قىرعىزستان ساياسي داعدارىستى ءالى دە ەڭسەرىپ كەتە العان جوق. بۇل جاعدايدان پرەزيدەنتتىك سايلاۋ مەن كونستيتۋتسياعا وزگرىستەر ەنگىزۋ بويىنشا رەفەرەندۋم ارقىلى شىعىپ كەتۋگە تالپىنعان. بىراق، سونىڭ ءوزى ەلدى ودان ارمان داعدارىسقا اپارۋى مۇمكىن دەگەن بولجامدار دا ايتىلىپ جاتىر.

اپتا باسىندا قىرعىز اتا زاڭىنا وزگەرىستەر ەنگىزگەن جاڭا نۇسقالارى قوعامدىق تالقىعا شىقتى. بايقاعانىمىزداي، بۇل كونستيتۋتسياعا وزگەرتۋلەر مەن تولىقتىرۋلار ەنگىزۋ ەمەس، كەرىسىنشە جاڭا كونستيتۋتسيا ەنگىزۋدەي كورىنەدى. بۇل نۇسقانى قىرعىزستاننىڭ ەكس-پرەزيدەنتى روزا وتىنباەۆا، جوعارعى كەڭەستەگى «اتا-مەكەن» فراكتسياسىنىڭ جەتەكشىسى ومىربەك تەكەباەۆ، «ءبۇتىن قىرعىزستان» پارتياسىنىڭ ليدەرى، پرەزيدەنتتىككە تالاپكەر اداحان مادۋماروۆ قاتارلى قىرعىز ساياساتكەرلەرى سىناپ شىقتى.

سىناسا سىناعانداي-اق، جاڭا كونستيتۋتسيادا ەلدەگى ءسوز ەركىندىگى مەن دەموكراتياعا قاۋىپ توندىرەتىن بىرقاتار تارماقتار بار. ايتالىق، زاڭدىق نورمادا انىق بەكىتىلمەگەن «ەلدىڭ يماندىلىعىنا، قىرعىزدىڭ ۇلتتىق سالت-ساناسىنا قايشى ءىس-شارالارعا شەكتەۋ قويىلادى» دەگەن تارماقتار كەزدەسەدى. بۇنى كەيبىر قىرعىز ساياساتكەرلەرى  بيلىك باسىنداعىلاردىڭ دەموكراتيا مەن ءسوز بوستاندىعىن شەكتەۋگە ماقساتىندا قوسقان كۇماندى ەرەجەلەر دەپ سانايدى.

انىعىندا كونستيتۋتسياعا وزگەرتۋلەر ەنگىزۋ دەگەن باستامانى پرەزيدەنتتىڭ مىندەتىن اتقارۋشى جانە پرەمەر مينيستر بولىپ وتىرعان سادىر جاپارىۆ ۇسىنعان. قولدانىستاعى قىرعىز اتا زاڭى وعان پرەزيدەنت مىندەتىن ۋاقىتشا اتقارۋشىعا ونداي قۇقىق بەرمەگەن. بىراق، بيلىككە كەلگەن جاپاروۆ كوپتەگەن وزىنە ءتيىمدى ماسەلەلەردى «ەلدىڭ تالابى» دەگەن جەلەۋمەن جولعا قويىپ جاتقانى انىق بايقالىپ وتىر. جاپاروۆ جاقىندا عانا مىندەتىن تاپسىرىپ بەرىپ، پرەزيدەنتتىك سايلاۋعا اتتانعان.

قىرعىزستانداعى ساياسي جاعدايلاردى باعامداعان تاۋەلسىز ساراپشىلار بۇل وزگەرىستەردىڭ ەلدى ودان بەتەر تىعىرىققا تىرەيتىنىن ايتادى. سونداي-اق، 30 جىل بىرتىندەپ بولسا دا العا ىلەرىلەپ كەلە جاتقان قىرعىز دەموكراتياسى داعدارىستان كەيىن كەرى كەتسە بۇل ايماقتاعى دەموكراتيالىق پروتسەستەرگە كەرى اسەرىن تيگىزەدى دەپ سانايدى. سەبەبى، ماڭىنداعى اۆتوريتارلىق رەجيمدەر ەندىگى جەردە قىرعىزدى مىسال ەتىپ، ەلدەگى ازاماتتىق قوعامنىڭ پروگرەسىن كەرى شەگىندىرۋى مۇمكىن دەگەن بولجامدار بار.

“The Qazaq Times”