كورنەكى سۋرەت: رەسەي پرەزيدەنتى ۆلاديمير پۋتين جانە ۋكراينا باسشىسى ۆلاديمير زەلەنسكي. فوتو: https://eadaily.com

ۋكراينا پرەزيدەنتى ۆلاديمير زەلەنسكي قىرىمدى ەل قۇرامىنا قوسۋدى جوسپارلاپ جۇرگەنىن مالىمدەدى.

Euronews تەلەارناسىنا سۇحبات بەرگەن ول: «قىرىمدى قايتارامىز. بىراق بۇل ماسەلەنى تالقىلاۋ ءۇشىن ماڭىزدى جانە ءتيىمدى الاڭ جوق. التى جىل ىشىندە بۇل ماسەلەنى كوتەرۋ ءۇشىن بەرىك پلاتفورما جاسالمادى. ۋكراينانىڭ حالىقارالىق سەرىكتەستەرى رەسەيگە سانكتسيا سالۋمەن عانا شەكتەلىپ قالدى. بۇل ماسەلەدە ناقتى پلاتفورما قاجەت»، – دەدى.

سونىمەن قاتار زەلەنسكي «نورماند فورماتىندا» بارلىق نازار دونباستاعى قاقتىعىستى شەشۋگە ارنالىپ، قىرىم  تاقىرىبى كەيىنگە شەگەرىلىپ وتىرعانىن ايتتى. ۋكراينا پرەزيدەنتىنىڭ ايتۋىنشا، قىرىم مەن دونباسس ماسەلەلەرى بىردەي. نەگىزگى ايىرماشىلىق – قىرىمدا بەيبىت تۇرعىنداردىڭ كوپ قازا بولۋىندا.

بىلتىر جەلتوقساندا پاريجدە وتكەن جيىندا گەرمانيا، فرانتسيا، ۋكراينا مەن رەسەي باسشىلارى قىرىم ماسەلەسىن تالقىلاعان بولاتىن. جيىندا زەلەنسكي ۋكراينا – ۋنيتارلى مەملەكەت بولعاندىقتان فەدەراليزاتسيا تۋرالى ءسوز بولۋى مۇمكىن ەمەستىگىن جانە ۋكراينانىڭ دامۋى مەن بولاشاعىنا سىرتتان ەشكىمنىڭ ىقپال ەتۋىنە جول بەرىلمەيتىنىن ايتتى.

«ۋكراينا – تاۋەلسىز، دەربەس، دەموكراتيالىق مەملەكەت، ونىڭ دامۋ جولىن تەك قانا حالىق تاڭدايدى. تاعى ءبىر ماسەلە، ۋكراينانىڭ شىعىسىنداعى جاعدايدى ەلدىڭ حالىقارالىق قاۋىمداستىق تانىعان اۋماعىنان جەر بەرۋ ەسەبىنەن رەتتەۋ جايلى مامىلە بولۋى مۇمكىن ەمەس. ءاربىر ۋكراين ءۇشىن دونباسس تا، قىرىم دا – ۋكراينا ەكەنىن بارشامىز بىلەمىز»، – دەگەن.

2014 جىلى ناۋرىزدا ۋكراينا قۇرامىنداعى قىرىم تۇبەگىندە رەسەي كۇشتەرىنىڭ باقىلاۋىمەن «رەفەرەندۋم» ءوتىپ، ونىڭ قورىتىندىسى بويىنشا "حالىقتىڭ 93 پايىزى اۆتونوميالى رەسپۋبليكانىڭ ۋكراينادان ءبولىنىپ، رەسەيگە قوسىلۋىن جاقتاعانى" جاريالانعان. ماسكەۋ قىرىم تۇبەگىن اننەكسيالاپ، رەسەي فەدەراتسياسىنىڭ قۇرامىنداعى سۋبەكت دەپ تانىعان. سول جىلى ساۋىردە ۋكراينانىڭ دونەتسك جانە لۋگانسك وبلىستارىندا رەسەيشىل سەپاراتيستەر مەن ۋكراينا اسكەرى اراسىندا قارۋلى قاقتىعىس باستالعان. سودان بەرى ول سوعىستا 13 مىڭنان استام ادام قازا تاپقان.

باتىس ەلدەرى رەسەيدىڭ ۋكرايناعا قاتىستى ءىس-ارەكەتىن ايىپتاعان. رەسەي دونباستاعى قاقتىعىسقا قاتىسى بارىن جوققا شىعارادى.

"The Qazaq Times"