وتو: QT/Google.

مامىردىڭ سوڭىندا وزبەك-قىرعىز شەكاراسىن بەكىتۋ تۋرالى ارنايى جۇمىس توبى كەزدەسۋى وزبەكستاندا وتەدى دەپ جوسپارلانعان. قىرعىز تىلىندەگى اقپارات قۇرالدارىنىڭ مالىمەتىنە قاراعاندا كەلىسسوز ءبىر اپتاعا جالعاسۋى مۇمكىن. ەكى ەل اراسىنداعى تالاستى شەكارالاردىڭ كولەمى ءسىرا قانشالىق ەكەنىن رەسمي تاراپتار ءالى اشىق جاريالامايدى.

وزبەك پەن قىرعىز شەكاراسىن بەكىتۋ تۋرالى سويلەسۋلەر وسىدان ءسال عانا بۇرىن بىشكەكتە ءوتتى. كورشىلەس ءارى باۋىرلاس ەكى ەل ماسەلەنى شەشۋ ءۇشىن ءتۇرلى ۇسىنىستاردى تالقىعا سالعان جانە تالاستى شەكارالاردى كوزبەن كورىپ، بىرلەسكەن زەرتتەۋلەر دە جۇرگىزگەن ەدى.

شىنىن ايتقاندا، وزبەكستان مەن قىرعىزستان ورتاسىندا شەكارا ماسەلەسى 1991 جىلدان بەرى ارازدىقتى ءورشىتىپ كەلىپ ەدى. ءبىر تۇستا قىرعىز بيلىگى، ءبىر تۇستا وزبەك بيلىگى كەرى تارتىپ، تەرريتوريالىق قۇقىق ماسەلەسى تىكەلەي تالقىعا سالىنباي كەلگەن. وزبەكستان بيلىگىنە ميرزيەەۆ كەلگەننەن كەيىن، كورشىلەس ەلدەرمەن قارىم-قاتىناستى رەتتەۋدى قولعا الدى. سونىڭ ىشىندە وزبەك-قىرعىز شەكاراسىن بەكىتۋ تۋرالى قادامدار دا جاسالدى. ارينە، بۇل ۇسىنىستى وعان دەيىن قىرعىز باۋىرلار دا قويىپ كەلگەن ەدى. پرەزيدەنت ميرزيەەۆتىڭ قىرعىزستان ساپارى كەزىندە قوس تاراپ شەكارانىڭ 85 پايىزى تولىق كەلىسىممەن بەكىتىلىپ بولعانىن جاريا ەتكەن.

دەگەنمەن، كەيبىر ساراپشىلار قىرعىز-وزبەك اراسىنداعى قالعان 15 پايىز شەكارا ماسەلەسى ەڭ كۇردەلى ەكەنىن ايتادى. بۇل داۋلى شەكارا ماسەلەلەرىن شەشۋ تاياۋ ارادا جۇزەگە اسپايدى دەگەن دە پىكىرلەر بولعان.

ناقتى جاعدايىنا قارار بولساق، قىرعىز تەرريتورياسىنا سۇعىنىپ جاتقان وزبەكتىڭ ءتورت ايماعى بار – سوح، چوڭ-قاراقالشا، شاحي-ماردان جانە تاش-توبە قاتارلى. بۇل ايماقتاردا سۋ جانە ەگىستىك جەرلەر سىندى ماسەلەلەر ەڭ وزەكتى. ماڭىزدى ايماقتار ءۇشىن وزبەك تارابى كوريدور سۇراپ كەلگەنى بەلگىلى. الايدا، قىرعىز ۇكىمەتى وعان كەلىسپەگەن. بۇعان دەيىنگى شەكارا ماسەلەسىنىڭ شەشىلمەۋى وسىعان تىكەلەي قاتىستى. ال، بۇل رەت وزبەكستاندا تالقىعا تۇسكەن شەكارا ماسەلەسى ەكى ەل شەكاراسىن بەكىتۋدە ۇلكنە جەتىستىكتەر جاراتادى دەپ كۇتىلۋدە.

“The Qazaq Times”