جەكسەنبىدە، قىتاي مەن ءۇندىستاننىڭ ارميالارى گيمالاي تاۋىنىڭ باتىسىنداعى داۋلى ايماقتان شەگىنىپ شىقتى. بۇل تۋرالى «رەيتەر» اگەنتتىگى حابارلادى. اقپارات اگەنتتىگىنىڭ باعالاۋىنشا كولدى ايماقتان ارميالاردىڭ شەگىنۋى ەكى ەل شەكاراسىنداعى وزگە اسكەري اڭدىسقان نۇكتەلەردەگى جاعدايدى جەڭىلدەتە ءتۇستى.

بىلتىر ساۋىردەن بەرى قاراي ەكى ەلدىڭ ارمياسى ءبىر-بىرىنە سەس كورسەتىپ ون مىڭداعان اسكەرلەرىن شەكاراعا توپتاعان بولاتىن. گيمالايدىڭ بيىك ۇستىرتىندەگى بانگوڭ مۇزدى كولىنىڭ ماڭىندا تاراپتار اسكەري اڭدىسۋ كۇيىن جىلعا جۋىق ۇستاپ تۇردى. قىس ورتاسىنداعى ايازدى قولايسىز اۋا رايىنا قاراماستان تاراپتار شەگىنىس جاساماعان. بىراق، ءۇستىرتتى ايماقتا ون مىڭداعان اسكەردى ۇستاپ تۇرۋ ەكى ەلدىڭ قورعانىس سالاسىنا دا اۋىر سالماق بولعان ەدى.

ءۇندى-قىتاي اسكەري شەندىلەرى اراسىندا 9 مارتە كەلىسسوز ءوتتى. سونىڭ تەك ەڭ سوڭعىسىندا عانا تاراپتار اسكەرلەرىن كەرى قايتارۋ كەلىسىمىنە قول جەتكىزە الدى. اقپاننىڭ باس شەنىندە كەلىسسوزدەن كەيىن تاراپتار اۋىر اسكەري تەحنيكالاردى، تانكتەر مەن ارتيللەريانى قارسىلاسۋ ايماعىنان شىعارۋعا كەلىسكەن. بۇل ارميالاردىڭ كەرى شەگىنۋىنە جول اشتى. ال، وتكەن سەنبى كۇنى قوس تاراپتىڭ وڭىردەگى كومانديرلەرى كەزدەسىپ، اسكەرلەردى شىعارۋ تۋرالى تالقىلاعان.

بىرلەسكەن ءباسپاسوز جيىنىندا تاراپتار بانگوڭ كولى ماڭىنان اسكەرلەردى شىعارۋدى قوس تاراپ تا جاقسىلىققا جورىپتى. دەگەنمەن، ءۇندىستان مەن قىتايدىڭ گيمالايدى بويلاي ءالى دە تولىق بەكىتىلمەگەن شەكارا نۇكتەلەرىندە ءالى دە قاقتىعىستىڭ بۇلتى تولىق سەيىلىپ كەتپەدى. بىلتىر ماۋسىمدا گالبان القابىنداعى قاقتىعىستا ءۇندىستان تارابىنان 20 سارباز قازا تاپقانى ايتىلعان. قاقىتعىستا قىتاي قانشا ادامىنىڭ كوز جۇمعانىن جاسىرىپ كەلدى. تەك وتكەن اپتا دا عانا قاقتىعىستا 4 اسكەرى كوز جۇمدى دەپ مالىمدەدى.

“The Qazaq Times”