قاۋىپسىزدىك كەڭەستىڭ كحدر زىمىران سىناعىنا بايلانىستى شۇعىل وتىرىسى ناتيجەسىز اياقتالدى

سارسەنبى كۇنى بۇۇ قاۋىپسىزدىك كەڭەسى سولتۇستىك كورەيانىڭ زىمىران سىناعىنا بايلانىستى شۇعىل تۇردە كەزدەسۋ وتكىزدى. اقش تارابى كەڭەستە بارلىق ەلدەردى كحدر-مەن بولعان ديپلوماتيالىق قارىم-قاتىناسىن ءۇزۋدى تالاپ ەتتى. وعان قوسا قىتايدان سولتۇستىك كورەياعا مۇناي ساتۋىن توقتاتۋىن سۇرادى. بۇل تۋرالى «WSJ» باسىلىمى حابارلادى.

بۇل بيىل قاۋىپسىزدىك كەڭەسىنىڭ 13-ءشى رەت باس قوسىپ، كحدر-نىڭ بالليستيكالىق زىمىرانداردىڭ جىلدام دامۋ مۇمكىندىگىنە قالاي جاۋاپ بەرۋ كەرەكتىگىن تالقىلاۋى. سارسەنبى كۇنى تاڭعا جاقىن اتىلعان زىمىران جاپونيانىڭ جاپون تەڭىزىندەگى ەرەكشە اكىمشىلىك ايماعىنا قۇلادى. مامانداردىڭ پىكىرىنشە، زىمىراننىڭ باعىتى مەن كەڭىستىككە كوتەرىلۋ بيىكتىگىنە قاراعاندا، ۋاشينگتونعا شابۋىل جاساۋ ءۇشىن جاسالعان ءبىر رەتكى سىناق دەۋگە بولادى.

قاۋىمداستىق وكىلدەرىنىڭ بەرگەن مالىمەتىنە قاراعاندا، كەزەكتى سىناق سولتۇستىك كورەيانىڭ ءبىر جىل ىشىندە 3-ءشى رەت الىس قۇرلىقتارعا جەتەتىن زىمىراندى سىناۋى. 2017 جىلى سولتۇستىك كورەيا جالپى سانى 20 زىمىراندى سىناق رەتىندە ۇشىرعان.

بۇۇ-داعى اقش وكىلى نيككي حەلي: «سولتۇستىك كورەيانىڭ قادامدارى الەم ەلدەرىن سوعىسقا جەتەلەيدى، قۇراما شتات سوعىسقا قادام قويمايدى، بىراق سوعىس تۋىلاتىن بولسا سولتۇستىك كورەيا رەجيمى تولىعىمەن جويىلاتىنى ءسوزسىز»، – دەدى.

ەكى ساعاتقا سوزىلعان كەزەكتى شۇعىل وتىرىستا كەڭەس مۇشەلەرى كيم جوڭ ۋن رەجيمىنە قىسىم تۇسىرەتىن ساياسي جانە ەكونوميكالىق ادىستەردى زەرتتەپ ورتاعا سالدى. حەلي قاۋىپسىزدىك كەڭەسكە مىنا ادىستەردى ۇسىندى: سولتۇستىك كورەيانىڭ بىرىككەن ۇلتتار ۇيىمى بەرگەن مۇمكىندىكتەرىن جانە داۋىس بەرۋ قۇقىعىن جويۋ; بارلىق مۇشە-مەملەكەتتەرگە سولتۇستىك كورەيامەن ديپلوماتيالىق، اكادەميالىق جانە ساۋدا قاتىناستارىن ۇزۋگە شاقىرۋ; بارلىق ەلدەر سولتۇستىك كورەيا جۇمىسشىلارىن شىعارىپ، سولتۇستىك كورەيانىڭ مۇنايدى يمپورتتاۋعا سانكتسيالار ەنگىزۋدى تالاپ ەتتى.

حەليدىڭ ايتۋىنشا، قازىردىڭ وزىندە 20 مەملەكەت كحدر-مەن  قارىم-قاتىناسىن ءۇزدى. الايدا، سولتۇستىك كورەيادا كەيبىر ەلدەردىڭ ەلشىلىكتەرى مەن ديپلوماتيالىق قىزمەتكەرلەرى بار. سونىڭ ىشىندە ۇلىبريتانيا سەكىلدى اقش-تىڭ وداقتاستارى ەكەنىن دە العا تارتتى. مۇشە ەلدەر ماسەلەنىڭ وزەكتىلىگىن بىلگەنىمەن، اقش ۇسىنعان ۇسىنىستاردىڭ قابىلدانۋى تىم قيىن ەكەنى انىق. قىتاي مەن رەسەي مۇناي ساۋداسىنا تىيىم سالۋ سياقتى شارالارعا قارسى، ولاردىڭ وكىلدەرى سولتۇستىك كورەيانىڭ ەكونوميكاسى مەن تۇتىنۋشىلارى، اسىرەسە قىس ايلارىندا، زارداپ شەگەتىنىن العا تارتۋدا. بۇل وتىرىستا پالەندەي ءبىر ناقتى شەشىم قابىلدانبادى.

“The Qazaq Times”