اقش پرەزيدەنتى دونالد ترامپ گونكونگتاعى دەموكراتيا جانە ادام قۇقىعى تۋرالى زاڭعا قول قويدى. بۇل تۋرالى اق ءۇيدىڭ ءباسپاسوز قىزمەتى حابارلادى.

وسىعان دەيىن اقش كونگرەسىنىڭ ەكى پالاتاسى ماقۇلداعان زاڭنامالىق باستاما اقش اكىمشىلىگىنەن قحر-نىڭ وسى ارنايى اكىمشىلىك ايماعىنداعى جاعداي تۋرالى زاڭ شىعارۋشىلارعا ۇنەمى ەسەپ بەرىپ وتىرۋدى تالاپ ەتەدى. زاڭعا سايكەس، گونكونگتا ادام قۇقىعىن بۇزعاندارعا سانكتسيا سالىنادى. قىتاي بيلىگى اتالعان زاڭ جوباسىنا قاتىستى اقش-قا قارسىلىق بىلدىرگەن.

سونىمەن قاتار، امەريكالىق كوشباسشى دەمونسترانتتاردى تاراتۋ ءۇشىن اقش تەحينيكالارىن جەرگىلىكتى قۇقىق قورعاۋ ورگاندارىنىڭ پايدالانباۋى ءۇشىن «امەريكا قۇراما شتاتتارىنان گونكونگقا پوليتسيانىڭ ارنايى تەحنيكاسىن اكەتۋگە تىيىم سالۋ تۋرالى» زاڭعا قول قويدى. ترامپ مالىمدەمەسىندە: «مەن بۇل زاڭدارعا قحر توراعاسى شي جيڭپيڭگە ەسكەرتۋ رەتىندە جانە گونكونگ تۇرعىندارىنا قۇرمەتپەن قول قويدىم. قىتاي مەن گونكونگتىڭ باسشىلارى، وكىلدەرى كەلىسپەۋشىلىكتەردى بەيبىت تۇردە شەشۋى ءتيىس. اتالعان زاڭدار گونكونگتاعى بەيبىتشىلىك پەن وركەندەۋگە اكەلەدى دەگەن ۇمىتپەن ەنگىزىلدى»، — دەدى.

گونكونگ شاھارىنداعى نارازىلىق شارالارى باستاپقىدا گونكونگتىك ازاماتتاردى ەكستراديتسيالاۋ تۋرالى زاڭ جوباسىنا قارسىلىقتان باستالعانىمەن، سوڭعى كەزدەرى نارازى توپ گونكونگ قالاسىنىڭ دەربەستىگى تۋرالى دا ۇراندار كوتەرە باستادى. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى.

ايتا كەتەيىك، 25 قاراشادا گونكونگتىڭ 18 ايماعىندا وتكەن سايلاۋدا وپپوزيتسيا وكىلدەرى ايقىن جەڭىسكە جەتتى. داۋىستاردى الدىن-الا ساناۋ ناتيجەلەرى بويىنشا دەموكراتيا ءۇشىن كۇرەس جۇرگىزگەن توپ ياعني وپپوزيتسيا وكىلدەرى 452 ورىننىڭ 396-ىنا يە بولعان (شامامەن 90%).

"The Qazaq Times"