اقش پرەزيدەنتى دونالد ترامپ. فوتو: Associated press

اق ءۇي پرەزيدەنتءى باستى قاۋىپ رەتىندە اتىس قارۋلارىنىڭ پسيحيكالىق اۋىتقۋى بار ادامداردىڭ قولىندا بولۋى دەپ سانايدى.  

قاراپايىم ازاماتتارى تاراپىنان قوعامدىق ورىنداردا جاپپاي وق جۋدىرۋ دەرەگى بويىنشا تانىمال اقش مەملەكەتىندە سوڭعى جىلدارى «اتىس قارۋىنىڭ قولجەتىمدىلىگى» تۋرالى پىكىرتالاس قىزا تۇسكەن.

كەشە پرەزيدەنت دونالد ترامپ قارۋ ساتىپ الۋشىلارعا قاتىستى تەكسەرۋدى قاتاڭداتۋ ۇستانىمىن قولدايتىنىن مالىمدەدى. ونىڭ ايتۋىنشا، كوپ جاعدايدا جاپپاي اتۋ ارەكەتىنە پسيحيكاسى ساۋ ەمەس ادامدار باستاماشىلىق ەتەدى. بۇل ماسەلەنى شەشۋ ءۇشىن پرەزيدەنت اقش-تا جاڭا پسيحياتريالىق اۋرۋحانالار اشۋدى ۇسىندى.

ترامپ سەناتتاعى رەسپۋبليكالىقتاردىڭ كوشباسشىسى ميتچ ماككوننەللمەن جانە وزگە دە  رەسپۋبليكاشىلارمەن اتىس قارۋىن قولدانۋ جانە زورلىق-زومبىلىق ماسەلەسى تۋرالى سويلەسكەنىن مالىمدەدى. ترامپ حابارلاماسىندا پارتياداعى ارىپتەستەرىنىڭ دە «ەسسىز ءارى قاۋىپتى، قىساستىق نيەتتەگى جاۋىز ادامدارعا اتىس قارۋىن بارىنشا قولجەتىمدى ەتپەۋ قاجەتتىگىن» قالايتىنى ايتىلعان.

Reuters اگەنتتىگىنىڭ اقپاراتىنشا، ترامپ «ءبىز ارام پيعىلدىلار مەن ەس-اقىلىندا اۋىتقۋى بار پاتسيەنتتەردىڭ  قاندايدا ءبىر قارۋعا يەلىك ەتۋىن قالامايمىز. ولار تاپانشا شۇرىپپەسىن باسادى. تاپانشا وزدىگىنەن اتىلادى. ءبىز پسيحيكالىق ناۋقاستارعا نازار اۋدارۋىمىز كەرەك»،– دەگەن. رەاكتسياشىل پرەزيدەنت قوعامنىڭ بۇل ماسەلەگە ءجىتى نازار اۋدارۋى كەرەكتىگىن ايتىپ ءارى  1960-1970 جىلدارى اقش-تا كوپتەگەن پسيحياتريالىق اۋرۋحانالار جابىلعانىن ەسكە سالدى. ونداعى ەمدەلۋشىلەرى ەش باقىلاۋسىز ۇيلەرىنە جىبەرىلىپ، ەم شاراسىز قالعاندىعىمەن ءوز ءسوزىن تولىقتىردى.

پرەزيدەنتتىڭ پىكىرىنشە، پسيحيكالىق اۋرۋ ادامدارعا كومەك كورسەتۋ ءۇشىن وسىنداي ۇلگىدەگى جاڭا ەمدەۋ ورىندارىن اشۋ قاجەت. «ءبىز ولاردىڭ كوشەدە قالۋىنا جول بەرمەۋىمىز كەرەك»، – دەپ قورىتىندىلاعان ترامپتىڭ كەزەكتى ۇسىنىسى اقش كوپۇندى باق بەتتەرى مەن ەل اراسىندا قىزۋ تالقىعا تۇسۋدە.

وسىدان ءبىر اپتا بۇرىن اقش-تىڭ 200-دەن اسا قالا مەرلەرى سەناتورلار وزدەرىنىڭ جازعى دەمالىسىن ءۇزىپ، شۇعىل تۇردە «اتىس قارۋلارىن ساتۋعا باقىلاۋدى كۇشەيتۋ تۋرالى» زاڭ جوباسىن قابىلداۋىن تالاپ ەتكەن ەدى. مۇنداي ۇسىنىس ەل-پاسو (تەحاس شتاتى) جانە دەيتون (وگايو شتاتى) قالالارىنداعى 31 ادام ولىمىمەن ورىن العان قاندى وقيعادان كەيىن بىرنەشە كۇن وتكەن سوڭ جاسالعان. زەرتتەۋ ينستيتۋتتارىنىڭ دەرەكتەر بازاسىنا سايكەس، 13 ساعات ىشىندە ەكى شتاتتا بىرىنەن سوڭ ءبىرى بولعان قايعىلى وقيعا – وسى جىلدىڭ باسىنان بەرگى 21-ءشى جانە 22-ءشى جاپپاي كىسى ءولتىرۋ فاكتىسى. جالپى جاپپاي كىسى ءولتىرۋ وقيعاسى رەتىندە شابۋىلداۋشىنى قوسپاعاندا 4 ادامنىڭ قازا تابۋىمەن ەسەپكە الىنادى. باسقا مالىمەتتەر بويىنشا، جىل باسىنان بەرى ءتورت كىسىدەن از جارالانعان يا كوز جۇمعان وقيعالار سانى 250-دەن اسادى.

ەل-پاسو قالاسىنىڭ Walmart دۇكەنى ماڭىنداعى كوپشىلىككە جاپپاي وق جاۋدىرۋ وقيعاسىنان كەينگى ازا تۇتۋ شاراسى. تەحاس شتاتى. 5 تامىز 2019 جىل. فوتو: Reuters اگەنتتىگى

"The Qazaq Times"