Brexit: شەشىم مەن ءتۇيىن

ۇلىبريتانيانىڭ ەۋرووداق قۇرامىنان شىعاتىن ۋاقىتى تاياپ قالدى. الايدا بۇل شەشىمە قاتىستى ءبىراز داۋ تۋىنداپ، تاراپتار ءالى دە ورتاق كەلىسىمگە كەلە العان جوق. ەۋرووداق باسشىسى ميشەل بارنە ماڭىزدى كەلىسسوزدە بريتانيالىق پرەمەر-مينيستر تەرەزا مەي ۇسىنعان كەلىسىمشارتقا ءۇزىلدى-كەسىلدى قارسىلىق ءبىلدىردى.

بىرىككەن كورولدىكتىڭ پرەمەر-ءمينيسترى تەرەزا مەي رەفەرەندۋمدى قايتا وتكىزۋگە شاقىرعانداردىڭ شەشىمىن قۇپتاعان جوق. سەبەبى ەۋرووداقتاعى بىرلەستىكتەردىڭ ۇسىنىستارى ەل مۇددەسىنە قايشى كەلۋى ىقتيمال. «The Daily Telegraph» گازەتىندە جارىق كورگەن اۆتورلىق ماقالاسىندا برەكسيت شەشىمىن بۇگە-شىگەسىنە دەيىن تالقىلاي وتىرىپ، «ەكىنشى رەفەرەندۋمعا جول جوق. ەۋرووداق قۇرامىندا قالۋ-قالماۋ تۋرالى ماسەلە ەندى تالقىلانبايدى!»، – دەگەن. سونداي-اق رەفەرەندۋمدى قايتا وتكىزىپ، ەلدەگى دەموكراتياعا قيانات جاساعىم كەلمەيدى دەيدى.

شىلدەدە چەكەرس رەزيدەنتسياسىندا وتكەن كەلەلى كەزدەسۋ لوندون مەن بريۋسسەل قارىم-قاتىناسىنا «جاڭا سەرپىن» اكەلدى. ناقتى ناتيجە بويىنشا ەۋرووداق بيۋدجەتىنە تۇسەتىن قوماقتى تولەمدەر توقتاتىلىپ، بريتانيانىڭ دەنساۋلىق ساقتاۋ جۇيەسىنە نازار اۋدارىلماق. سونىمەن قاتار ۇلىبريتانياداعى ساۋدا قاتىناستارى ساقتالىپ، ورتاق قاۋىپسىزدىك ماسەلەلەرى شەشىمىن تابادى. ياعني كەدەن وداعى مەن بىرىڭعاي نارىقپەن حوش ايتىسۋعا مۇمكىندىك تۋىپ، وزگە مەملەكەتتەرمەن ەركىن كەلىسىمدەر جۇزەگە اسادى.

ءوز ماقالاسىندا ت.مەي ەۋروپالىق وداق قۇرامىنان كەلەسى جىلدىڭ 29 ساۋىرىندە شىعۋ ارقىلى حالىقتىڭ دەموكراتيالىق كوزقاراسىن ناقتى قالىپتاساتىنىن جازعان. قاتاڭ قاعيدا ارقىلى بىرىككەن كورولدىك سۇراپىل كۇشكە اينالىپ، مىقتى ءارى مەريتوكراتيالىق مەملەكەت بولىپ قايتا جاڭاراتىنىنا نىق سەنىمدى. بىراق مەيدىڭ بۇل باستاماسىن ءوزى باسشىلىق ەتەتىن پارتياداعىلار اسا قۇپتامايتىن سىڭايلى. ەۋرووداقتىڭ برەكسيت بويىنشا وكىلى ميشەل بارنە مەيدىڭ بۇل پىكىرىمەن كەلىسپەيدى. بارنە «لوندون كەدەندىك وداقتان شىعاتىن بولسا، ەۋروپالىق بىرىڭعاي نارىقتا بريتانيالىق تاۋارلاردىڭ ساتىلۋىنا شەكتەۋ قويىلادى» دەپ پىكىر بىلدىرگەن. ال پارلامەنت دەپۋتاتتارى مەن بۇرىنعى سىرتقى ىستەر ءمينيسترى بوريس دجونسون مەيدىڭ ۇسىنىستارىن قاتتى سىنعا الدى جانە ەۋرووداقتان شىعۋ ءۇشىن تولەنەتىن 40 ملرد ەۋروعا قارسىلىقتارىن ءبىلدىردى. ولار تۇبىندە بريۋسسەل جەڭىسكە جەتىپ، چەكەرستە بولعان ۇسىنىستان سوڭ ۇلىبريتانيا ۇرىسقا اق جالاۋ جەلبىرەتىپ بارعانداي بولادى دەگەن ويدا.

ءتۇيىن. بريتانيانىڭ ەۋرووداقتان شىعۋى ءبىرتالاي ۋاقىت تالاس تۋدىرىپ كەلەدى. الەمدىك دەڭگەيدەگى تاقىرىپ رەتىندە بۇل شەشىمنىڭ پايداسى مەن زيانى تالقىلاندى. تەرەزا مەي مەن وزگە دە تاراپتاردىڭ پىكىرىن سالىستىرا وتىرىپ، مىناداي تۇجىرىم جاساۋعا بولادى.

بىرىنشىدەن، سوڭعى جىلدارى ەو ءبىراز ەكونوميكالىق قۇلدىراۋدى باستان كەشتى. بريتانيا وداقتان شىعۋ ارقىلى، مەملەكەتتىك كومپانيالاردى بيۋرروكراتيالىق «رەگرەسستەن» قۇتقارىپ، قارجىلىق داعدارىستان قۇتىلا الادى.

ەكىنشىدەن، Brexit فۋنتتىڭ قۇنىن قالىپقا كەلتىردى. ياعني بۇل – تۋريزم سالاسىنىڭ كەڭ قانات جايۋىنا سەپتىگىن تيگىزەدى.

ۇشىنشىدەن، ۇلىبريتانيا ەكونوميكالىق جوسپار قۇرىپ، جاڭا كەلىسىمدەر جۇرگىزۋ ارقىلى ەۆوليۋتسياعا ۇشىراۋى ءتيىس. ال ساياسي ىستە تۇراقسىزدىق تانىتاتىن مەملەكەت جوبالاردى وداق قۇرامىنان تىس مەملەكەتتەرمەن جۇرگىزۋ بارىسىندا كەدەرگىلەردى باستان كەشۋى مۇمكىن. دەمەك، جوعارىدا كەلتىرىلگەن مىسالدار دəلەلدەگەندەي، ۇلىبريتانيا ەو-دان شىقسا دا، ءسوزسىز جەڭىمپاز اتانادى.

"The Qazaq Times"