بۇگىن ءال-فارابي اتىنداعى قازۇۋ، جۋرناليستيكا فاكۋلتەتى باسپاگەرلىك-رەداكتورلىق جانە ديزاينەرلىك ونەر كافەدراسىنىڭ ۇيىمداستىرۋىمەن ۇستاز، عالىم، جازۋشى ءابىلفايىز ىدىرىسوۆتىڭ 90 جىلدىق مەرەيتويىنا ارنالعان «باسپا ءىسى جانە ديزاين»: ءبىلىم بەرۋ مەن زەرتتەۋ ماسەلەلەرى» اتتى القاسوز ءوتتى.

القاسوزگە بەلگىلى قالامگەرلەر، تانىمال جۋرناليستەر مەن عالىمدار قاتىستى.
جيىننىڭ باسى سالتاناتتى كورمەمەن باستالىپ، ءارى قاراي ۇلكەن باسقوسۋعا جالعاستى. القاسوز بارىسىندا تۇلعانىڭ ەڭبەگى مەن شىعارماشىلىعى ەسكە الىنىپ، جىلى ەستەلىكتەر ايتىلدى.

عيبراتتى عۇمىرى كەلەشەك ۇرپاققا ونەگە بولاتىن قازاقتىڭ قابىرعالى قالامگەرى، بەلگىلى جۋرناليست، ۇلاعاتتى ۇستاز ءابىلفايىز ىدىرىسوۆتىڭ قازاق حالقىنا سىڭىرگەن ەڭبەگى ايرىقشا زور.

ءابىلفايىز ىدىرىسوۆ 1930 جىلى 23 اقپانىندا قوستاناي وبلىسىنىڭ امانگەلدى اۋدانىنا قاراستى ەگىندىساي اۋىلىندا تۋعان. جازۋشى، جۋرناليست، پەداگوگ، تاريح عىلىمدارىنىڭ كانديداتى. «ءسوز قادىرىن ءوز قادىرىم» دەپ بىلگەن ابىز 800-دەن استام پۋبليتسيستيكالىق ماقالا، وچەركتەر، وقۋلىقتار، «قازاق جۋرناليستيكاسىنىڭ تاريحى»، «وچەرك جۋرناليستيكا جانرى رەتىندە»، «باسپا ونىمدەرىن اسەمدەۋ»، تاعى باسقا دا پاندەر بويىنشا ادىستەمەلىك قۇرالدار دايىنداعان. سونداي-اق، قازاقتىڭ قابىرعالى قالامگەرى ءابىلفايىز ىدىرىسوۆ قازاق ادەبيەتىنە «ايجاننىڭ عاشىعى»، «بەرىك»، «اڭساعان مەنىڭ ءانىمسىڭ»، «اقسۇيەك»، «كەر بۇزاۋدىڭ ءولىمى» اتتى تانىمى مول، پايىمى كەڭ پوۆەستەرىن، «تاڭشولپان» اتتى كوركەم رومانىن الىپ كەلدى.

"The Qazaq Times"