اقش پەن برۋنەي داۋلى تەڭىز ايدىنىندا بىرلەسكەن اسكەري جاتتىعۋ وتكىزدى

اقش تەڭىز فلوتى مەن برۋنەي كورولدىك تەڭىز فلوتى وتكەن اپتادا وڭتۇستىك قىتاي تەڭىزىندە بىرلەسكەن اسكەري وقۋ-جاتتىعۋلاردى وتكىزدى. سونداي-اق، بۇل جاتتىعۋدى «كالا» بىرلەسكەن تەڭىز سوعىس دايىندىعى مەن جاتتىعۋى» دەپ اتادى. جاتتىعۋعا ەكى ەلدىڭ تەڭىز فلوتىنا قاراستى جىلدام قوزعالاتىن بارلاۋ كەمەلەرى جانە P-8A Poseidon تەڭىز پاترۋلدىك ۇشاعىن قامتىعان اسكەري تەحنيكالارى تارتىلدى.

برۋنەي وڭتۇستىك قىتاي تەڭىزىندە تەرريتوريالىق داۋ-دامايدا ءباسى بار 6 مەملەكەتتىڭ ءبىرى. وزگە داۋگەرلەر قاتارىنا تايۋان (تايۆان), قىتاي، مالايزيا، فيليپپين جانە ۆەتنام كىرەدى.

اقش تەڭىز كۇشتەرىنىڭ ءۇندى-تىنىق مۇحيت قولباسشىلىق باس شتابى تاراتقان مالىمەتكە قاراعاندا، كەزەكتى جاتتىعۋ ەكى ەل كەمەلەرىن سوعىس جاعدايىندا سۋ ۇستىندە ورنالاستىرۋ، تەڭىز ايدىنىنداعى پاترۋلدىك ۇشاقتار مەن باقىلاۋ جانە قورعانۋ اپپاراتتارىنىڭ مۇمكىندىگىن ارتتىرۋ، سونداي-اق، بىرلەسە شابۋىلداۋ جانە اۋە شابۋىلدارىنا جاۋاپ بەرۋ ماقساتتارىندا وتكەن.

قۇراما شتاتتار مەن برۋنەي تەڭىز قورعانىس ىنتىماقتاستىعىندا 40 جىلدىق سەنىمدى سەرىكتەر. اقش قورعانىس وكىلدەرى تەڭىز قاۋىپسىزدىگى مەن ءوڭىر تۇراقتىلىعى ءۇشىن برۋنەي تەڭىز كۇشتەرىمەن بىرلەسە جۇمىس ىستەيتىنىن ايتقان.

«كالا تەڭىز جاتتىعۋىنان» تىس، باسقا دا ەكى جاقتى جانە اۋىسپالى تەڭىز جاتتىعۋلارىنا قاتىسادى. ايتالىق، «17-ءشى كەزەكتى وڭتۇستىك شىعىس جاتتىعۋى»، «26-ش كەزەكتى تىنىق مۇحيت اسكەري وقۋ-جاتتىعۋى».   ال، تامىز ايىندا اقش پەن برۋنەي العاش رەت ەكىجاقتى اسكەري جاتتىعۋ وتكىزگەن ەدى.

“The Qazaq Times”