قىرعىزستاندا اليمەنت تولەۋدەن قاشقاندارعا قارسى زاڭدى كۇشەيتپەك

قىرعىزستان بيلىگى اليمەنتتەن قاشقان ازاماتتارعا قارسى زاڭدى كۇشەيتپەك. اتالعان تاقىرىپ جوعارعى كەنەشتىڭ باستى تالقىلاۋىنا ءتۇستى.

جيىندا ءسوز العان دەپۋتات ايسۇلۋ ماماشوۆا: «ستاتيستيكا بويىنشا قىرعىز ەلىندەگى ءاربىر 5-ءشى وتباسى اجىراسۋ ۇستىندە. وسىعان بايلانىستى بالالاردىڭ قۇقىعى دا تاپتالۋدا. ەندى ءاربىر بۇلدىرشىنگە باقىتتى بالالىق شاق قالىپتاستىرۋ ءۇشىن اليمەنتى كۇشەيتۋ كەرەك. سونىمەن قوسا، بۇل تاقىراپتاعى زاڭداردىڭ دا تيىسىنشە كۇشتى بولۋىن قاداعالاۋىمىز ءتيىس» دەپ، ءوز پىكىرىن جەتكىزدى.

دەپۋتات بۇدان بولەك قازىرگى جۇيە ءاربىر اكە بولعان قىرعىزستاندىق ازاماتتىڭ جازادان جەڭىل قۇتىلۋىنا دا جول اشىپ وتىرعاندىعىن جەتكىزدى. سونداي-اق، تاقىرىپتى بارلىق شەنەۋنىكتەرگە مالىمدەپ قانا قويماي، ونىڭ شەشىمىن دە كورسەتە ءبىلدى. مىسالى، اليمەنتتەن جالتارعان ازاماتتاردى شەكارادان شىعارۋ، كولىك جۇرگىزۋ قۇقىعىنان ايىرۋ كەرەكتىگىن ۇسىندى.

قازىرگى تاڭدا اليمەنتتىڭ جاعدايى جوعارعى كەنەشتە تالقىعا تۇسۋدە. ەگەر، قىرعىزستان پارلامەنتىندە وتىرعان شەنەۋنىكتەر دەپۋتات ايسۇلۋ ماماشوۆەنىڭ ءسوزىن ىسكى اسىرار بولسا، وندا اجىراسقان اكەلەردىڭ جاعدايى قيىنداي ءتۇسۋى مۇمكىن.

ەستەرىڭىزگە سالا كەتەيىك، قازاقستاندا دا اليمەنتتىك جاعدايدىڭ كورسەتكىشى ءماز ەمەس. باس پروكۋراتۋرانىڭ دەرەكتەرىنە سۇيەنسەك، ءبىزدىڭ ەلىمىزدە 25 مىڭنان استام ازامات اليمەنت تولەمەي قاشىپ ءجۇر. قازىرگى تاڭدا ولاردى ءۇش ساناتقا ءبولىپ قاراستىرىپ وتىر.

• ارى تازا بورىشكەرلەر (اليمەنت تولەگىسى كەلەدى، تەك جۇمىس تابا الماي ءجۇر);
• ادەيى تولەمەي جۇرگەندەر (اليمەنت تولەۋگە شاماسى جەتەدى، تەك بۇرىنعى جۇبايىنان كەك الۋ ماقساتىندا، نە قانداي دا ءبىر ۇستانىممەن تولەگىسى كەلمەي جۇرگەندەر);
• ءۇمىتسىز بورىشكەر (اليمەنت تولەۋگە جاعدايى دا، نيەتى دە جوق – ءۇي-كۇيسىز، جۇمىسسىز، ماسكۇنەم، ناشاقورلار).

سوڭعى جىلدارى 30 پايىز ازامات اليمەنت تولەۋدەن قاشسا، 40 پايىزىنا ىزدەۋ جاريالانعان. وسىنىڭ سالدارىنان 350 مىڭنان استام ءبۇلدىرشىن اليمەنتكە زار بولىپ وتىر.

"The Qazaq Times"