قىتاي ۇكىمەتى تايۋانعا (تايۆان) قاراتا ەسكەرتۋ جاساپ، ەگەمەندىك الۋعا جاسالعان قانداي دا ءبىر قادامنىڭ ارتى سوعىسقا الىپ كەلەتىنىن ايتتى. قىتايدىڭ رەسمي اقپارات قۇرالدارى تاراتقان حاباردا تايۋان جانە ونى قولداعان «سىرتقى كۇشتەر» «ۇلكەن قىتاي ءپرينتسيپىن» بۇزۋعا ارەكەت ەتىپ جاتقانى سىنعا الىنعان.

سوڭعى كەزدەردە قىتايدىڭ تايۋانعا ديپلوماتيالىق، ەكونوميكالىق جانە اسكەري قىسىمدارى ارتتى. قىتاي اۋە كۇشتەرىنە تيەسىلى سوعىس ۇشاقتارى ارال كەڭىستىگىنە كۇن سايىن كىرىپ، تايۋان اۋە قورعانىس كۇشتەرىنە قىسىمدى كۇشەيتۋدە.

قىزمەتىنە كىرىسكەننەن كەيىن جو بايدەن تايۋاندى قولداۋ تۋرالى نيەتىن بىلدىرگەن بولاتىن. ۋاشينگتون بەيجىڭنىڭ كەزەكتى مالىمدەمەسىن سابىرسىزدانۋ دەپ اتاپ، بۇنىڭ سوڭى تىرەسۋگە الىپ كەلەتىنىن ەسكەرتكەن.

پرەزيدەنت ترامپ تۇسىندا اقش پەن قىتاي قارىم-قاتىناسى الشاقتاپ، ەكى ەل ورتاسىندا ساۋدا سوعىسى جانە تەحنولوگيالىق قاقتىعىستار، بىرقاتار ديپلوماتيالىق قايشىلىقتار دا بولعان ەدى. اقش-تىڭ جاڭا بيلىگى دە قىتايعا قاراتا ادام قۇقىعى، ادىلەتسىز ساۋدا ساياساتى، تايۋان مەن گونكونگ جانە وزگە دە ماسەلەلەر بويىنشا قاتال پوزيتسياسىن جالعاستىرادى دەپ كۇتىلۋدە.

تايۋان تاقىرىبى بارعان سايىن حالىقارالىق ۇلكەن قايشىلىققا جاقىنداي تۇسۋدە. قىتاي حالىق رەسپۋبليكاسىن قۇرۋشى كوممۋنيستىك بيلىك تايۋاندى قىتايدىڭ ءبىر پروۆينتسياسى دەپ سانايدى جانە دەربەس حالىقارالىق بايلانىستار ورناتۋىنا قارسى شىعىپ كەلەدى. تايبەي بيلىگى بولسا تايۋان قىتايعا تاۋەلدى ەمەس، دەربەس ەل دەپ سانايدى. ارالدى ەلدىڭ وزىندىك كونستيتۋتسياسى، دەموكراتيالىق باسقارۋ رەجيمى، بەرىك دەموكراتيالىق جۇيەسى جانە دامىعان ەكونوميكاسى مەن ءبىرشاما قۋاتتى ارمياسى بار.

ساراپشىلاردىڭ ايتۋىنشا، رەسمي بەيجىڭ تايۋاننىڭ دەربەستىككە ۇمتىلعان ارەكەتتەرىنەن قاتتى الاڭدايدى. ءتىپتى، تايۋاننىڭ رەسمي تاۋەلسىزدىگىن جاريالاپ جىبەرۋدەن الاڭداپ قىتاي بيلىگى قازىرگى تايۋان پرەزيدەنت تساي يىڭۆىن حانىمدى ءتۇرلى جولارمەن قورقىتىپ كەلەدى. بىراق، پرەزيدەنت تساي بۇعان دەيىن دە بىرنەشە رەت تايۋاننىڭ دەربەس مەملەكەت ەكەنىن ايتىپ كەلگەن.

“The Qazaq Times”