وزبەكستان سوڭعى ۋاقىتتارى ءوزىنىڭ اسكەري قۋاتىن ارتتىرۋدا. ول وسى ماقساتتا الەمدىك دەرجاۆالارمەن اسكەري-تەحنيكالىق ارىپتەستىك ورناتىپ، ارمياسىن تولىققاندى مودەرنيزاتسيادان وتكىزۋدە.

ءساۋىر ايىنىڭ 9-ى كۇنى وزبەكستان پرەزيدەنتى شاۆكات ميرزيەەۆ اقش-پەن اسكەري-تەحنيكالىق ارىپتەستىك ورناتۋعا بايلانىستى قۇجاتقا قول قويدى. ساراپشىلار پىكىرىنشە، قازىرگى تاڭدا رەسمي تاشكەنت 2005 جىلى بولعان ءاندىجان وقيعاسىنان كەيىن ناشارلاعان ۋاشينگتونمەن اراداعى قارىم-قاتىناسىن جاقسارتۋ ءۇشىن بارىن سالۋدا. ونىڭ ۇستىنە اقش-تا وزبەكستانمەن اسكەري سالادا ارىپتەستىك ورناتۋعا نيەتتى. سەبەبى ءاندىجان وقيعاسىنا دەيىن 2001-2005 جىلدار ارالىعىندا پەنتاگون وزبەكستاننىڭ اۋعانستانمەن شەكارالاس اۋدانىندا ورنالاسقان حاناباد اۋە بازاسىن پايدالانعان. بۇل اقش ارمياسىنا ەشقانداي كەدەرگىسىز اۋعانستانعا قارۋ-جاراق، قوسىمشا اسكەر قوسىندارىن جونەلتۋگە مۇمكىندىك بەرگەن. بىراق 2005 جىلعى قاندى قىرعىنىنان سوڭ وزبەكستان پارلامەنتى پەنتاگون يەلىگىندەگى اۋە بازاسىن قايتارىپ الۋعا شەشىم شىعارعان. ءوز كەزەگىندە اقش وزبەكستان بيلىگىن «ادام قۇقىقتارىن اياقاستى ەتتى» دەپ ايىپتاپ، قانداي دا ءبىر بايلانىس ورناتۋدان باس تارتقان. ال ناتو اسكەري بلوكقا مۇشە ەلدەرگە وزبەكستانعا قارۋ-جاراق ساتۋعا تىيىم سالعان. وسىدان كەيىن رەسمي تاشكەنت قارۋ-جاراقتى تەك رەسەيدەن تاسىمالداعان. ۇزاق جىلدار بويى وزبەكستان مەن رەسەي اراسىنداعى قارىم-قاتىناس «ستراتەگيالىق ارىپتەستىك» جانە «ەكونوميكالىق ارىپتەستىكتى دامىتۋ» كەلىسىم قۇجاتتارى نەگىزىندە جۇرگىزىلىپ كەلگەن. الايدا 2012 جىلى رەسمي تاشكەنت «ۇجىمدىق قاۋىپسىزدىك تۋرالى شارت ۇيىمىنىڭ» (ودكب) قۇرامىنان شىعىپ، اقش، تۇركيا جانە ناتو ەلدەرىمەن قايتادان اسكەري ارىپتەستىگىن جانداندىرا باستاعان.

بيلىك باسىنا شاۆكات ميرزيەەۆتىڭ كەلۋىمەن وزبەكستاننىڭ اقش، تۇركيا جانە ناتو ەلدەرىمەن اسكەري-تەحنيكالىق باعىتتا قارىم-قاتىناس ورناتۋى جاڭا دەڭگەيگە كوتەرىلدى. وسى ۋاقىتقا دەيىن وزبەكستان اسكەري-تەحنيكالىق باعىتتا 13 جول كارتاسىن قابىلدادى. قورعانىس سالاسىنا بولىنەتىن بيۋدجەت قارجىسىن 1,4 ميلليارد دوللارعا جەتكىزدى. قورعانىس مينيسترلىگىندەگى 70 جوعارى ساناتتاعى وفيتسەردى جۇمىستان قۋىپ، باس شتاب باسشىلىعىن قايتا جاساقتادى. سوڭعى ءۇش جىلدا وزبەكستان فرانتسيادان 14 تىكۇشاق، يسپانيادان 4 بىردەي س-295W جەڭىل-تۋربينالى تاسىمالداۋشى ۇشاقتارىن، بولگاريادان گراناتومەد قۇرىلعىلارىن، چەحيادان راديوەلەكترونيكالىق اۋە قورعانىسى جۇيەلەرىن ساتىپ الدى. ناتيجەسىندە وزبەكستان ارمياسى ەشقانداي حالىقارالىق كواليتسياعا نەمەسە ۇيىمعا مۇشە بولماي اق اسكەري قۋاتى جاعىنان الەم بويىنشا 48 ورىنعا تۇراقتادى. بۇدان بولەك شاۆكات ميرزيەەۆ بيىلدان باستاپ ازىربايجانمەن اسكەري-تەكحنيكالىق ارىپتەستىك ورناتۋعا بايلانىستى قۇجاتتارعا قول قويدى جانە قازاقستانمەن بروندالعان اسكەري تەحنيكالار ساتىپ الۋعا كەلىسىمگە كەلدى. ءبىر سوزبەن ايتقاندا وزبەكستان ارمياسى ءوزىنىڭ ءال-اۋقاتىن وتكەن جىلدارمەن سالىستىرعاندا بىرنەشە ەسەگە كۇشەيتتى.

“The Qazaq Times”