ÁMEN كينوفەستيۆالى وتاندىق انيماتسيانىڭ كاسىبي الاڭىنا اينالماق

12 جەلتوقسان ەل استاناسىندا ۇلتتىق انيماتسيا سالاسىنا ولشەۋسىز ۇلەس قوسقان رەجيسسەر-انيماتور امەن قايداروۆتىڭ قۇرمەتىنە وراي انيماتسيالىق فيلمدەردىڭ كينوفەستيۆالى ءوتتى.

تۇڭعىش رەت وتكەن «امەن» («ÁMEN Animation Film Festival») انيماتسيالىق كينوفەستيۆالى ەلدىڭ بارلىق وڭىرىندەگى انيماتورلارىنىڭ باسىن قوسىپ، 50 جىلدان اسا تاريحى بار قازاق انيماتسياسىنىڭ بۇگىنگى احۋالىن جاڭا ساتىعا كوتەرۋ جايىنا دەن قويىپ، جاڭا ەسىمدەردى تانىتۋعا تىرىستى.  ايتۋلى تىڭ جوبانىڭ قۇرمەتتى قوناعى رەتىندە قازاق ءمۋلتفيلمى ءبىرىنشى تۇلەگى  «قارلىعاشتىڭ قۇيرىعى نەگە ايىر؟» تۋىندىسىن تۇسىرگەن شىعارماشىلىق توپ وكىلدەرى گالينا دۋسەنكو مەن ەرنەست بەيسەيىتوۆ شاقىرىلىپتى.

كينوفەستيۆال قورجىنىنا كەلىپ تۇسكەن 80-نەن استام جۇمىستى ىرىكتەپ، 51-ءىن ساراپتاعان قازىلار القاسىنىڭ قۇرامىنا انيماتسيالىق كينو رەجيسسەرى جاكەن دانەنوۆ، دراماتۋرگ روزا مۇقانوۆا، كينوسىنشى نازيرا مۇقىشەۆا، پروديۋسەر، مەديا مەنەدجەر سەرىك اباس-شاح، انيماتسيالىق كينو رەجيسسەرى اداي ءابىلدا، اكتەر، رەجيسسەر داۋرەن سەرعازين جانە «بالاپان» وتباسىلىق بالالار ارناسىنىڭ باسشىسى، فەستيۆال باستاماشىسى ماقپال جۇماباي كىرگەن.

جوبا تۇساۋكەسەرى. 12 جەلتوقسان 2019 جىل. استانا. فوتو: اشىق دەرەككوز

9 اتالىم بويىنشا باق سىناسقان مۋلتيپليكاتسيالىق بايقاۋ قوناقتارىنىڭ ءبىرى، «ساق» كينوستۋدياسىنىڭ رەجيسسەر-ستسەناريسى باتىرحان داۋرەنبەكوۆ:

– جوبانىڭ امەن اتانىڭ اتىمەن اتالعانى قۋانتادى. ول كىسى بۇكىل سانالى ءومىرىن بالالارعا ارناعان. انيماتسيالىق فەستيۆالداردىڭ كوبىرەك بولا بەرگەنى دۇرىس دەپ ويلايمىن. ويتكەنى «قازاقستاننىڭ انيماتسياسى جوق» دەگەن سوزدەر دە بار. نەگىزى ولاي ەمەس. راس، انيماتورلار قازاق مۋلتيپليكاتسياسىن قولدان كەلگەنشە جاساپ جاتىر. ولاردىڭ بىرقاتارى وسى فەستيۆالدە ۇلكەن ەكراننان كورسەتىلدى. مىسالى، «يت» انيماتسيالىق ءفيلمى تاستاندى بالالار ماسەلەسىن كوتەرگەن. حالىقارالىق بايقاۋلاردا جۇلدەلى ورىندى دا يەلەنگەن. دەمەك، بىزدە ۇشقىر ويلى، تالانتتى ماماندار بار. «مەملەكەت قولداسا، «Disney» تۋىندىلارىنا جەتەتىن دۇنيە جاسايمىز، – دەپ اعىنان جارىلدى.

"قارلىعاشتىڭ قۇيرىعى نەگە ايىر؟" ءفيلمىنىڭ شىعارماشىلىق توپ مۇشەسى گالينا دۋسەنكو جوبا قوناعى بولدى. 12 جەلتوقسان 2019 جىل. استانا. فوتو: اشىق دەرەككوز

بارد اقىن ماقپال جۇمابايدىڭ سوزىنشە، فەستيۆالعا الەمنىڭ تۇكپىر-تۇكپىرىنەن مايتالمان انيماتور-رەجيسسەرلەر، اتاپ ايتقاندا،  مويرا مارگۋين (فرانتسيا), ميحايل تۋمەليا (بەلورۋسسيا), ولا چراپوۆيچكا (پولشا), حابيب بۋرحاليفا (الجير), اداي ءابىلدا (شەتەلدە تاعلىمدامادا) ت.ب. اقجارما قۇتتىقتاۋىن جولداعان.

