AQŞ prezidenti Donal'd Tramp Gonkongtağı demokratiya jäne adam qwqığı turalı zañğa qol qoydı. Bwl turalı Aq üydiñ baspasöz qızmeti habarladı.

Osığan deyin AQŞ Kongresiniñ eki palatası maqwldağan zañnamalıq bastama AQŞ äkimşiliginen QHR-nıñ osı arnayı äkimşilik aymağındağı jağday turalı zañ şığaruşılarğa ünemi esep berip otırudı talap etedi. Zañğa säykes, Gonkongta adam qwqığın bwzğandarğa sankciya salınadı. Qıtay biligi atalğan zañ jobasına qatıstı AQŞ-qa qarsılıq bildirgen.

Sonımen qatar, amerikalıq köşbasşı demonstranttardı taratu üşin AQŞ tehinikaların jergilikti qwqıq qorğau organdarınıñ paydalanbauı üşin «Amerika Qwrama Ştattarınan Gonkongqa policiyanıñ arnayı tehnikasın äketuge tıyım salu turalı» zañğa qol qoydı. Tramp mälimdemesinde: «Men bwl zañdarğa QHR törağası Şi Jiñpiñge eskertu retinde jäne Gonkong twrğındarına qwrmetpen qol qoydım. Qıtay men Gonkongtıñ basşıları, ökilderi kelispeuşilikterdi beybit türde şeşui tiis. Atalğan zañdar Gonkongtağı beybitşilik pen örkendeuge äkeledi degen ümitpen engizildi», — dedi.

Gonkong şaharındağı narazılıq şaraları bastapqıda gonkongtik azamattardı ekstradiciyalau turalı zañ jobasına qarsılıqtan bastalğanımen, soñğı kezderi narazı top Gonkong qalasınıñ derbestigi turalı da wrandar kötere bastadı. 16 mausımda 2 millionğa juıq adam narazılıq şeruine şıqqan edi. Bwl el tarihında bolmağan massalıq narazılıq akciyası.

Ayta keteyik, 25 qaraşada Gonkongtıñ 18 aymağında ötken saylauda oppoziciya ökilderi ayqın jeñiske jetti. Dauıstardı aldın-ala sanau nätijeleri boyınşa demokratiya üşin küres jürgizgen top yağni oppoziciya ökilderi 452 orınnıñ 396-ına ie bolğan (şamamen 90%).

"The Qazaq Times"