YPG كۇشتەرى. فوتو: Maps & Conflicts Database - SouthFront.

تۇركيا رەسميلەرى كوپتەن بەرى اقش-تى  سۇرياداعى كەيبىر تەررورلىق توپتارعا قولداۋ كورسەتىپ وتىر دەپ ايىپتايدى. اسىرەسە، انكارا بيلىگى سۇرياداعى YPG قارۋلى توپتارىن تۇركيا جەرىندەگى PKK (كۇرد قارۋلى توپتارى) ۇيىمىنىڭ جالعاسى دەپ قارايدى. ءارى، اقش-تى YPG قارۋلى توپتارىن  قارۋ-جاراقپەن قامداۋشى دەپ كورسەتەدى.   رەسەي دە بۇل ماسەلەدە تۇركيامەن ۇقساس ۇستانىمدا. بۇل تۋرالى «انادولى» اقپارات اگەنتتىگى حابارلادى.

رەسەي قاۋىپسىزدىك كۇشتەرىنىڭ مالىمەتىندە سۇرياداعى YPG باقىلاۋىنداعى ايماقتا اقش-تىڭ 20 اسكەري تۇراعى بار دەلىنگەن. رەسەي قاۋىپسىزدىك كوميتەتىنىڭ حاتشىسى الەكساندر ۆەنەديكتوۆ مالىمدەمەسىندە: «اقش تەررورلىق توپتاردى زاماناۋي قارۋلارمەن قامدادى. بۇل تۇركيانىڭ افرين ايماعىندا اسكەري وپەراتسيا جۇرگىزۋىنە سەبەپ بولدى»، – دەدى.

دەگەنمەن، تۇركيا مەن رەسەيدىڭ بۇل ايىپتاۋىن ءبىر جاقتى قولداۋ قيىن. سەبەبى، YPG ۇيىمى تۋرالى الەم ەلدەرى ءار ءتۇرلى كوزقاراستا. بۇل توپ كۇرد قارۋلى جاساقتارىنان قۇرالعان، تولىق اتى – حالىقتىڭ ءوزىن قورعاۋ ارمياسى دەپ اتالادى. تۇركيا، يراك جانە رەسەي ەلدەرى اتالعان ۇيىمدى تەررورلىق توپ دەپ تانىعان. ال، اقش باستاعان كواليتسيا YPG توبىن دايش-پەن كۇرەستەگى وداقتاسى رەتىندە قارادى. ءارى، YPG-گە قارۋ-جاراق بەرىپ، سۇرياداعى «يسلام مەملەكەتى» ۇيىمىن جويۋعا شاقىردى.

بۇدان بۇرىن YPG ۇيىمىنداعى قارۋلاردىڭ تەك اقش-تان كەلمەگەنىن، حالىقارالىق كواليتسياعا مۇشە 17 ەلدىڭ قارۋ-جاراعى بار ەكەنى دە ايتىلعان. قالاي بولسا دا YPG توبىنىڭ جاڭا قارۋ-جاراقتارى افرين ايماعىنداعى تۇركيا قارۋلى كۇشتەرىنە ۇلكەن كەدەرگى بولدى. تۇركيانىڭ ماقساتى ءسۇريانىڭ سولتۇستىگىندەگى ايماقتى قارۋلى توپتاردان تازارتىپ، ءسۇريا بوسقىندارىن ەلىنەن شىعارىپ سالۋ.  

“The Qazaq Times”