فرانتسيادا قايىرشىلىق قالىپتى قۇبىلىسقا اينالعان

فرانتسيانىڭ استاناسى پاريج قالاسىنىڭ سولتۇستىك باتىس بولىگىندەگى ەليسەي جازىعى - ەلدەگى بايلىق پەن كەدەيلىكتىڭ كورىنىسى قاتار ۇشتاساتىن ورىنداردىڭ ءبىرى. كەلىسىم الاڭى مەن تريۋمفالدى اركا ارالىعىنداعى ەكى كيلومەترلىك كوشەگە جىل سايىن ميلليونداعان تۋريستەر كەلەدى. وتكەن جىلى جاڭا جىل قارساڭىندا مۇندا 500 مىڭ تۋريست تىركەلسە، 2016 جىلى فرانتسيانىڭ الەۋمەتتىك تاپتاردىڭ قايشىلىعى انىق بايقالاتىن اتاقتى الاڭىن 36,5 ملن ادام تاماشالاعان. 

ەليسەي جازىعىندا ورنالاسقان قىمبات دۇكەندەر مەن مەيرامحانالاردىڭ الدىندا، كوشە بويىندا ءۇيسىز قالعان ادامداردىڭ جەردە وتىرعانىن، ۇيىقتاپ جاتقانىن نە تاماقتانىپ وتىرعانىن كورۋگە بولادى. The Fondation Abbé Pierre قوعامىنىڭ جىلدىق ەسەبىندە 2017 جىلى 4 ملن ادام ء"ۇيسىز قالعان" دەپ كورسەتىلسە، فرانتسيانىڭ ستاتيستيكا كوميتەتى ءبىر عانا ءپاريجدىڭ وزىندە 140 مىڭ ادامنىڭ باسپاناسى جوق ەكەنىن حابارلايدى.

فوتو: aljazeera.com

فرانتسيادا قايىرشىلىق 1994 جىلدان بەرى زاڭداستىرىلعان، بىراق بىرنەشە تالابى بار: جاس بالالاردى قولدانۋعا بولمايدى، قوعامدىق ءتارتىپتى بۇزۋعا تىيىم سالىنادى، كوشەدەن وتكەندەردەن سۇرالاتىن كومەك اگرەسسيۆتى فورمادا بولماۋى كەرەك.

فوتو: aljazeera.com

مۇندا قايىرشى بولىپ جۇرگەن ادامداردىڭ جاس ارالىعى 25-60 جاس. بىرقاتارى كوشەدە تۇرسا، ەكىنشىلەرى ءۇيسىز قالعان جاندارعا ارنالعان الەۋمەتتىك ورتالىقتاردى مەكەندەيدى. بارىنە ورتاق ءبىر دۇنيە - كۇنىن كۇنگە ازەر جالعايتىن تومەنگى دارەجەدەگى الەۋمەتتىك جاعداي. قايىرشىلاردىڭ نەگىزگى قۇرامى -  فرانتسيانى 600 جىلدان بەرى مەكەندەپ كەلە جاتقان "روما" توبى (روماندار، سىعاندار، ت.ب). بۇل ەلدە ازشىلىق توپقا كىرەتىن سىعاندار كوپ جىلدار بويى ديسكريميناتسياعا ۇشىراپ كەلگەن. وتكەن جىلى فرانتسيا ۇكىمەتى 10 مىڭ سىعاندى ەلدەن كۇشپەن شىعارىپ جىبەرگەن بولاتىن.

“The Qazaq Times”