افريكالىق قۇلداردى تيەگەن العاشقى كەمەنىڭ ۆيردجينياعا جەتۋى. فوتو: The New York Times.

اقش-تاعى الەمگە تانىمال باسىلىم New York Times Magazine جۋرنالى امەريكاداعى قۇلدىقتىڭ باستالعانىنا 400 جىل تولۋىنا وراي ءىرى جوبانى باستاعان بولاتىن. الايدا، اتالعان باسىلىمنىڭ ارەكەتى امەريكالىق ساياساتكەرلەر جاعىنان اۋىر سىنعا ۇشىرادى. رەسپۋبليكاشىلدار پارتياسىنىڭ وكىلدەرى اتالعان باسىلىمنىڭ كوتەرگەن جوباسىن "پروپاگاندا" قاتارىندا باعالادى جانە "پراۆدا" باسىلىمىمەن سالىستىرعان سىن-پىكىرلەردى قارشا بوراتتى.

New York Times Magazine جۋرنالىنىڭ امەريكاداعى قۇلدىقتىڭ 400 جىلدىعىنا ارناعان جوباسىنىڭ اتى "1619" دەپ اتالادى. افريكادان قۇلداردى تاسىعان ۇلىبريتانيانىڭ كەمەسى العاش رەت ۆيردجينيا شتاتىنا 1619 جىلى بارادى. سوندىقتان دا، باسىلىم امەريكاداعى قۇلدىقتىڭ 400 جىلدىعىنا ارناعان جوباسىنا "1619" دەگەن ات بەرگەن.  امەريكاداعى قۇلدىق، قۇلداۋ، قۇل ساۋداسىنا قاتىستى ماتەريالدار باسىلىمنىڭ گازەتى مەن جۋرنالىنا جاريالانا باستادى. الداعى ۋاقىتتا سايتىنا دا شىقپاق.

امەريكالىق ساياساتكەرلەر جاعىنان قارسىلىققا ۇشىراعانىمەن زەرتتەۋشىلەر، تاريحشىلار، پۋبليتسيستتەر مەن دوكتورانت ساياساتتانۋشىلار جاعىنان وڭ پىكىرگە يە بولعان. ال، رەسپۋبليكاشىلدار مەن كونسەرۆاتيۆتىك پۋبليتسيستتەر ونى تاريحتى قايتا وڭدەپ جازۋ، اقيقاتتى بۇرمالاۋ ارەكەتى قاتارىندا باعالاپ جاتىر.

امەريكاداعى قۇلدىق، قۇلداۋ ارەكەتتەرى رەسمي دەرەكتەر بويىنشا 1619 جىلى باستالادى. ونىڭ سوڭى 250 جىلعا دەيىن جالعاسىپ، جوسپارلى ەكونوميكانى قۇرايدى. قۇراما شتاتتاردا قارا ناسىلدىلەردى قۇلداۋعا بۇدان 150 جىل بۇرىن شەكتەۋ قويىلسا دا، ناسىلدىك كەمسىتۋشىلىك، تەرىسىنىڭ تۇسىنە قاراي قاقپايلاۋ، شەتكە قاعۋ تاعى ءبىر عاسىردان استام ۋاقىتقا دەيىن جالعاسقان.

The New York Times باسىلىمى اتالعان جوباسىندا امەريكاداعى قۇلدىقتىڭ تاريحي ناقتى دەرەكتەرىن جاريالاپ قانا قويماي، تەڭسىزدىكتىڭ مادەنيەتكە، ەكونوميكاعا، دەنساۋلىق ساقتاۋعا جانە وزگە دە قوعامدىق تۇرمىسقا تيگىزگەن اسەرلەرى تۋرالى دا ماتەريالدار جاريالانادى. جوبادا قارا ءناسىلدى تانىمال اۆتورلاردىڭ ناسىلدىك تەڭسىزدىككە قاتىستى رەپورتاجدارى، تاريحي ەسسەلەر، پوەزيا جانە سۋرەتتەرى جاريالانادى.

دەگەنمەن، كەيبىر قاراپايىم اقش ازاماتتارى دا اتالعان جوبانى قولداماي قويمايتىنىن بىلدىرۋدە. ولار الەۋمەتتىك جەلىدەگى پىكىرىندە اتالعان جوبا الەۋمەتتىك پىكىردى ەكىگە ءبولىپ، قوعامدىق جارىلىسقا الىپ كەلەدى دەپ سانايدى.

“The Qazaq Times”