"وزگە سپۋتنيكتەردى جوياتىن قۇرال". اقش پەن بريتان رەسەيدى وسىنداي اپپاراتتى سىناقتان وتكىزدى دەپ مالىمدەدى. ولاردىڭ ايتۋىنشا بۇل اپپارات عارىشتا ۇشىپ ءجۇرىپ وزگە سپۋتنيكتەردى جويا الادى.

اقش رەسەيدىڭ عارىشتىق ارەكەتتەرىنە بۇعان دەيىن دە بىرنەشە مارتە الاڭداۋشىلىق بىلدىرگەن. بريتان بيلىگى العاش رەت ءۇن قوستى. اعىلشىن پارلامەنتى بىرنەشە كۇن بۇرىن وسىعان قاتىستى ارنايى زەرتتەۋ جۇرگىزىپ، ءوز ۇكىمەتىن رەسەيدىڭ عارىشتىق ارەكەتتەرىنە جەتەرلىك دەڭگەيدە نازار اۋدارمادى دەپ سىنعا الدى.

اقش پەن بريتانيانىڭ الاڭداۋىنا نەگىز جوق ەمەس. اقپاندا پەنتاگون رەسەيلىك جاساندى جەرسەرىگىنىڭ (سپۋتينك) امەريكالىق جەرسەرىكتەرگە جاقىن ۇشىپ وتكەنىنىن مالىمدەدى. بۇل قۇراما شتاتتىڭ ۇلتتىق قاۋىپسىزدىك ورگاندارىن الاڭداتقان. ال، ساۋىردە ماسكەۋ جەردەن ۇشىپ بارىپ سپۋتنيكتى جويا الاتىن زىمىران سىناعىندا تابىسقا جەتكەنىن جارياعا جار سالعان.

سوڭعى ون جىلداعى عارىشتىق قارۋ-جاراق تەحنولوگياسىندا تەك ءتورت ەل عانا – رەسەي، اقش، قىتاي جانە ءۇندىستان سپۋتينكتەردى جويا الاتىن تەحنولوگياسىن كورسەتە الدى. ولار نەگىزىنەن ەكى تۇرگە بولىنەدى، ءبىرى جەردەن اتىلاتىن زىمىران بولسا، ەكىنشىسى لازەر قارۋى.

ال، ۋاشينگتون مەن لوندوننىڭ سوڭعى مالىمەتىنە سەنسەك، رەسەي كەڭىستىكتە ۇشىپ ءجۇرىپ-اق وزگە سپۋتينكتەرگە قاۋىپ توندىرەتىن قۇرالعا قول جەتكىزگەن. سپۋتينكتەر ادەتتە اۋارايىن بولجاۋعا، مالىمەتتەر توپتاۋعا، بايلانىس تۇزۋگە جانە ىزدەۋ تەحنولوگياسىنا قولدانىلادى. ەگەر رەسەي بۇنداي تەحنولوگياعا يە بولسا وندا عارىش باسەكەسىندە ىرىقتى بولا تۇسپەك.

الەمدە اقش، رەسەي، بريتانيا جانە قىتايدى قامتىعان جۇزگە جۋىق مەملەكەت بەيبىت ماقساتتا كەڭىستىككە جاساندى جەر سەرىكتەرىن ورنالاستىرعان. بۇل ەلدەر اراسىنداعى حالىقارالىق ماڭىزدى كەلىسىم بويىنشا كەڭىستىككە قاۋىپتى قۇرال ورنالاستىرۋ شەكتەلگەن.

قالاي دەسەكتە، سوڭعى جىلداردا عارىش باسەكەسىنىڭ ارتا تۇسكەنى ءمالىم. دەرجاۆالاردىڭ كوزدەگەنى كۇن تۇبىندە بولسا دا، جەردەگى جۇمىر باستى پەندەلەر ءۇشىن بەيبىتشىلىكتەن ارتىعى جوق. الداعى ۋاقىتتا، شاماسى جەتكەن ەلدىڭ ءبارى قۇرلىق، اۋە جانە تەڭىز كۇشتەرى سەكىلدى عارىش كۇشتەرىن دامىتۋعا دەن قويماق. قۇراما شتاتتاردا بۇدان ەكى جىل بۇرىن عارىش ارمياسى قۇرىلعان بولاتىن.

"The Qazaq Times"