1 تامىزدا ءوزبەكستان كونستيتۋتسياسىنا ەنەتىن ءوزگەرىستەردى جالپىحالىقتىق تالقىلاۋ اياقتالدى. كونستيتۋتسيالىق كوميسسيا 117 357 ۇسىنىس تءۇسكەنىن، ولاردىڭ دەنى پرەزيدەنت مەرزىمىن ۇزارتۋدى قولداعانىن حابارلادى دەپ جازدى ورتالىق ازيا جاڭالىقتار قىزمەتى.

ازاتتىق راديوسى وزبەك قىزمەتىنىڭ مالىمەتىنشە، بيۋدجەتتەن قارجى الاتىن ۇيىمداردا ىستەيتىن جۇمىسشىلاردى وزبەكستان پرەزيدەنتى مەرزىمىن بەس جىلدان جەتى جىلعا دەيىن سوزۋ نەمەسە ميرزياەۆتى ءومىر بويى پرەزيدەنت ەتىپ قالدىرۋ تۋرالى ۇسىنىس تاستاۋعا ماجبۇرلەگەن.

بەكادات قالاسىنداعى "وزمەتكومبينات" كومپانياسىنىڭ ءبىر جۇمىسشىسى ۇسىنىس كوشىرمەسىن "وزودليك" رەداكتسياسىنا جولدادى.

"مەن تاشكەنت وبلىسى بەكاباد قالاسىندا تۇرامىن. مەملەكەتىمىزدەگى رەمورمالارعا وتە ريزامىن. سول سەبەپتى كونستيتۋتسيانىڭ 90-بابىنا قاتىستى ۇسىنىس ايتقىم كەلەدى. وزبەكستان پرەزيدەنتى مەرزىمى بەس جىلدان جەتى جىلعا سوزىلسىز نەمەسە مەملەكەت باسشىسىن ومىرلىك پرەزيدەنت دەپ قالدىرسىن", - دەلىنگەن كاسىپورىن جۇمىسشىلارى قول قويعان مالىمدەمەدە.

جۇمىسشىلاردىڭ ايتۋىنشا، 23 شىلدەدە كومبيناتقا وزبەكستان پرەمەر-ءمينيسترى ابدۋللا ءارىپوۆ كەلگەن. سودان كەيىن كاسىپورىن باسشىلىعى الدىن الا دايىندالعان مالىمدەمەگە جۇمىسشىلارعا قول قويعىزا باستاعان.

- بىزدىك اتقارۋشى ديرەكتور ديلشود احمەتوۆ ءىىم اكادەمياسىن بىتىرگەن، بۇرىن مەملەكەتتىك قاۋىپسىزدىك قىزمەتىندە ىستەگەن. ول كومبيناتقا كەلگەن سوڭ قاۋىپسىزدىك ءبولىمى اشىلدى. ەندى ءسوز تاسۋشىلار مالىمەتتىڭ ءبارىن وسى بولىمگە جەتكىزىپ تۇرادى. سول سەبەپتى كومبينات جۇمىسشىلارى قورقادى، ءۇنسىز قاعازدارعا قول قويىپ بەرەدى، - دەيدى "وزمەتكومبينات" جۇمىسشىسى.

وسى تارىزدەس ارىزدار رەسپۋبليكانىڭ باسقا دا وڭىرلەرىنەن ءتۇسىپ جاتىر.

كونستيتۋتسيالىق كوميسسيا اتا زاڭعا وزگەرىس ەنگىزۋ جونىندە رەفەرەندۋم وتەتىن كۇندى ءالى بەلگىلەمەدى، بىراق رەسپۋبليكادا ساياسي ناۋقانعا دايىندىق قىزۋ ءجۇرىپ جاتىر.

شاۆكات ميرزياەۆ 2016 جىلعى جەلتوقساندا كەزەكتەن تىس پرەزيدەنت سايلاۋىندا وزبەكستان پرەزيدەنتى بولىپ سايلاندى. 2021 جىلعى قازاندا ميرزياەۆ 80,12% داۋىسپەن پرەزيدەنت سايلاۋىندا ەكىنشى مارتە جەڭىسكە جەتتى.

وزبەكستان كونستيتۋتسياسىنىڭ جاڭا نۇسقاسى رەفەرەندۋمدا ماقۇلدانار بولسا، وندا ميرزياەۆ 83 جاسقا دەيىن نەمەسە ءومىر بويى ەلدى باسقارادى.