naqtı qanşa almatılıq auru jwqtırğanı jöninde jauap bere almadı.

«Auruşañdıq ösimi 3 naurızdan bayqala bastadı. 3 naurız – 121, al 12 naurız – 360 jağday tirkeldi. Osı sebepti ötken düysenbide qabıldanğan №10 qaulıdağı şekteuler arqasında senbi-jeksenbi künderi körsetkiş birşama kemidi», – dedi

Onıñ aytuınşa, şekteu şarası jalğasuı qajet.

«Qazirgi tañda jüktemesi 40%-dan aspaytın 3400 tösek-ornımız bar. Qosımşa 7 mıñ orın dayındalğan. Eger täuligine 500 jağday tirkeler bolsa, onda jay şektep qana qoymay, birqatar salalardıñ jwmısın tolıq toqtatuğa tura keledi. Bizdiñ mindetimiz – bwğan deyin jetkizbeu, äli keş emes», – deydi ol.

Ayta keterlik jayt, şekteu talabın mına jağdaylarda küşeyedi: täuliktik körsetkiş 300-ge jetse, işinara şekteu engiziledi de qala işinde lokdaunğa jabıladı, biraq halıqtıñ jürip-twruına şekteu qoyılmaydı; al 500 nauqas anıqtalğan jağdayda, blok-beketter ornatılıp, qozğalıs toqtaydı.

Qazaqstan Ükimetiniñ janınan qwrılğan vedomstvoaralıq komissiyanıñ resmi mälimetinşe, naurız ayınıñ 1-14 künderi aralığında Almatı qalasına halıqaralıq bağıtta 177 äue reysimen 27 770 jolauşı kelgen. Onıñ 3202-sinde PTR anıqtaması bolmağan. Redakciya tilşisiniñ naurızdağı ösimniñ birden-bir sebebi şetelden kelgen jaña ştamm boluı mümkin be degen saualğa bas sanitar «Qazaqstanda äzirge basqa ştamm tirkelmedi, meniñşe, eki aptağa sozılatın zerdeleu jwmısınan keyin aytamız» dedi.

– Bir aptadan soñ astanadan «Sekvinator» degen arnayı qwrılğı jetkiziledi. Sonıñ kömegimen jaña ştamdardıñ bar-joğı zertteledi. Onıñ bastı maqsatı – özgergen ştamdardı anıqtau. Biz jaña ştamdardı anıqtau üşin arnayı jüye qwrdıq. Zertteu nätijeleri turalı kem degende eki aptadan keyin ğana ayta alamız. Bügingi künge deyin PTR testteriniñ nätijeleri boyınşa koronavirustıñ 145 türlendirilgen türi anıqtaldı. Biraq, patogendik özgerister anıqtalğan joq, – deydi Bekşin.

Düniejüzinde koronavirustıñ jwğu jäne ölim körsetkişi jağınan äldeqayda qaterlirek britandıq, oñtüstik afrikalıq, braziyaliyalıq jäne amerikalıq birneşe ştamm anıqtalğan.

Jeksenbi küni Qazaqstanda PTR testi arqılı anıqtalğan nauqastardıñ üşten biri Almatıdan. Qalada naurız ayınıñ alğaşqı dekadasında täuligine jüzden kem emes deñgeyde, 11-inen beri eselep ösude. Keyingi eki aptada qalada 2,5 mıñnan astam nauqas tirkelip ülgerdi. Sonday-aq, sırqattar köbeygen aymaqtar qatarında astana (1536) jäne Pavlodar (916), Aqmola (897) oblıstarı bar.