ەو-ۋكراينا سامميتىندە بەلارۋستەگى احۋال تالقىلانادى

6 قازاندا بريۋسسەلدە وتەتىن ەۋرووداق-ۋكراينا سامميتىندە بەلارۋستەگى احۋال نەگىزگى تاقىرىپ بولادى. بۇل تۋرالى ەو-نىڭ جوعارى لاۋازىمدى وكىلى مالىمدەدى.

بەلارۋستەگى جاعدايدى ەۋروپالىق وداق وكىلدەرى ۋكراينا پرەزيدەنتى ۆلاديمير زەلەنسكيمەن تالقىلاماق. ەو وكىلى الداعى ءسامميتتىڭ كۇن تارتىبىنە تاۋلى قاراباقتاعى جانجال مەن «شىعىس سەرىكتەستىگى» باعدارلاماسىنا قاتىستى پىكىرتالاستار بولاتىنىن دا اتاپ ءوتتى.

بەلارۋس ەلىندە 9 تامىزداعى سايلاۋدان كەيىن ەلدە بيلىككە دەگەن نارازىلىق ءورشىپ كەتتى. ەلدەگى وسك لۋكاشەنوكنى 80 پايىزعا جۋىق داۋىسپەن جەڭدى دەپ جاريا ەتكەننەن كەيىن، وپپوزيتسيا مەن ەلدەگى حالىق بيلىككە دەگەن ىزالى كوڭىل-كۇيىن اشىققا شىعاردى. كۇشپەن جانىشتاۋعا قاراماستان ەل ورتالىعىندا سوڭعى تاۋلىكتە بىرنەشە ءجۇز مىڭداعان ادام ەرەۋىلگە شىققان.

سايلاۋدان كەيىن ەلدە جاپپاي نارازىلىق ورىن الىپ، ەۋرووداق پەن امەريكا شيرەك عاسىر بيلىك ەتكەن لۋكاشەنكونىڭ جەڭىسىن مويىنداۋدان باس تارتتى. سونىمەن قاتار ەو قۇرامىنداعى 27 مەملەكەت بەلارۋسكە سانكتسيا ەنگىزۋ ماسەلەسىن قاراستىردى. لۋكاشەنكونى «ايقىن جەڭىسىمەن» قۇتتىقتاعان ەلدەر قاتارىندا قىتاي، رەسەي، قازاقستان، وزبەكستان، تاجىكستان بار.

بەلارۋستە سايلاۋعا دەيىن مەرزىمىنەن بۇرىن داۋىس بەرۋ ءوتتى. مۇنداي نورما ەل زاڭىمەن قاراستىرىلعان، بىراق قۇقىق قورعاۋشىلار مەن حالىقارالىق باقىلاۋشىلار بۇل ءادىستى قاتاڭ سىنعا الدى. ولاردىڭ پىكىرىنشە، ۇكىمەت داۋىس بەرۋ ناتيجەلەرىن قولدان جاساۋ ءتاسىلىن پايدالانعان.

ليتۆا بولسا بەلارۋستاعى وقيعالاردا رەسەيدىڭ اسكەري ارالاسۋى دا بار بولۋى مۇمكىن دەگەن پىكىردى جاريا ەتكەن ەدى. كانتسلەر مەركەل مەن پرەزيدەنت ناۋسەدە اراسىنداعى سويلەسۋدە بەلارۋس ماسەلەسى كوبىرەك تىلگە تيەك ەتىلگەن. بەرلين تارابى وڭىردەگى بەيبىتشىلىك پەن تۇراقتىلىق جانە ورتاق قۇندىلىقتاردىڭ قورعالۋى تۇرعىسىندا بەلارۋس جاعدايىنا باسا نازار اۋدارىپ وتىرعانىن جەتكىزدى.

5 قىركۇيەكتە «ارريا فورمۋلاسى» بويىنشا دۇنيەجۇزىلىك ۇيىمنىڭ قاۋىپسىزدىك كەڭەسىنىڭ بەيرەسمي وتىرىسىندا بەلارۋس احۋالى تالقىلانىپ، سۆەتلانا تيحانوۆسكايا مالىمدەمە جاساعان. وپپوزيتسيا وكىلى تيحانوۆسكايا بۇۇ-دان كومەك سۇراپ، بيلىك اۋىسپايىنشا، نارازىلىق شەرۋلەرى باسىلمايتىنىن ايتتى.

"The Qazaq Times"