Foto: sputnicknews.com

Oñtüstik Koreya aqparat qwraldarı, 1 naurız küni, Koreya-AQŞ birlesken «Küşigen» äskeri oqu-jattığularınıñ bastalğanın habarladı. Oñtüstik Koreya men AQŞ qorğanıs ökilderiniñ aytısına qarağanda, bwl – Soltüstik Koreyanıñ arandatuşılığına berilgen pärmendi jauap eken. Bwl Korey tübeginiñ jağdayın uşıqtırıp, onsızda jarılğalı twrğan soğıs biltesin tartqanmen birdey deuge äbden boladı.

Qıtay aqparat ortalığınıñ ( China News) habarına qarağanda, bwl retki «Küşigen» birlesken äskeri oqu-jattığuları eki ayğa jalğaspaq. AQŞ küşteri bwl jattığuğa strategiyalıq yadrolı «Karl Vinson»  quattı soğıs tehnikaların qosıp otır. Koreylik BAQ pen sarapşıları AQŞ-Korey birlesken armiyasınıñ oqu-jattığuı tübektiñ onsızda şieleniske tolı jağdayın odan arı uşıqtıra tüsedi dep alañdauda.

Oñtüstik Koreya Qorğanıs ministrliginiñ bergen aqparatına süyener bolsaq, eki eldiñ qorğanıs ministrligindegi joğarı lauazımdılar bügin tañerteñ telefon arqılı söylesken. Äñgimede Korey tübeginiñ qalıptasqan jağdayın, Soltüstik Koreya yadrolıq mäselesiniñ qaterlerin atap ötip, Soltüstik Koreya arandatuşılığına qarsı pärmendi äreketke bwyrıq bergen. Al AQŞ qorğanıs ministri Mettis öz mälimdemesinde, eki el qorğanıs ökilderiniñ qoñırau arqılı swhbattasqanın rastay kele, AQŞ Oñtüstik Koreyanı qorğauğa tabandı bolatının, Qwrama Ştattıñ jauların tolıqtay jeñetindikterine, barlıq yadrolıq şabuıldarğa qarsı twruğa qabiletti ekendikterin ayttı.

Osıdan bwrın, yağni 21 aqpanda, Soltüstik Koreya Jwmısşı partiyası organınıñ resmi basılımı «Jwmısşılar jañalığı» gazetinde, AQŞ-Koreya birlesken armiyasınıñ äreketterin ayıptap, Soltüstik Koreyanıñ yadrolıq qwraldardı damıtu isine tikeley tosqauıl jasau, Korey tübeginiñ şielenisin wlğaytıp qana qalmay, tübek jağdayın soğıstıq küyge alıp keldi degen bolatın.

1953 jılğı Korey tübeginiñ uaqıtşa bitiminen beri qaray, Oñtüstik Koreya men AQŞ jıl sayın birlesken iri kölemdegi äskeri oqu-jattığuların ötkizip keledi. Sonıñ işinde aqpan, naurız aylarında ötetin – «Negizgi şeşim», «Küşigen» oqu-jattığuları men tamız jäne qırküyek aylarında dästürli türde ötetin «Bostandıqtı qorğau» oqu-jattığuları da kiredi. Soltüstik Koreya AQŞ pen Oñtüstik Koreya armiyasınıñ birlesken oqu-jattığuına küşti narazılığın bildirude.

Älem tınıştığı sınğa tüsken sağatta, AQŞ, Resey, Qıtay, Japoniya, Oñtüstik-Soltüstik Koreyalar öz müddesin bağıp qana qaldı. Adamzatqa apat äkeletin yadrolıq soğıstıñ tuu qaupi Korey tübeginde qızıl sızıqtı körsetip twr deuge boladı. Dünie elderiniñ bäri de kelesi Älem soğısında eşqanday jeñuşi eldiñ bolmaytının alda bwrın bilip otırsa da, müddelerdiñ qayşılığın qoldan tudırsa da, älemdi tınış künge üyretkisi kelmeydi. Şığıs Aziya osı jıldan bastap Orta Şığıstan da kürdeli qayşılıqtardıñ alañı boluı bek mümkin.

“The Qazaq Times”