وڭتۇستىك كورەيا ەكى ايعا دەيىن پرەزيدەنتى جوق ەل بولادى

كورەي تۇبەگى قايشىلىعى بۇگىنگى الەمدىك باق-تىڭ باستى نازارىندا تۇرعان ماسەلە. مۇددەلى تاراپتاردىڭ ءبارى دە الەمنىڭ الپاۋىتتارى مەن سۋىق قارۋىنا يە ەلدەر. تالايدان بەرى جالعاسقان تاياۋ، ورتا شىعىستاعى، شىعىس ەۋروپاداعى شيەلەنىستى جاعدايلاردان كەيىن الەمنىڭ نازارى تىڭ سوعىس تۋى مۇمكىن دەگەن ازيانىڭ شىعىسىنا اۋدى.

وڭىردەگى قاۋىپسىزدىككە قاتەر توندىرەتىن شارتتىڭ ءبارى تولىق دەۋگە بولادى. ءبىر عانا ارتىق قادام سولتۇستىك شىعىس ازيانى سوعىس الاڭىنا اينالدىرۋى عاجاپ ەمەس. سەبەبى، حالىقارالىق ۇيىمداردىڭ ەسكەرتۋىن ەلەمەيتىن سولتۇستىك كورەيا اقش پەن وڭتۇستىك كورشىسىنە ءتىس تىرناعىمەن قارسى. وزىنە قاراتا ابايسىزدا اتىلىپ كەتكەن ءبىر زىمىران ءۇشىن دە دەربەس زەرتتەپ دامىتقان يادرولىق قارۋىن ىسكە قوسارى ءسوزسىز.

12 ناۋرىز كۇنى، تۇبەك ماسەلەسىن ونان ارى كۇردەلىلەستىرەتىن بىرنەشە وقيعا قاتارىنان تۋىلدى. اقش-وڭتۇستىك كورەيا بىرلەسكەن اسكەري وقۋ-جاتتىعۋىنا شىعىس ازياعا اكەلىنگەن اقش ارمياسىنىڭ اۋىر اسكەري تەحنيكالارى مەن وزىق سوعىس قۇرالدارى پايدالانىلا باستاعانى. سول كۇنى جانە پاك كىن حەنىڭ پرەزيدەنتتىكتەن رەسمي تۇردە بوساتىلدى. دەمەك، 12 ناۋرىزدان باستاپ وڭتۇستىك كورەيادا ەكى اي مەرزىمدە پرەزيدەنت بولمايدى. وعان قوسا «سەلەنا» اتتى كەمەدەگى 3400 قىتايلىق تۋريست چەنجۋعا كىرگەن كەزدە جاعاعا شىعۋعا قارسىلىق ءبىلدىرىپ، وڭتۇستىك كورەيانىڭ ءدۇمپۋ تۋدىردى. بۇل قىتايلىقتاردىڭ سەۋلگە قاراتقان كوزقاراسىمەن بىردەي بولىپ، ەكى ەل قاتىناسىنىڭ سىنىنا اينالدى.

پاك كىن حەنى پرەزيدەنتتىكتەن قالدىرعان كۇنى ونىڭ جاقتاستارىنان 1000-عا جۋىق ادام الاڭعا شىقتى. ولار ەلدەرىنىڭ ءانۇرانىن ايتىپ، تۋلارىن كوتەرىپ، پرەزيدەنتتەرىن ساقتاپ قاسىن دەپ ۇراندادى. الايدا الاڭ سىرتىن 2000 پوليتسيا قورشاپ تۇردى. كورەي تۇبەگىندەگى جاعدايدىڭ ۋشىققان تۇسىندا، سەۋل بيلىگىندەگى ساياسي وزگەرىستەر تۇبەك ماسەلەسىنە كەرى اسەر بەرۋدە. سەبەبى، تۇراقتى پوزيتسيا جاقتايتىن ساياسي توپتىڭ بيلىك الماسۋى تۇبەكتەگى ەكى ەل قاتىناسىن جاقسارتا قويمايدى. ال، كورەيا كونستيتۋتسيالىق سوتىنىڭ شىعارعان شەشىمى بويىنشا پرەزيدەنت وكىلەتتىلىگى توقتاتىلعاننان كەيىن، جاڭا پرەزيدەنت تاعايىنداۋ 60 كۇننەن كەيىن عانا جۇزەگە اسىرىلادى. سول شەشىم بويىنشا 9 مامىردا عانا پرەزيدەنت سايلاۋ وتكىزۋگە بولادى.

كورەيا اقپارات ورتالىعىنىڭ جانە  KBS تەلەارناسىنىڭ حابارىنا قاراعاندا، وڭتۇستىك كورەيانىڭ كەلەسى پرەزيدەنتى بولىپ، ازىرگە دەيىن 29,9 پايىز قولداۋدى يەلەگەن، وپپوزيتسيالىق دەموكراتيالىق پارتيانىڭ جەتەكشىسى بولۋى مۇمكىن ەكەن. دەسە دە، اقش-وڭتۇستىك كورەيا بىرلەسكەن اسكەري وقۋ-جاتتىعۋلارىنىڭ باستالىپ، تۇبەك جاعدايىنىڭ ەڭ ۋشىققان كەزىندەگى سەۋلدەگى بيلىك الماسۋ ۇلكەن حالىقارالىق ويىن بولۋى دا بەك مۇمكىن. اۋعانستان، پالەستين، يراك، ليۆيا، سيريا، ۋكراينا ماسەلەلەرى الەمدەگى جىمىسقى توپقا جارتى عاسىرلىق ازىق بولدى. ەندى ەكونوميكالىق، يدەولوگيالىق سوعىستىڭ بەتقالقاسى اۋىسىپ، مۇددەلەر قاقتىعىسى مايدان اۋىستىرۋىنا تۋرا كەلگەن بولۋى مۇمكىن. ەكونوميكاسى قۇدىرەتتەنىپ كەلە جاتقان كورەي، جاپون، قىتاي سىندى شىعىس ازيا كوشباسشىلاردىڭ ورتاسىنا جانجال ۇيىمداستىرۋ كىمدەردىڭ وڭ جامباسىنا تۇسەتىنى انىق بولىپ وتىر.

"The Qazaq Times"