بۇگىن، 18 قىركۇيەك ءال-فارابي اتىنداعى قازاق ۇلتتىق ۋنيۆەرسيتەتىندە قازاق جۋرناليستيكاسىنىڭ ۇلاعاتتى ۇستازدارىنىڭ ءبىرى، جۋرناليست-جازۋشى، تاريحشى مارقۇم ءابىلفايىز ىدىرىسوۆتىڭ تۋعانىنا 90 جىل تولۋىنا ارنالعان بىرقاتار شارالار ءوتتى.  

جۋرناليستيكا ۇستازىنىڭ قالام ىزدەرىنەن كورگىزبە قويىلدى. فوتو: QT.

اۋەلى، جۋرناليستيكا فاكۋلتەتىندە ءا. ىدىرىسوۆ اتىنداعى ءدارىسحانانىڭ اشىلۋ سالتاناتى ءوتتى. سالتاناتتى شاراعا مەملەكەت قايراتكەرى، قازاقستان رەسپۋبليكاسىنىڭ ۇلىبريتانياداعى توتەنشە جانە وكىلەتتى ەلشىسى ەرلان ىدىرىسوۆ، ۇلتتىق ۋنيۆەرسيەتتىڭ رەكتورى عالىمقايىر مۇتانوۆ، جۋرناليستىك، «قازاقستان رترك» اق باسقارما توراعاسىنىڭ كەڭەسشىسى نۇرتىلەۋ يمانعاليۇلى، اقىن، ف.ع.د. باۋىرجان جاقىپ، جۋرناليستيكا فاكۋلتەتىنىڭ دەكانى ساعاتبەك مەدەۋبەك، قۇرالاي ىدىرىسوۆا قاتارلى ۇلاعاتتى ۇستازدىڭ ۇرپاقتارى، جۋرناليستيكا مەن عىلىمداعى شاركىرتتەرى قاتىستى.

قارا شاڭىراق قاز-ۇۋ-دا وتكەن شارا «بۇقارالىق اقپارات قۇرالدارىن جانە ءباسپاسوز ونىمدەرىن بەزەندىرۋ ونەرىنىڭ قازىرگى ماسەلەلەرى» اتتى ونلاين كونفەرەنتسيامەن جالعاستى. كونفەرەنتسياعا اتالعان سالانىڭ بىلگىر ماماندارى، وقىتۋشىلار مەن ستۋدەنتتەر ونلاين قاتىستى.

كونفەرەنتسيا بارىسىندا ءابىلفايىز ىدىرىسوۆتىڭ «ۇستاز. عالىم. جازۋشى» اتتى كىتابىنىڭ تۇساۋى كەسىلدى.

ءابىلفايىز ىدىرىسوۆ (1930-2019)  – قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى، قر-نىڭ ەڭبەك سىڭىرگەن قايراتكەرى. قازمۋ-دىڭ (قازۇۋ) جۋرناليستيكا فاكۋلتەتىن بىتىرگەن (1953). 1953 – 54 ج. “قازاقستان پيونەرى” (قازىرگى “ۇلان”) گازەتى رەداكتسياسىندا ادەبي قىزمەتكەر، ءبولىم مەڭگەرۋشىسى، جاۋاپتى حاتشى، رەداكتوردىڭ ورىنباسارى بولىپ ىستەدى. 1955 – 61 ج. “لەنينشىل جاس” (قازىرگى “جاس الاش”) گازەتىندە ءبولىم مەڭگەرۋشىسى، جاۋاپتى حاتشى قىزمەتتەرىن اتقاردى. 1961 – 65 ج. “قازاقستان پيونەرى” گازەتىندە باس رەداكتور، 1965 – 93 ج. ال-فارابي اتىنداعى قازاق ۇلتتىق ۋنيۆەرسيتەتىندە اعا وقىتۋشى، دوتسەنت، پروفەسسورى بولدى. ىدىرىسوۆ وسى جىلدارى گازەت بەزەندىرۋ، پوليگرافيا ءىسى، ماقالالاردى وڭدەۋ جانە رەداكتسيالاۋ شەبەرلىگىنە بايلانىستى 20-عا تارتا ادىستەمەلىك قۇرالدار مەن وقۋلىقتار جازىپ، باسپادان شىعاردى. پۋبليتسيست-جازۋشى، پەداگوگ ىدىرىسوۆتىڭ قالامىنان كوپتەگەن عىلىمي-زەرتتەۋ كىتاپتارى، دەرەكتى ەسسە، حيكاياتتارمەن قاتار “ايجاننىڭ عاشىعى” (1965), “بەرىك” (1994), “اڭساعان مەنىڭ ءانىمسىڭ” (2000), “اقسۇيەك”، “كەر بۇزاۋدىڭ ءولىمى” (2004) پوۆەستەرى، “تاڭشولپان” رومانى (2005) جارىق كوردى. ىدىرىسوۆ كوپتەگەن وردەن، مەدالدارمەن ماراپاتتالعان.

"The Qazaq Times"