كورەي تۇبەگىندە سوعىس بىلتەسى تۇتاندى

وڭتۇستىك كورەيا اقپارات قۇرالدارى، 1 ناۋرىز كۇنى، كورەيا-اقش بىرلەسكەن «كۇشىگەن» اسكەري وقۋ-جاتتىعۋلارىنىڭ باستالعانىن حابارلادى. وڭتۇستىك كورەيا مەن اقش قورعانىس وكىلدەرىنىڭ ايتىسىنا قاراعاندا، بۇل – سولتۇستىك كورەيانىڭ ارانداتۋشىلىعىنا بەرىلگەن پارمەندى جاۋاپ ەكەن. بۇل كورەي تۇبەگىنىڭ جاعدايىن ۋشىقتىرىپ، ونسىزدا جارىلعالى تۇرعان سوعىس بىلتەسىن تارتقانمەن بىردەي دەۋگە ابدەن بولادى.

قىتاي اقپارات ورتالىعىنىڭ ( China News) حابارىنا قاراعاندا، بۇل رەتكى «كۇشىگەن» بىرلەسكەن اسكەري وقۋ-جاتتىعۋلارى ەكى ايعا جالعاسپاق. اقش كۇشتەرى بۇل جاتتىعۋعا ستراتەگيالىق يادرولى «كارل ۆينسون»  قۋاتتى سوعىس تەحنيكالارىن قوسىپ وتىر. كورەيلىك باق پەن ساراپشىلارى اقش-كورەي بىرلەسكەن ارمياسىنىڭ وقۋ-جاتتىعۋى تۇبەكتىڭ ونسىزدا شيەلەنىسكە تولى جاعدايىن ودان ارى ۋشىقتىرا تۇسەدى دەپ الاڭداۋدا.

وڭتۇستىك كورەيا قورعانىس مينيسترلىگىنىڭ بەرگەن اقپاراتىنا سۇيەنەر بولساق، ەكى ەلدىڭ قورعانىس مينيسترلىگىندەگى جوعارى لاۋازىمدىلار بۇگىن تاڭەرتەڭ تەلەفون ارقىلى سويلەسكەن. اڭگىمەدە كورەي تۇبەگىنىڭ قالىپتاسقان جاعدايىن، سولتۇستىك كورەيا يادرولىق ماسەلەسىنىڭ قاتەرلەرىن اتاپ ءوتىپ، سولتۇستىك كورەيا ارانداتۋشىلىعىنا قارسى پارمەندى ارەكەتكە بۇيرىق بەرگەن. ال اقش قورعانىس ءمينيسترى مەتتيس ءوز مالىمدەمەسىندە، ەكى ەل قورعانىس وكىلدەرىنىڭ قوڭىراۋ ارقىلى سۇحباتتاسقانىن راستاي كەلە، اقش وڭتۇستىك كورەيانى قورعاۋعا تاباندى بولاتىنىن، قۇراما شتاتتىڭ جاۋلارىن تولىقتاي جەڭەتىندىكتەرىنە، بارلىق يادرولىق شابۋىلدارعا قارسى تۇرۋعا قابىلەتتى ەكەندىكتەرىن ايتتى.

وسىدان بۇرىن، ياعني 21 اقپاندا، سولتۇستىك كورەيا جۇمىسشى پارتياسى ورگانىنىڭ رەسمي باسىلىمى «جۇمىسشىلار جاڭالىعى» گازەتىندە، اقش-كورەيا بىرلەسكەن ارمياسىنىڭ ارەكەتتەرىن ايىپتاپ، سولتۇستىك كورەيانىڭ يادرولىق قۇرالداردى دامىتۋ ىسىنە تىكەلەي توسقاۋىل جاساۋ، كورەي تۇبەگىنىڭ شيەلەنىسىن ۇلعايتىپ قانا قالماي، تۇبەك جاعدايىن سوعىستىق كۇيگە الىپ كەلدى دەگەن بولاتىن.

1953 جىلعى كورەي تۇبەگىنىڭ ۋاقىتشا بىتىمىنەن بەرى قاراي، وڭتۇستىك كورەيا مەن اقش جىل سايىن بىرلەسكەن ءىرى كولەمدەگى اسكەري وقۋ-جاتتىعۋلارىن وتكىزىپ كەلەدى. سونىڭ ىشىندە اقپان، ناۋرىز ايلارىندا وتەتىن – «نەگىزگى شەشىم»، «كۇشىگەن» وقۋ-جاتتىعۋلارى مەن تامىز جانە قىركۇيەك ايلارىندا ءداستۇرلى تۇردە وتەتىن «بوستاندىقتى قورعاۋ» وقۋ-جاتتىعۋلارى دا كىرەدى. سولتۇستىك كورەيا اقش پەن وڭتۇستىك كورەيا ارمياسىنىڭ بىرلەسكەن وقۋ-جاتتىعۋىنا كۇشتى نارازىلىعىن بىلدىرۋدە.

الەم تىنىشتىعى سىنعا تۇسكەن ساعاتتا، اقش، رەسەي، قىتاي، جاپونيا، وڭتۇستىك-سولتۇستىك كورەيالار ءوز مۇددەسىن باعىپ قانا قالدى. ادامزاتقا اپات اكەلەتىن يادرولىق سوعىستىڭ تۋ قاۋپى كورەي تۇبەگىندە قىزىل سىزىقتى كورسەتىپ تۇر دەۋگە بولادى. دۇنيە ەلدەرىنىڭ ءبارى دە كەلەسى الەم سوعىسىندا ەشقانداي جەڭۋشى ەلدىڭ بولمايتىنىن الدا بۇرىن ءبىلىپ وتىرسا دا، مۇددەلەردىڭ قايشىلىعىن قولدان تۋدىرسا دا، الەمدى تىنىش كۇنگە ۇيرەتكىسى كەلمەيدى. شىعىس ازيا وسى جىلدان باستاپ ورتا شىعىستان دا كۇردەلى قايشىلىقتاردىڭ الاڭى بولۋى بەك مۇمكىن.

“The Qazaq Times”