وشاقباەۆ: قازاقستان تەڭگە كۋرسىن ەركىن اينالىمعا جىبەرمەۋ كەرەك

تەڭگە كۋرسىن ەركىن اينالىمعا جىبەرۋ ساياساتى قازاقستانعا ءتيىمسىز. سوندىقتان ۇلتتىق بانك كۋرستى بەلگىلەۋ جۇيەسىن قاراستىرۋ كەرەك. "تالاپ" قولدانبالى زەرتتەۋ ورتالىعى" قوعامدىق قورىنىڭ ديرەكتورى راقىم وشاقباەۆ وسىلاي مالىمدەدى، دەپ حابارلايدى LS.

ەكونوميستىڭ تۇسىندىرۋىنشە، ورتالىق ەلدەگى ينفلياتسيانىڭ وسۋىنە اسەر ەتىپ وتىرعان نەگىزگى فاكتورلارعا زەرتتەۋ جۇرگىزگەن. ناتيجە بويىنشا، ۇكىمەت پەن ۇلتتىق بانكتىڭ باعانىڭ كوتەرىلۋىنە قارسى شارالارى تەك 50%-عا ءتيىمدى بولىپ وتىر.

"قازاقستانداعى ينفلياتسيانىڭ جوعارىلاۋىنىڭ باستى فاكتورى - تەڭگەنىڭ قۇبىلۋى. ءبىزدىڭ ويىمىزشا، بۇل فاكتوردى رەتتەۋ قولعا الىنباسا، ينفلياتسيانى تۇراقتاندىرۋ بيلىككە قيىن بولادى. ال باسقالارى - ساتىۋشلارمەن، سپەكۋليانتتارمەن كۇرەسۋ جانە قورلاردى تۇراقتاندىرۋ  ەش ءتيىمدى بولمايدى. سوندىقتان ءبىزدىڭ ورتالىق تەڭگە كۋرسىن بەلگىلەۋ جۇيەسىنە قايتا ورالۋ كەرەك دەپ ەسەپتەيدى", - دەدى ول.

وشاقباەۆتىڭ سوزىنشە، تەڭگەنى ەركىن اينالىمعا جىبەرۋ ساياساتى قازاقستانعا قولايسىز. ول تەك دامىعان جانە ارتاراپتاندىرىلعان ەكونوميكادا عانا جاقسى جۇمىس ىستەيدى.

"بىزدەگى ۆاليۋتا تابىسىنىڭ 50%-دان استامى مۇناي نارىعىنان تۇسەدى، ال ونىڭ دا باعاسى قۇبىلمادى. ەركىن اينالىم جۇيەسىن ءبىزدىڭ ەلدە جۇزگە اسىرۋ ءتيىمسىز دەپ ەسەپتەيمىز. سوندىقتان ەلدەگى ەكونوميكانىڭ باسەكەگە قابىلەتتىلىگىن قولدايتىن جانە تاۋەكەلدەردى تومەندەتۋگە مۇمكىندىك بەرەتىن تەڭگەنىڭ تەپە-تەڭدىگىن انىقتاپ الۋ قاجەت.  ەڭ ۇلكەن تاۋەكەلدەردىڭ ءبىرى - بۇل رۋبل دەۆالۆاتسياسى. ول دوللار كۋرسى 350-360 تەڭگە بولعان كۇننىڭ وزىندە تومەن باعالانۋى ءتيىس، ال ەڭ ماڭىزدىسى - ەكونوميكا اگەنتتەرىنىڭ بولاشاعىنا سەنىم ءبىلدىرۋ. قازىر نارىقتا كۋرستىڭ قالاي وزگەرەتىنى تۋرالى ناقتى تۇسىنىك جوق. ءتۇرلى ساراپشىلار وزدەرىنىڭ بولجامدارىن ايتادى، ال بۇل ينفلياتسيا ماسەلەسىن ودان ءارى ۋشىقتىرادى. ياعني مەن نارىقتا ۇلتتىق بانككە سەنىم از ەكەنىن ايتقىم كەلەدى", - دەدى ەكونوميست.

بۇدان بولەك، ساراپشى باس بانك تەڭگە كۋرسىن جوعارىلاتىپ نەمەسە تومەندەتۋ ءۇشىن جاسىرىن تۇردە نارىقتاعى ساۋداعا ارالاسىپ وتىر دەپ ەسەپتەيدى.

"ساراپشىلار ۇلتتىق بانكتەن ينتەرۆەنتسياعا قاتىستى ناقتى اقپاراتتى جاريالاۋدى سۇرايدى، الايدا ولار مۇنى ىستەۋدەن باس تارتىپ وتىر. بيرجادان تىس  وپەراتسيالارعا قاتىستى دا سۇراقتار بار، الايدا ولاردىڭ كولەمى قانداي ەكەنىن ءتىپتى ەشكىم بىلمەيدى", - دەيدى راقىم وشاقباەۆ.

 ايتا كەتەيىك، سوڭعى ءبىر ايدا تەڭگە كۋرسى تومەندەپ كەتتى. ءتىپتى EXPO-2017 حالىقارالىق كورمەسى اياقتالعان سوڭ ءۇش كۇننىڭ ىشندە دوللار باعامى 340 تەڭگەگە دەيىن كوتەرىلدى. ال ۇلتتىق بانك بولسا ءالى كۇنگە تەڭگەنىڭ قۇبىلۋىن سىرتقى نارىق اسەرىمەن نەمەسە شەتەل ۆاليۋتالارىنا سۇرانىستىڭ ارتىپ كەتۋىمەن ءتۇسىندىرىپ الەك.

“The Qazaq Times”