تۇرىك ەلىنىڭ سىرتقى ىستەر ءمينيسترى ءماۆلۇت چاۆۋشوعلۇ. فوتو:ۆەستي.رۋ.

تۇركيا سىرتقى ىستەر ءمينيسترى اقش پەن رەسەي اراسىنداعى داۋعا ارالاستى. ولار اقش-تىڭ رەسەيگە باعىتتالعان جاڭا سانكتسيا شارالارىنا تۇركيا جاقتىڭ قارسى ەكەنىن ءبىلدىردى. بۇل تۋرالى سول ەلدىڭ ەڭ ۇلكەن اقپاراتتىق اگەنتتىگى «اناتولى»-نىڭ رەسمي سايتى جازدى.

تۇركيا ءسىم باسشىسى ءماۆلۇت چاۆۋشوعلۇ مالىمدەمە جاساپ، رەسەي قاراتىلعان سانكتسيا شارالارىنا قارسىلىعىن ءبىلدىردى. ول رەسەيگە باعىتتالعان شارالاردىڭ تۇركيا ەكونوميكاسىنا كەرى اسەرىن تيگىزەتىندىگىن العا تارتتى. ول سوزىندە: «تۇركيا وسىدان بۇرىن رەسەي باعىتتالعان شەكتەۋ شارالارىنان ايتارلىقتاي زيانعا تاپ بولدى. كورشى جانە وداقتاسىمىز بولعان رەسەيگە قارسى شارا قولدانۋ ءبىزدىڭ ەكونوميكامىزعا زيان تيگىزەدى. سوندىقتان ءبىز رەسەيگە قارسى شارالاردى قولدامايمىز»، – دەدى.

وسىلايشا باتىس ەلدەرىمەن قارىم قاتىناسى سالقىنداعان تۇرىك ەلىنىڭ تۇعىرى ءوز اينالاسىنداعى ەلدەرمەن وداقتاستىقتى بارىنشا ساقتاۋعا ويىسىپ كەلەدى. اراب ەلدەرى جانە رەسەي، يران، تۇركى تىلدەس ەلدەرىمەن بولعان ساياسي ىنتىماقتاستىقتى بارىنشا تەرەڭدەتۋدى كوزدە ۇستاپ وتىر. تۇرىك ەلىنىڭ ءمينيسترى سوزىندە: «ءبىز بۇدان كەيىن دە رەسەيگە قارسى شارا قولدانۋعا قاتىسپايمىز. ءبىز وڭىردەگى ساياسي ىنتىماقتى تاڭدايمىز»، – دەپ رەسەيگە بولىستى.

قارا تەڭىز ارقىلى كورشىلەس جاتقان تۇرىك ەلى مەن رەسەي ەكونوميكاسى جان-جاقتان ءبىر-بىرىنە بايلاۋلى. 2015 جىلى رەسەي مەن تۇركيا اراسىنداعى سالقىن قاباق كىربەڭدىكتەن وڭباي ۇتىلعان ەردوعان، ەندىگى جەردە ورىس كورشىسىنىڭ ۇپايىن تۇگەندەي ءجۇرۋدى دە ەسكەرسە كەرەك.

“The Qazaq Times”