بايدەننىڭ يناۋگۋراتسياسى قارساڭىندا اقش-تا توتەنشە جاعداي ەنگىزىلدى

اقش-تىڭ 50 شتاتى مەن كولۋمبيا وكرۋگى سايلانعان پرەزيدەنت دجو بايدەننىڭ يناۋگۋراتسياسىنا بايلانىستى قاۋپىسىزدىك شارالارىن قاتاڭداتتى.

ۆاشينگتونعا ۇلتتىق گاۆرديا اسكەرلەرى جىبەرىلدى. ۇلتتىق اللەيا جابىلىپ، كوشەلەرگە قورشاۋلار قويىلدى. مەريلەند، نيۋ-مەكسيكو جانە يۋتا گۋبەرناتورلارى نارازىلىق اكتسيالارىنىڭ الدىن الۋ ءۇشىن توتەنشە جاعداي ەنگىزدى. تەحاس جەرگىلىكتى كاپيتولي عيماراتىن ۋاقىتشا جاپتى.

3 قاراشادا وتكەن پرەزيدەنت سايلاۋىندا رەسمي ناتيجە بويىنشا 306-232 (ەلەكتورلار داۋىسى) ەسەبىمەن دجو بايدەن جەڭىسكە جەتكەن. بىراق ترامپ سايلاۋ ناتيجەسىن مويىنداۋدان باس تارتىپ، «سوڭىنا دەيىن بەرىلمەيتىنىن» ايتتى.

7 قاڭتار اقش كونگرەسى سايلاۋشىلاردىڭ داۋىسىن ەسەپتەپ، 2020 جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى. الايدا بۇعان دەيىنگى پرەزيدەنت دونالد ترامپتىڭ جاقتاستارى جاپپاي نارازىلىق اكتسياسىن باستاپ، ولاردىڭ ءبىر توبى كونگرەسس عيماراتىنا باسىپ كىردى. ءتۇن جارىمىنا قاراي اقش كونگرەسىن جانە سەناتىن كۇزەتەتىن پوليتسيا ترامپتىڭ جاقتاستارىن كاپيتولي اۋماعىنان تىقسىرىپ شىعاردى. سەنات عيماراتىن اقش ۇلتتىق ۇلانىنىڭ جاساعى كۇزەتۋدە. ۆاشينگتوندا كومەندانتتىق ساعات ەنگىزىلدى. كەيىن Instagram, Facebook, Twitter جانە Youtube دونالد ترامپتىڭ اككاۋنتىن بلوكقا قويدى. نارازىلىق اكتسياسىنان سوڭ اقش كونگرەسى داۋىستاردى سەرتيفيكاتتاۋدى جالعاستىرۋعا دايىن ەكەنىن مالىمدەگەن ەدى.

11 قاڭتاردا اقش استاناسىندا بايدەننىڭ يناۋگۋراتسياسىنا بايلانىستى قاۋىپسىزدىك شارالارىن كۇشەيتۋدى مەرزىمىنەن التى كۇن بۇرىن باستاۋ تۋرالى شەشىم قابىلداندى. وسىعان بايلانىستى اق ءۇي مەن كونگرەسس ماڭىندا ورنالاسقان اكىمشىلىك كەشەندەر، دۇكەندەر مەن قوعامدىق تاماقتانۋ ورىندارىنىڭ جۇمىسى ۋاقىتشا توقتاتىلدى.

"The Qazaq Times"