كينوفەستيۆال ساتىنەن. 12 جەلتوقسان 2019 جىل. استانا. فوتو: اشىق دەرەككوز

انيماتسيا – يدەولوگيانىڭ قۋاتتى قۇرالىنىڭ ءبىرى دەسەك، جوبادا ايتىلعان وتاندىق انيماتسيانىڭ ساۋلەلى-كولەڭكەلى تۇستارىن باعامداپ، وي جۇگىرتىپ، قولعا العان قۇبا-قۇپ بولار ەدى. قازىرگى تاڭدا وركەنيەتتى، وسۋگە نيەتتى ەلدەر «ەل بولامىن دەسەڭ، بەسىگىڭمەن قوسا، ەكرانىڭدى تۇزە» دەگەندى ۇستىن ەتكەن.

جوبا اياسىنداعى كونتسەرتتىك سەرگىتۋ ءنومىرى. 12 جەلتوقسان 2019 جىل. استانا. فوتو: اشىق دەرەككوز

قازاقستان انيماتسيالىق كينوستۋديالار قاۋىمداستىعى جانە «OzgeEpic» زاماناۋي ونەر كەڭىستىگى، «بالاپان» ارناسىنىڭ ۇيىمداستىرۋىمەن وتكەن كەلەلى كينوفەستيۆال قورىتىندىسىندا جۇلدەگەرلەر انىقتالدى. ولار:

- «ۇزدىك كاسىبي انيماتسيالىق فيلم» – مەيىرجان ساندىباي، «كوكسەرەك» ءفيلمى;

- «ۇزدىك رەجيسسەرلىك جۇمىس» – يۆان ارداشوۆ، «وركەش» ءفيلمى;

- «ۇزدىك ستۋدەنتتىك جۇمىس» – قاسيەت ساقيوللا، «تۇلكى مەن بودەنە» ءفيلمى جانە ارناس حابي، «پروزرەنيە» ءفيلمى;

- «ۇزدىك قويۋشى-سۋرەتشى» – مارجان جۇبانىش، «بارىنەن دە سەن سۇلۋ» ءفيلمى;

- «ۇزدىك ستسەناري» – زيرا ناۋرىزباەۆا، تامارا مۇقانوۆا، «شىڭىراۋ» ءفيلمى جانە باقىتجان قۇلجاباي، «قاجىمۇقان» ءفيلمى;

- «ۇزدىك مۋلتحيكايا» – ديلشات راحماتۋللين، «پىراكتار» مۋلتحيكاياسى مەن «قازاقفيلم» كينوستۋدياسىنىڭ «مەنىڭ اتىم - قوزى» مۋلتحيكاياسى.

- «ۇزدىك كوميكس» جانە «GLEN» وقۋ ورتالىعىنىڭ وقۋ سەرتيفيكاتى – ەلۆيرا تۇرعىنباەۆا;

- «ادىلقازىلار جۇلدەسى» – باۋىرجان سالجانوۆ، «فوتوالبوم» ءفيلمى جانە ادىلبەك بايان، «اكە» ءفيلمى;

- «كورەرمەن كوزايىمى» – سۇلتان جۇمابەكۇلى، «تاڭ اتتى» ءفيلمى;

- «اnyzfilm» كينوستۋدياسىنىڭ ارنايى جۇلدەسى – سەدا بابايان، «پولەت» ءفيلمى (وقۋ سەرتيفيكاتى);

- «QAZART» وقىتۋ ورتالىعىنىڭ ارنايى جۇلدەسى – ەلۆيرا تۋرگۋنباەۆا (وقۋ سەرتيفيكاتى);

- «QAZART» وقىتۋ ورتالىعىنىڭ ارنايى جۇلدەسى – ابدراحمانوۆا سىمبات، «وتپەن ويناما، بالاقاي» ءفيلمى (وقۋ سەرتيفيكاتى) ماراپاتتالدى.

شىعارماشىلىق ۇجىم: ۇيىمداستىرۋشىلار مەن ماماندار. 12 جەلتوقسان 2019 جىل. استانا. فوتو: اشىق دەرەككوز

«مۇزبالاق» انيماتسيالىق ءفيلمىنىڭ تانىمال رەجيسسەرلەرى تۇردىبەك مايدان مەن تىلەك تولەۋعازىنى «قازاق انيماتسياسىنا قوسقان زور ۇلەسى ءۇشىن» جۇلدەسىمەن ماراپاتتاۋ كەزىندە، اتالعان تۋىندى يزرايلدە وتكەن «NEAR NAZARETH FESTIVAL» دوداسىندا «ۇزدىك انيماتسيالىق فيلم» اتالىمى بويىنشا جەڭىمپاز اتانعانى تۋرالى حابار جەتتى. قازاق انيماتسياسىنىڭ تويى ماماندار مەن جانكۇيەرلەر مارە-سارە بولىپ، كوڭىل شالقىتىپ، شەر ءبولىسىپ تارقاستى.

"مۇزبالاق" انيماتسيالىق ءفيلمىنىڭ افيشاسى. فوتو: اشىق دەرەككوز

ۇلتتىق انيماتسيانىڭ بولاشاق باعدارىن ايقىنداۋعا ۇلەس قوسقان كاسىبي الاڭ بولعان فەستيۆال ۇيىمداستىرۋشىلارى شىعىنى كوپ، ماڭىزى زور سالانىڭ پلاتفورماسىن ساقتاۋعا تىرىساتىنىن، ءداستۇرلى تۇردە جالعاساتىنىن جەتكىزدى.

"The Qazaq Times"