ەردوعان ترامپقا العىس ءبىلدىردى

رەجەپ تايىپ ەردوعان اقش-تىڭ قازىرگى پرەزيدەنتى دونالد ترامپقا انكارا مەن ۋاشينگتون اراسىنداعى قارىم-قاتىناستى ورتاق مۇددەلەر مەن قۇندىلىقتار نەگىزىندە دامىتۋعا مۇمكىندىك بەرگەنى ءۇشىن العىس ايتتى.

ەردوعان جولداعان حاتتا: «سايلاۋدىڭ رەسمي ناتيجەلەرى قانداي بولماسىن، مەن سىزگە ورتاق مۇددەلەر مەن قۇندىلىقتار نەگىزىندە تۇركيا مەن اقش اراسىنداعى قاتىناستاردى دامىتۋعا نەگىز بولعانىڭىز ءۇشىن العىس ايتامىن. ەكى ەل اراسىنداعى تاريحي قالىپتاسقان دوستىق، ارىپتەستىك جانە وداقتاستىق قاتىناستارىنىڭ بەرىك ىرگەتاسى نەگىزىندە ودان ءارى دامۋ ءبىزدىڭ ورتاق مۇددەلەرىمىزگە ساي كەلەدى. ءبىز الداعى ۋاقىتتا وسى باعىتتا ارەكەت ەتۋدى جالعاستىرامىز»، – دەلىنگەن.

بۇعان دەيىن تۇركيا پرەزيدەنتى دەموكرات دجوزەف بايدەندى پرەزيدەنتتىك سايلاۋداعى جەڭىسىمەن قۇتتىقتاعان بولاتىن.

اقش-تا پرەزيدەنت سايلاۋى 3 قاراشادا ءوتتى. ترامپتىڭ قارسىلاسى دەموكرات دجوزەف بايدەن 270-تەن استام داۋىس جيناپ، سايلاۋداعى جەڭىسىن جاريالادى. رەسپۋبليكالىق پارتيا وكىلدەرى مەن ترامپ بايدەننىڭ جەڭگەنىن مويىندامادى جانە سايلاۋشىلاردىڭ داۋىستارىن ساناۋعا قاتىستى سوتتارعا جۇگىنۋگە نيەت ءبىلدىردى. سەبەبى ولار «سايلاۋدا زاڭ بۇزۋشىلىقتار بولدى جانە بايدەننىڭ جەڭىسكە جەتۋى ءۇشىن سىرتقى فاكتورلار ىقپال ەتتى»، – دەپ سانايدى.

"The Qazaq Times"