ميرزيەەۆ پەن مەركەل كەزدەسۋىندە توعىز قۇجات قابىلداندى

وزبەكستان پرەزيدەنتى شاۆكات ميرزيەەۆ گفر كانتسلەرى انگەلا مەركەلمەن كەلىسسوز جۇرگىزدى. كەزدەسۋدە ساۋدا-ەكونوميكالىق، ينۆەستيتسيالىق جانە تەحنولوگيالىق ارىپتەستىك ماسەلەلەرىنە ەرەكشە كوڭىل ءبولىندى دەپ حابارلادى وزبەك پرەزيدەنتىنىڭ ءباسپاسوز قىزمەتى.

شاۆكات ميرزيەەۆتىڭ مالىمدەۋىنشە، وزبەكستان گەرمانيانى ەكونوميكالىق مۇمكىندىگى مول، ينۆەستيتسيا جانە تەحنولوگيا سالالارىندا باستى ارىپتەسى بولاتىن الەمدىك دەرجاۆا رەتىندە قابىلدايدى.

تاراپتار ەكى ەل اراسىنداعى 700 ملن ەۆرودان اسقان ساۋدا اينالىمىنىڭ دامۋىن اتاپ ءوتىپ، 1 ملرد ەۆروعا دەيىن جەتكىزۋدى جوسپارلادى.

وزبەكستاندا قازىر گەرمانيا ينۆەستورلارىنىڭ قاتىسۋىمەن 132 كاسىپورىن جۇمىس ىستەيدى، ولاردىڭ ىشىندە 33 كاسىپورىن ءجۇز پايىز نەمىس كاپيتالىمەن اشىلعان. وزبەكستان ۇلتتىق بانكى 57 نەمىس بانكىمەن بايلانىس ورناتقان. تاشكەنتتە "دويچە-بانكا" ءبولىمى جۇمىس ىستەيدى.​

كەزدەسۋدە ادام قۇقىقتارىن، قورشاعان ورتانى قورعاۋ ماسەلەلەرى ءسوز بولدى. ميرزيەەۆ گفر ۇكىمەتىن ارال تەڭىزىن اپاتتان امان الىپ قالۋعا قوسقان ۇلەسى ءۇشىن العىس ايتىپ، بەرليندى ارال تراست قورىنىڭ قىزمەتىنە بەلسەندى تۇردە قاتىسۋعا شاقىردى.

جۇزدەسۋدە ءبىلىم جانە عىلىم، مادەني بايلانىستاردى ارتتىرۋ، تۋريستىك ايىرباستاردى كەڭەيتۋ قاجەتتىگى ايتىلدى.​

"وزبەكستاندا سەگىز مىڭنان استام ەتنيكالىق نەمىس تۇراتىنى، ولارعا ۇلتتىق مادەنيەت پەن ءداستۇردى ساقتاۋعا بارلىق جاعداي جاسالعانى اتاپ ءوتىلدى. ەلدە 400 مىڭنان استام وقۋشى نەمىس ءتىلىن وقيدى. جاقىندا تاشكەنت، سامارقاند جانە بۇحارا مەكتەپتەرىنە نەمىستىڭ ۇلى عالىمدارى مەن ويشىلدارىنىڭ ەسىمدەرى بەرىلگەن", - دەلىنگەن ءباسپاسوز قىزمەتىنىڭ حابارلاماسىندا.

ميرزيەەۆتىڭ گەرمانياعا ساپارى بارىسىندا ەكونوميكا، ساۋدا، قارجى، ءبىلىم، عىلىم جانە يننوۆاتسيا سالارىنا قاتىستى توعىز ۇكىمەتارالىق جانە مەكەمەارالىق قۇجات قابىلداندى.

"The Qazaq Times"